Од ВМРО-ДПМНЕ го критикуваат ставот на владејачкиот СДСМ според кој покачувањето на акцизата на дизелот нема да ги погоди сиромашните граѓани бидејќи 60% од сиромашните домаќинства во Македонија немаат автомобил. Како што велат од опозициската партија, тоа е ставот врз основа на кој власта не го прифаќа нивниот предлог за укинување на акцизата на дизелот.

„Картелот на власт на чело со Зоран Заев работи директно на штета на граѓаните. Покачувањето на акцизата може не влијае врз функционерите на СДСМ, но исклучително оптоварувачки влијае врз буџетот на граѓаните. Околу 50 милиони евра годишно е директната штета за граѓаните, земјоделците и стопанството од покачувањето на акцизата на дизелот. Индиректната штета, која резултира со покачување на цените на сите продукти и услуги, е уште поголема“, наведуваат од ВМРО-ДПМНЕ.

Оттаму констатираат и дека граѓаните живеат полошо од пред една година.

„Цените растат, а стандардот на граѓаните паѓа. Просечната платата во февруари е за околу 900 денари пониска од платата во јануари. Во исто време цените на мало растат, а трошоците за живот се сè поголеми. Државата оди кон банкрот. Јавниот долг на државата ја надмина психолошката граница од 5 милијарди евра. Државата се задолжува по неколкупати во месецот, а граѓаните не знаат за што и како се трошат нивните пари“, стои во партиското соопштение.

На крајот, од опозициската партија нагласуваат дека Република Македонија заслужува просперитетна иднина, која ќе гарантира силна економија и институции кои ќе бидат сервис на граѓаните и ги поканува сите обесправени, сите оние разочарани граѓани на голем антивладин собир на 2 јуни во 20 часот пред зградата на Владата на Република Македонија.