Македонија
ВМРО-ДПМНЕ и СДСМ со меѓусебни обвинувања за јапонските цреши
Владејачкиот СДСМ и опозициската ВМРО-ДПМНЕ си упатија меѓусебни обвинувања за сечата и заболувањето на јапонските цреши.
Од ВМРО-ДПМНЕ обвинија дека дрвата биле искасапени на најбрутален начин во време кога загадувањето руши рекорди.
„Местото кое важеше за белег на Скопје, стана место на пустош и мизерија. Со изговор дека се исушени ова е една од најмасовните сечи на дрвја во центарот на Градот. Со овој потег Шилегов и Богдановиќ покажаа дека нивните ставови за заштита на животната средина се лажни и манипулативни, додека ветувањата за разеленување на градот и општината стана научна фантазија. Истиве ликови докажаа дека не се кадарни и се тотално неспособни да се грижат за оние работи коишто им ги оставиле нивните претходници“, рече Антоанета Трајковска од ВМРО-ДПМНЕ.
СДСМ во реакцијата наведе дека ВМРО-ДПМНЕ глуми загриженост за садници кои биле заболени поради нивната долгогодишна негрижа.
„Колку ВМРО-ДПМНЕ се грижеше за зеленилото докажуваат масовните сечи на на Водно, уништувањето дрвореди и цели паркови кои често се правеа во доцните утрински часови. Истото ВМРО-ДПМНЕ денес лицмерно глуми загриженост за дрвја кои ќе бидат заменети со нови садници. Како што јавно објавија институциите, Општина Центар, Град Скопје, станува збор за заболени дрва со габични инфекции, кои ќе бидат заменети со нови садници веќе в понеделник, додека вакво менување на заболени садници се случувало и претходно. Дрвата се заболени токму поради долгогодишната негрижа на тогашната градска власт предводена од ВМРО-ДПМНЕ и Коце Трајановски, а денес се санираат штетите“, велат од СДСМ во реакцијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Отстранети 330 кубни метри отпад од диви депонии во неколку скопски општини
Во текот на изминатите неколку дена, Јaвното претпријатие Комунална хигиена-Скопје реализираше низа вонредни активности за подигнување и транспорт на отпад од диви депонии на повеќе локации.
Отстранети се приближно 330 кубни метри непрописно одложен кабаст, градинарски и мешан комунален отпад во близина на Арената Борис Трајковски и во населбата Трнодол во скопската општина Карпош, на улиците Никола Пушкаров, Христо Батанџиев и Лука Геров во општината Ѓорче Петров, на улиците Џон Кенеди, Вуковарска и Христијан Тодоровски-Карпош во општината Чаир, како и на улиците Февруарски поход, Коста Новаковиќ, Анастас Митрев и Васко Карангелевски во општината Аеродром. Повторно е интервенирано и на булеварот Никола Карев, во непосредна близина на Амбасадата на САД.
Отстранетите диви депонии се лоцирани околу контејнерите наменети за одлагање комунален отпад, а се создаваат во периодот кога садовите се сосема празни и отпадот може да се одложи во садовите.
Градот Скопје и ЈП Комунална хигиена-Скопје повторно апелираат да престане тенденциозното непрописно и несовесно исфрлање отпад на јавни површини што директно придонесува за загадување на животната околина и го загрозува јавното здравје.
Македонија
ВМРО-ДПМНЕ: Филипче е чувар на фотелјата на Заев
Венко Филипче е чуварот на фотелјата на Зоран Заев во СДС. Тоа е општ впечаток во јавноста, па дури и во самиот СДС, велат од ВМРО-ДПМНЕ преку соопштение.
„И членовите и функционерите на партијата кажуваат дека СДС е заробена партија, дека изборите за претседател биле компромитирани и не биле демократски, со бројни забелешки и злоупотреби.
Самите членови и функционери на СДС кажуваат дека фантоми биле на избирачкиот список, дека на членови не им било дозволувано да гласат, за на крајот Филипче да биде избран со 9.000 гласови од 80.000 членови.
Филипче и Заев треба да знаат дека ниту една лидерска позиција нема да ги спаси од одговорност за злоупотребите кои се случија во нивниот мандат.
Јавноста уште ги памети скандалот со набавката на вакцини, крвавиот тендер, обидите да се приватизира јавното здравство и на крајот катастрофата со модуларната болница
Овие скандали кои чинеа не само милиони евра, туку и човечки животи се резултат на двоецот Заев – Филипче, кој сега покажа дека ја имаат киднапирано партијата за да биде нивна маша.
Жалиме што СДС пропушти шанса да се справи со криминалците во своите редови, но казната порано или подоцна ќе ги стигне, како што беа казнети од страна на граѓаните на последните избори“, се вели во партиското соопштение.
Македонија
109 санкционирани возачи во Скопје
Во Скопје вчера се изречени вкупно 109 мерки, меѓу кои за возење без возачка дозвола 14 санкции, четири мерки за користење на мобилен телефон при управување, 28 санкции за прекршоци што ги чинат возачите на мотоцикли, четири мерки за некористење на сигурносен појас, информира МВР во дневниот извештај.
Сообраќајните контроли продолжуваат и во наредните денови.
Се апелира до граѓаните да ги почитуваат сообраќајните правила и прописи за зголемена безбедност во сообраќајот и придонес за посигурни патишта.