Зоран Заев и Васко Ковачевски ги потценуваат граѓаните и се повеќе се заплеткуваат во криминалната мрежа, велат од ВМРО-ДПМНЕ во реакцијата на денешната прес-конференција на премиерот.

„Зоран Заев и Васко Ковачевски се обидуваат да ја убедат јавноста дека камионите кои биле во сопственост на Тотал инжинеринг од Струмица се шверцувале во РЕК Битола. Верзијата што Зоран Заев, Вице и Ковачевски ја смислиле е дека камионите со струмички таблички и ознаки на СВ Инвест од Битола среде бел ден, незабележани од никого, влегувале во кругот на РЕК Битола, извршувале работи за комбинатот и потоа повторно незабележани од никого, си заминувале“, стои во реакцијта на опозициската партија.

Оттаму нагласуваат дека после ваквата одбрана на, како што велат, триото „Минхаузен“, нема граѓанин кој што не го интересира каде може да се најдат шофери и камиони кои ќе дојдат, ќе сработат и ќе си заминат без никаков надомест.

„Вчера Заев велеше дека немал ништо со камионите, а денес појаснува дека Вице имал механизација ама наводно ја продал. Секој ден различен став за да се сокрие вистината за криминалот. Признанието на Заев само ги потврдува сомненијата дека фирмата СВ Инвест од Битола вршела превоз на јаглен со камионите во сопственост на Тотал инжинеринг во периодот кога се направени снимките“, сметаат од ВМРО-ДПМНЕ.

Од партијата ги повикуваат истражните органи да соберат храброст и да ги испитаат сомнителните бизниси на, како што велат, криминалниот картел во власта.

„Ваквите дела не застаруваат и доколку се обидат да ги прикријат незаконските активности, по враќањето на правната држава предметите ќе бидат повторно отворени“, се наведува во реакцијата.