Катастрофалното и расипничко работење на Владата на СДС и Димитар Ковачевски резултира со ново поскапување на цените, овој пат на услугите на Агенцијата за катастар на недвижностите. Во време кога државата има инфлација од 20 проценти, цените на сите прехранбени производи се до плафон, сиромаштијата е сè поголема, граѓаните ќе плаќаат и до 500 проценти повисоки цели за услугите од Агенцијата за катастар на недвижностите. Или изразено во пари тоа би изгледало вака, ако до сега една услуга за изработка на геодетски елаборат чинела 750 денари, сега ќе чини дури 1.552 денара; ако правото на упис на стан досега чинеше 300 денари, сега со новите покачувања ќе чини 1.200 денари или ако имотен лист чинеше 180 денари, сега ќе чини 250, се вели во соопштението од ВМРО-ДПМНЕ.

Од партијата додаваат дека Владата на СДС удира по џебот на граѓаните и поради неспособност да менаџира со кризите, ги зголемува цените. Згора на тоа, СДС ја претвори државата во своја приватна сопственост за спроведување матни бизнис-зделки и лично богатење. Имено, директорот на ЈП „Железници“, Хари Локвенец, дава тендер за геодетски услуги на фирмата на Светлана Тунџева, сопруга на директорот на Катастарот, Борис Тунџев, во вредност од 40.000 евра. Од една страна, Туџев ги зголемува цените, а од друга, неговата сопруга добива пари за геодетски услуги од ЈП „Железници“, претпријатие што е пред колапс.

Од ВМРО-ДПМНЕ велат дека СДС ги користат државните институции како алатка за испумпување државни пари, а државата и граѓаните тонат во беда и сиромаштија. И ова не е единствен ваков случај, има многу случаи во кои народните пари завршуваат во џебовите на високи владини функционери. Повеќе од очигледно е дека наместо концепт на транспарентност и отчетност, Владата спроведува концепт на крадење и лажење.

Владата на СДС и Ковачевски континуирано работат на штета на граѓаните. И токму затоа потребни се промени и избори што побргу. Доаѓа време на одговорност, се вели во соопштението.