Македонија
ВМРО-ДПМНЕ го обвинува Филипче дека го поддржувал Заев во матни тендери, СДСМ возвраќа дека паничат и лажaт

Нови партиски препукувања утрово помеѓу владејачката ВМРО-ДПМНЕ и опозицискиот СДСМ.
Од ВМРО-ДПМНЕ велат дека претседателот на социјдемократската партија, Венко Филипче, преку матните тендери во РЕК Битола на експремиерот Зоран Заев, поддржувал поскапа струја за народот.
„Филипче преку матните тендери во РЕК Битола на неговиот ментор Заев, поддржуваше поскапа струја на народот. Матните тендери во РЕК Битола, каде што фирми блиски до Заев испумпуваа десетици милиони евра и 7 години го опустошуваа енергетскиот комбинат, за Филипче не е криминал. Тендерот од 43 милиони евра за ископ на Марковски компани, кој сега веќе е поништен од новото раководство во РЕК Битола, е само дел од многуте тендери каде што фирми како Јавор Транс и други, блиски до аболицираниот Заев, испумпуваа милиони“, се вели во партиското соопштение.
Како што се додава, Филипче и неговото раководство, не се откажуваат од аболицираниот Зоран Заев, туку напротив, продолжуваат со неговите политики да ја водат партијата.
Социјалдемократите, пак, велат дека во изминатите шест месеци, ВМРО-ДПМНЕ покажало дека освен празни зборови и измислени напади, нема што друго да понуди на граѓаните, а очигледна е нивната паника од целосно новото раководство на СДСМ, кое со Венко Филипче донело нова енергија и јасна визија за напредок.
„За ВМРО-ДПМНЕ, вистинскиот проблем е тоа што во СДСМ има реална промена – нешто што тие очајно се обидуваат да го негираат. Со секојдневни лаги и обвинувања без докази, ВМРО-ДПМНЕ се обидува да го дефокусира народот од сопствената неспособност. Но, граѓаните јасно гледаат дека оваа партија за шест месеци не испорача ништо. Единственото нешто што ВМРО-ДПМНЕ испорача е разочарување“, велат од СДСМ.
Партијата додава дека на граѓаните им е јасно – кога нема резултати, ВМРО-ДПМНЕ прибегнува кон лаги и манипулации. До ВМРО-ДПМНЕ порачаа дека е време е да почнат да работат за граѓаните, а не да се занимаваат со измислени напади врз нив.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Уште колку луѓе треба да настрадаат за Панче Тошковски да почувствува одговорност, прашуваат од СДСМ

Министерот Панче Тошковски без око да му трепне јавно соопшти дека не чувствува никаква одговороност за колапсот на безбедносниот систем и фактот што на улиците се пука како да сме Див Запад, велат од СДСМ.
Според нив, последиците од партизацијата на полицијата и претоварењето во партиски сервис на ДПМНЕ скапо ги чини граѓаните.
„До кога мисли Тошковски да се криe зад политички реторики додека улиците стануваат небезбедни за граѓаните?
Не е само последното пукање во Куманово, непрекинатиот раст на вооружените и насилни инциденти во различни градови е сигнал за целосно системско потфрлање на безбедниот апарат, нема ниту превенција ниту соодветна реакција.
За тоа мора да има одговорност“, додаваат од оваа партија.
Македонија
Парични казни за три градинки и едно училиште по спроведени инспекциски контроли во кујните

Инспекциските служби на Агенција за храна и ветеринарство (АХВ), во септември годинава спроведоа инспекциски контроли во училишните и кујните во градинките на територијата на цела држава. Спроведени беа 91 контрола во градинки и 23 вонредни надзори во училишта.
За утврдените недоследности, издадени се 9 решенија со наредби за нивно отстранување. Во две градинки, хигиената не била задоволителна во кујните, а една градинка немала спроведено задолжителен здравствен преглед на вработениот персонал во кујните. Парични казни изречени се за 3 градинки, и поради несоодветно чување, уништени се 24 килограми храна.
Од спроведените контроли во училиштата, незадоволителни услови констатирани се само во една училишна кујна. Отстапки во однос на добрата производствена и добра хигиенска пракса утврдени се во две кујни. Поради погрешно декларирање, уништени се 59 килограми храна.
Инспекциските служби на АХВ за утврдените недоследности со контролите во училишните кујни изрекле 1 парична казна и донеле 5 решенија со наредба за нивно отстранување.
Македонија
Муцунски на состанок на министрите за надворешни работи во рамки на Берлинскиот процес

Денеска и утре во Белфаст ќе се одржи состанок на министрите за надворешни работи во рамки на Берлинскиот процес, на кој ќе учествува министерот за надворешни работи и надворешна трговија, Тимчо Муцунски.
Министрите ќе дискутираат за прашања поврзани со европската безбедност, помирувањето, регионалната и европската интеграција, како и за справувањето со нелегалната миграција, во контекст на процесот на проширување на Европската унија.
На состанокот ќе учествуваат министрите за надворешни работи од земјите од Западен Балкан и земјите–членки на Европската унија вклучени во Берлинскиот процес.
На маргините од настанот, Муцунски ќе оствари и повеќе билатерални средби.