Македонија
ВМРО-ДПМНЕ: Ковачевски нека си испечати уште една оставка како таа што му ја искинал Џафери

Штом Ковачевски и Владата велат дека имаат мнозинство за уставни измени, ги повикуваме час поскоро до Собранието да ја поднесат иницијативата за промени на Уставот. Ковачевски вели дека имал храброст и ако таа храброст не ја изгубил некаде по пат или ако не му ја чуваат заклучена во фиока, нека се одважи и нека се појави во Собранието со овој предлог, велат од ВМРО-ДПМНЕ преку соопштение.
„Патем кога Ковачевски ќе ја поднесува иницијативата за уставни измени нека си испечати една оставка со истата содржина која ја подготвил минатиот пат, но која му ја искинал Талат Џафери. Таа оставка очекуваме да ја поднесе веднаш по гласањето во собранието, кога ќе се утврди дека власта нема двотретинско мнозинство, а со тоа нема ни услови за отпочнување на постапката за промена на Уставот.
Џабе одолговлекуваат, џабе сеат магла, џабе купуваат време. Под овие услови и под ваков диктат уставни измени нема да има, затоа што ВМРО-ДПМНЕ и народот тоа нема да го дозволат.
Без одлука на Собранието неуставна и без мандат е и работат на телото на партиските експерти од владејачките партии кои ги трошат народните пари за хонорари. Овие наводни експерти го претворија нивното тело во желботека и џубокс за идеи, кои водат дури и до редефинирање на унитарниот карактер на Македонија.
Со други зборови власта си прави есап без народот и затоа е реакцијата на јавноста и на граѓаните. Власта треба да види, ако веќе не видела, дека со својата самобендисаност и полтронство постојано удираат во ѕид и ја носат државата во ќорсокак. Тоа мора да се промени и ќе се промени, оваа криминална власт ќе биде казнета“, се наведува во соопштението на ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Параглајдинг несреќа на Галичица: државјанин на Германија доживеа тежок пад од поголема височина

Планинската спасителна служба Охрид извести дека вчера, околу 18:30 часот, добила повик од група параглајдеристи кои летале од падините на Галичица.
Тие пријавиле дека нивниот пријател, државјанин на Германија, од засега непознати причини доживеал тежок пад од поголема височина, на исклучително непристапен и карпест терен.
„За голема среќа, тројца спасители на ПСС во тој момент престојуваа во планинарската куќа „Спиридон“, каде е лоцирана и спасителната станица на ПСС, опремена со специјализирана техничка опрема за интервенции во овој регион. Веднаш по дојавата, екипата за само 15 минути стигна до местото на несреќата, изврши имобилизација на повредениот и започна комплексен транспорт по стрмен и тежок терен. Дополнителна отежнувачка околност беа и ноќните услови во кои се одвиваше целата акција.
По повеќе од еден час напорна интервенција, во 20:20 часот, повредениот беше безбедно спуштен до асфалтниот пат кај превојот Баба, каде беше предаден на екипа на Итната медицинска помош од Охрид. Од таму, тој веднаш беше пренесен во Специјалната болница за ортопедија и трауматологија „Св. Еразмо“, каде, за жал, му беа констатирани фрактури на пет пршлени во долниот дел на рбетот“, велат од Планинската спасителна служба.
Македонија
(Фото) Герасимовски: Со новата механизација го исчистивме сметот во Центар

Градоначалникот Горан Герасимовски, информира дека во текот на вчерашниот ден хигиеничарите од општината со новата механизација за чистење го собраа целиот смет од улиците во Центар.
„Целиот смет е собран од центарските улици. Нашите вредни хигиеничари вчера чистеа и во населбата Кале, а потоа со цистерна ги миеја улиците. Самите го исчистивме Центар, додека Град Скопје и ЈП „Комунална хигиена“ го преплавија цело Скопје со смет. Им благодарам на хигиеничарите што секојдневно се на терен, неуморно работејќи за наша почиста општина“, рече Герасимовски.
Македонија
Муцунски во Њујорк: Активна агенда со билатерални и мултилатерални средби

Шефот на македонската дипломатија, Тимчо Муцунски, во рамки на учеството на 80. Генерално собрание на Обединетите Нации во Њујорк, оствари низа билатерални средби и учествуваше на значајни мултилатерални настани.
Во одвоени средби со неговите колеги – министерот за надворешни работи на Кипар, Константинос Комбос, и министерот за надворешни работи на Султанат Оман, Сајид Албусаиди – беше потврдена заложбата за понатамошно унапредување на односите. Со министерот Комбос акцентот беше ставен на поддршката за европската интеграција и улогата на Кипар како земја-членка на ЕУ, која од јануари 2026 година ќе го преземе претседавањето со Унијата. Во разговорите со министерот Албусаиди, пак, фокусот беше насочен кон развој на билатералната соработка, особено во областа на трговијата и економијата.
Муцунски учествуваше и на Првиот биенален Самит за одржлива, инклузивна и отпорна глобална економија, каде ја нагласи улогата на Обединетите Нации во справувањето со глобалните предизвици и ја истакна посветеноста на државата кон спроведување на Целите за одржлив развој, усогласени со Националната стратегија за одржлив развој.
На покана на италијанскиот министер за надворешни работи, Антонио Тајани, министерот Муцунски присуствуваше и на работниот појадок со групата „Пријатели на Западен Балкан“, каде се разговараше за европската перспектива на регионот, стабилноста и регионалната соработка. Муцунски нагласи дека земјата останува цврст и конструктивен партнер на Европската Унија – посветена на реформите, владеењето на правото и економскиот раст, известува Министерството за надворешни работи.