Македонија
(Видео) ВМРО-ДПМНЕ му го спаси гласот на Вангеловски во Судскиот совет

На денешната седница на Комисијата за политички систем се расправаше за дисциплинската одговорност на судовите. Предлогот за измените во овој закон, кои се поставени во три дела, се поднесени од Министерството за правда и се усогласени со опозицијата. Во Законот за Судскиот совет најголемата измена е во делот на одземање на правото на глас на претседателот на Врховниот суд.
„Министерството за правда смета дека покрај министерот за правда, кој нема право на глас во Советот, право на глас не треба да има ни претседателот на Врховниот суд. Тука не успеавме да се усогласиме со опозицијата и му го вративме правото на глас на претседателот на Врховен, со тоа што во големиот пакет-измени за Судскиот совет, кој ќе следува јуни и јули, каде што ќе се утврдува мандатот на членовите, повторно ќе се размислува за правото на глас на претседателот на Врховен суд“, рече заменик-министерот за правда, Оливер Ристовски.
Законите за кривичната постапка и за Јавното обвинителство денеска не се најдоа на дневен ред на Комисијата за политички систем затоа што тие веќе се во парламентарна процедура, објасни Ристовски по што додаде дека измените во овие закони се мали и прецизни.
„Во Законот за кривичната постапка измените се за ПИМ-мерките, но се работи за кратки и прецизни измени што не беа денеска предмет на расправа бидејќи веќе се во парламентарна процедура. Ова гласање требаше да се одржи минатата недела, но се одложи поради внатрепартиско усогласување кај опозицијата“, рече Ристовски.
Тој информира дека овие закони ќе одат на Венециската комисија по што ќе видат што ќе се случи. Доколку во јуни од Комисијата добијат забелешки, законите повторно ќе бидат предмет на разгледување.
„Овие закони се дел од планот 3-6-9, дел од усогласувањето со забелешките на Прибе, но најмногу со забелешките од Венециската комисија од 2015 година. Европа ги бара овие закони, го бара и третиот голем сет во кој е потребно подлабока анализа поради тоа што ќе се смени целиот концепт на работата на Судскиот совет. Членовите што се избрани да судат, а повремено да одат на седници на Советот, а петте члена избрани од Собранието да си ја работат својата работа и меѓу нив не може да има активни судии и да доаѓаат само на седниците на Советот“, рече заменик-министерот.
Тој исто така информира дека сетот закони за Јавно обвинителство и за Советот на јавните обвинители со странски експерт во нацрт-форма ќе се работи оваа недела, а потоа работните групи при Министерството за правда ќе изработат нацрт и предлог-верзија на двата закона. Доколку се одлучиме избирањето да биде двотреитнско, тоа ќе влезе во Законот.
Реформите во судството ќе траат, не е само до законите, тие не беа лоши и претходно, ова се само доусовршувања на законите, кои, сепак, не можат да ги сменат судиите. Се надеваме дека судиите сами ќе сфатат дека треба да бидат сменети и дека треба да судат во интерес на граѓаните на Република Македонија, рече Ристовски.
Виктор Јованов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
СДСМ: Милионски тендер oд МВР доби советник на ВМРО-ДПМНЕ

МВР во функција на партиски бизниси, оценува СДСМ, коментирајќи случај со милионски тендер кој го добил советник на ВМРО-ДПМНЕ.
„Под раководство на Панче Тошковски, МВР доделило милионски тендер за организирање возачки испити во Пелагонискиот регион на новооснована фирма „Супер Возач“, зад која стои функционер на ВМРО-ДПМНЕ, советникот во Општина Кичево – Филип Митрески. Оваа фирма е регистрирана само три месеци пред распишување на тендерот.
Смрди на корупција и на претходно договорени дилови. На ваков начин практично фирмата добива монопол врз профитабилен бизнис од јавен интерес – сите полагања во Битола, Прилеп и Ресен. Станува збор за сериозни индиции дека тендерот бил однапред наместен, дека целата процедура е креирана за да се обезбеди профит за партиски блиски структури“, велат од СДСМ.
Како што додаваат, ваков модел на доделување јавни услуги – на нови фирми без искуство, контролирани од партиски кадри – претставува класичен партиски грабеж.
СДСМ и претходно обвини за сомнителен тендер во МВР со набавка на униформи.
Партијата итно бара од Државната комисија за спречување на корупцијата да отвори предмет и да испита целиот процес, а Основното јавно обвинителство да покрене постапка по допрен глас.
Македонија
„Влен“: Бришењето на дијаспората од пописот е тешко предавство, ДУИ не може да се крие зад молкот

