Без да биде изведена на обвинителна клупа главата на октоподот, правдата нема да биде задоволена во случајот „Рекет“, велат од опозициската ВМРО-ДПМНЕ преку соопштение.

Доколку највисоките владини функционери бидат амнестирани за овој мега политичко-медиумско-обвинителски коруптивен скандал, нагласува ВМРО-ДПМНЕ, тогаш е јасно дека органите на прогонот и судската власт се ставаат во заштита на криминалот.

„Нема човек во земјава на кого не му е јасно дека Боки 13, Зоран Милевски – Кичеец или Катица Јанева немале капацитет само да ја смислат целата рекетарска шема, а уште помалку имале моќ да ја реализираат. Јасно е како бел ден дека највисоките структури на власта стојат зад нивниот пријател Боки 13, со кого имаа редовни фотосесии.
Со Зоран Заев на власт Македонија стана препознатлива по криминал, корупција и рекет. Аферата ‘Рекет’ е најголемиот криминален случај во независна Македонија. Аферата ‘Рекет’ е доказ за криминогеноста на Зоран Заев и власта. Таа е потврда за спрегата помеѓу судството, обвинителството и власта“, нагласуваат од ВМРО-ДПМНЕ.

Партијата додава дека со месеци се развлекувало приведувањето на Боки 13 и Зоки Кичеец, за кои во обвинителството имало фото и видеодокументирани докази, но не постапило сè додека снимките не беа објавени во медиумите.

„Беше потребно јавноста од странски медиум да ја слушне Катица Јанева како ветува слобода на обвинет во предмет од СЈО за и таа да се најде зад решетки. Медиумите изнесоа бројни детали, а социјалните мрежи зовреа за на крај ЈО да ја повика Фросина Ременски. Се губеа и уништуваа телефони и исчезнуваа торби Луј Витон полни со евра.  Развлекувањето на случајот ‘Рекет’ е апсолутен доказ дека Зоран Заев е главата на октоподот, а ЈО, судот и органите на системот се само неговите пипци“, додава ВМРО-ДПМНЕ.

Според нив, ефикасна разрешница на „Рекет“ не може да има сè додека Зоран Заев е на власт.