Македонија
ВМРО-ДПМНЕ: Ковачевски и СДСМ знаат дека ќе доживеат дебакл, затоа институциите се распаѓаат
Ковачевски и СДСМ знаат дека ќе доживеат дебакл, затоа институциите се распаѓаат, УЈП и финансиската полиција дувло за рекет? Гледаме од препукувањата помеѓу Вилма Русковска и Арафат Муареми како полека ќе почне да излегува сето она што го правеле, сето она што го ставале под тепих и мислеле дека нема да се дознае, се вели во соопштението од ВМРО-ДПМНЕ.
Од партијата наведуваат дека Русковска и Муареми покажуваат како биле злоупотребувани институции, и тие обвинувања и индиции мора да имаат разрешница. Мора да се види што правеле наместо борба против криминалот?! Муареми и другите институции во системот мора да кажат дали и ако да, зошто биле злоупотребувани истраги од страна на финансиската полиција за рекет?
Од ВМРО-ДПМНЕ прашуваат дали се отворени предмети за да се држат под закана од прогон луѓе или фирми, а потоа откако ги дисциплинирале ги ставале во фиока?
Русковска, пак, треба да каже зошто молчеле до сега и од кога знае за таквите наводи? Одговорност мора да има, и овој случај мора да се изведе до крај.
Дека институциите се гнили покажува и даночниот криминал од речиси 100 милиони евра, кој бил правен со фиктивни фактури, а кој УЈП го криеше од јавноста сè додека ВМРО-ДПМНЕ не обелодени сомнежи за криминал.
Како доаѓа крајот на власта на СДСМ и ДУИ, така сè повеќе излегуваат на површина нивните криминали. Ваквите случаи дополнително ќе бидат истражени по промената на власта и секој кој се огрешил пред законот ќе треба да одговара, а не да се крие зад поранешни функции или политички позиции. Законот ќе важи еднакво за сите, се вели во соопштението.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Седумнаесет организации бараат итно спроведување на меѓународното законодавство за Охридско Езеро и Студенчишко Блато
Во текот на вчерашниот ден 17 организации испратија барање до премиерот Мицковски и министерот Меџити итно и во консултации со експертската јавност и граѓанските здруженија да се спроведе ревизијата на студиите за валоризација на Охридското Езеро и Студенчишкото Блато и да се финализира процесот на прогласување на заштитените подрачја.
Граѓанските организации го поздравија повлекувањето на Предлог законите за прогласување на Охридското Езеро за споменик на природата и Студенчишко Блато за парк на природата од собраниска процедура, но истакнаа дека се додека не се финализира процесот не се спроведени меѓународните договори, Уставот и Законот за управување со Светското природно и културно наследство во Охридскиот Регион.
„Итното спроведување на препораките на Бернската конвенција и одлуките на Комитетот за светско наследство не е само неопходен предуслов за воспоставување на ефективна и ефикасна правна заштита на Охридското Езеро и Студенчишкото Блато кои подолго време се во алармантно лоша состојба, туку и неодвоив дел од стратегиската цел на Владата за владеење на правото и воспоставување на правна држава. Ставот на организациите е дека доколку Владата и надлежното Министерство не ги спроведуваат доследно Уставот и законите, правната држава не е ни на повидок“, велат организациите.
Барањето го потпишаа Фронт 21/42, Центар за правни истражувања и анализи, Македонско здружение на млади правници, Граѓанска иницијатива Охрид ЅОЅ, Институт за комуникациски студии, О2 ИНИЦИЈАТИВА, Центар за истражување и креирање политики, ЕКО-ЖИВОТ, Движење на екологисти на Македонија, Новинари за човекови права, Балканска водна мрежа, ЕКО ЛОГИК, ЕЗ Здрава Котлина – Струмица, Национален ромски Центар Куманово, Институт за демократија, Здружение за социјални иновации и одржлив развој РАДАР и Го Сакам Водно.
Македонија
Николоски-Јанош Лазар: Изградба на брза пруга и квалитетно поврзување со земјите од Централна Европа е приоритет
Заменик претседателот на Владата и министер за транспорт Александар Николоски, денеска во Охрид оствари билатерална средба со министерот за градежништво и инвестиции на Унгарија, Јанош Лазар.
Средбата е дел од работната посета на Македонија од страна на делегацијата на Владата на Унгарија која ја предводи премиерот Виктор Орбан.
Во фокусот на средбата беше изградба на брза пруга на Коридор 10 и квалитетно поврзување на Скопје со Будимпешта, односно поврзување на Македонија преку брза пруга со пристаништата во Грција и со земјите од Централна Европа.
“Ова е проект што ќе донесе големи придобивки за сите земји од регионот, ќе го зајакне економскиот развој и соработка меѓу земјите и ќе овозможи сигурен и брз транспорт на патници и производи. Го фаќаме последниот чекор Македонија да се приклучи на напредните технолошки достигнувања во железницата во регионот и затоа овој проект е приоритетен, не само за нас туку за сите земји долж Коридор 10”- истакна заменик претседателот на Владата и министер за транспорт Александар Николоски.
Министерот Николоски ја потенцира важноста на поддршката на земјите од Европската Унија за реализација на еден ваков проект бидејќи како што нагласи, брзата пруга е услов за економски развој и подобра комуникација за сите земји од регионот.
На средбата се разговараше и за искустава и практики што се применуваат во двете земји во различни сегменти на транспортот, градежништвото и инвестициите.
Министерот исто така информираше и за забрзаните активности за реализација на крупните капитални проекти во Македонија. Тој изрази благодарност за економската поддршка од Унгарија кон нашата земја, потенцирајќи дека средствата од заемот веќе се насочени кон општините за реализација на инфраструктурни проекти.
“Билатералните односи со Унгарија ни се на одлично ниво. Унгарија како дел од Европската Унија е стратешки партнер на Македонија и голем подржувач во реализација на стратешките цели на земјата и во делот на политичките и во делот на економските развојни политики” – истакна Николоски по средбата.
Двајцата министри се согласија на интензивирање на соработката и унапредување на политиките кои се однесуваат на регионалното поврзување.
Македонија
Билатерална средба на министерот Панче Тошковски со унгарскиот колега Шандор Пинтер
Министерот за внатрешни работи Панче Тошковски, денеска во Охрид оствари билатерална средба со министерот за внатрешни работи на Република Унгарија, Шандор Пинтер.
На средбата беше разговарано за повеќе прашања од заеднички интерес на двете држави, особено за соработката во борбата против илегалната миграција и криминалот со криумчарење на лица.
Беше потенцирана потребата за продлабочување на соработката помеѓу Центарот за обука на МВР и унгарското полициско училиште за спроведување на законот во делот на спроведување на заеднички обуки.
Исто така, министерот Пинтер упати покана до министерот Тошковски да уќествува на претстојната конференција на министри за внатрешни работи во рамки на Будимпештанскиот процес, која ќе се одржи во Будимпешта во ноември оваа година.