Повеќе од 20 години на власт, ДУИ со своите деструктивни политики не донесе развој, туку иселување. Не само што ги натера стотици илјади Албанци да емигрираат, туку со пописот на населението во 2021 година ги избриша и оние што останаа. Пописот се претвори во средство за намалување на реалноста на Албанците во државата, додека раководството на ДУИ, како и секогаш, одбра да молчи пред уште едно ново политичко злосторство, обвини Дритон Сулејмани од коалицијата ВЛЕН.
Тој рече дека албанскиот народ бара одговори зошто било прифатено од нивна страна дијаспората да се третира како „нерезидентна“, кога токму таа, како што рече, ја одржува економијата и ги помага семејствата во секојдневието?
„Следните примери на манипулација се јасни и документирани, особено во струшкиот регион: Во селото Радолишта се регистрирани само 1.344 жители над 18 години, додека на изборите во 2024 година гласале 2.397 граѓани, или повеќе од 1.000 разлика. Во Велешта се регистрирани 2.196 жители, а гласале 2.377, речиси 200 повеќе. Во Ливадија, исто така, има повеќе гласачи од што регистрирани жители. Со вакви потези ли мислевте да го намалите бројот на Албанците во државата?“, праша Сулејмани.
Тој рече дека се поставуваат и други прашања на кои ДУИ никако не смее да молчи: зошто била потпишана методологија што го намалува бројот на Албанците во земјата, зошто не се заштитил придонесот на дијаспората во животот на оваа држава и зошто ДУИ прифатиле Албанците надвор од земјата да се одделат од остатокот на народот?
„Овие зошто не се само прашања, тие се обвиненија што тешко паѓаат врз тие што го искористија пописот за партиски интереси. Ако ДУИ мисли дека ќе го помине ова со молк, тешко се лаже, затоа што ВЛЕН нема да престане да ги открива вистините што се покриени преку овие измами“, рече Сулејмани.
Македонија
(Видео) СДСМ: Превоз на ученици што чини 50 денари градоначалникот на Карбинци го наплаќа 1.013

ВМРО-ДПМНЕ прави грабеж и во Карбинци, превоз на ученици што чини 50 денари градоначалникот го наплаќа за 1.013 денари, обвини Јордан Насев од СДСМ, претседател на ОО Карбинци.
„Ja алармираме јавноста и надлежните институции за скандалозното, коруптивно и расипничко трошење на јавните пари во општина Карбинци, под раководство на градоначалникот од ВМРО-ДПМНЕ, Виктор Паунов. Денеска го објавуваме првиот скандал, малверзации со превозот на ученици. За неполни четири години, локалната власт предводена од ВМРО-ДПМНЕ и градоначалнкот Паунов потрошила речиси 500.000 евра за превоз на ученици во основното образование. Скандалот е во тоа што превозот се врши по цени 20 пати повисоки од реалните“, рече тој.
Насев вели дека превоз со Јавното претпријатие Стипион на релација од село Нов Караорман до село Карбинци чини 50 денари, дневен билет во двата правци, а во тендерот за превоз на ученици распишан во учебната 2023/2024 година од општината превоз на едно дете дневно наплаќаат 1.013 денари.
„За одредени релации, еве на пример од Горни Габер до Радање општината наплаќа 1.878 денари или 30 евра дневно. Повторувам, за еден ученик, дневно. За 30 евра истиот превозник обезбедува превоз до Црна Гора во двата правци. Годишно, за еден ученик тоа се 332.640 денари или околу 5.000 евра. 20 пати над реалната сума. Ова е мега скандал. Ова е класичен грабеж на народот од страна на градоначалникот и локалната власт на ВМРО-ДПМНЕ“, рече тој.
Според Насев, овие милионски суми завршуваат во фирми блиски до ВМРО-ДПМНЕ, во што жителите на Карбинци сѐ почесто препознаваат класична злоупотреба на функцијата.
Тој кажа дека СДСМ бара сите надлежни институции да отворат постапки за криминал и корупција во Карбинци.