Македонија
(Видео) ВМРО-ДПМНЕ му го спаси гласот на Вангеловски во Судскиот совет

На денешната седница на Комисијата за политички систем се расправаше за дисциплинската одговорност на судовите. Предлогот за измените во овој закон, кои се поставени во три дела, се поднесени од Министерството за правда и се усогласени со опозицијата. Во Законот за Судскиот совет најголемата измена е во делот на одземање на правото на глас на претседателот на Врховниот суд.
„Министерството за правда смета дека покрај министерот за правда, кој нема право на глас во Советот, право на глас не треба да има ни претседателот на Врховниот суд. Тука не успеавме да се усогласиме со опозицијата и му го вративме правото на глас на претседателот на Врховен, со тоа што во големиот пакет-измени за Судскиот совет, кој ќе следува јуни и јули, каде што ќе се утврдува мандатот на членовите, повторно ќе се размислува за правото на глас на претседателот на Врховен суд“, рече заменик-министерот за правда, Оливер Ристовски.
Законите за кривичната постапка и за Јавното обвинителство денеска не се најдоа на дневен ред на Комисијата за политички систем затоа што тие веќе се во парламентарна процедура, објасни Ристовски по што додаде дека измените во овие закони се мали и прецизни.
„Во Законот за кривичната постапка измените се за ПИМ-мерките, но се работи за кратки и прецизни измени што не беа денеска предмет на расправа бидејќи веќе се во парламентарна процедура. Ова гласање требаше да се одржи минатата недела, но се одложи поради внатрепартиско усогласување кај опозицијата“, рече Ристовски.
Тој информира дека овие закони ќе одат на Венециската комисија по што ќе видат што ќе се случи. Доколку во јуни од Комисијата добијат забелешки, законите повторно ќе бидат предмет на разгледување.
„Овие закони се дел од планот 3-6-9, дел од усогласувањето со забелешките на Прибе, но најмногу со забелешките од Венециската комисија од 2015 година. Европа ги бара овие закони, го бара и третиот голем сет во кој е потребно подлабока анализа поради тоа што ќе се смени целиот концепт на работата на Судскиот совет. Членовите што се избрани да судат, а повремено да одат на седници на Советот, а петте члена избрани од Собранието да си ја работат својата работа и меѓу нив не може да има активни судии и да доаѓаат само на седниците на Советот“, рече заменик-министерот.
Тој исто така информира дека сетот закони за Јавно обвинителство и за Советот на јавните обвинители со странски експерт во нацрт-форма ќе се работи оваа недела, а потоа работните групи при Министерството за правда ќе изработат нацрт и предлог-верзија на двата закона. Доколку се одлучиме избирањето да биде двотреитнско, тоа ќе влезе во Законот.
Реформите во судството ќе траат, не е само до законите, тие не беа лоши и претходно, ова се само доусовршувања на законите, кои, сепак, не можат да ги сменат судиите. Се надеваме дека судиите сами ќе сфатат дека треба да бидат сменети и дека треба да судат во интерес на граѓаните на Република Македонија, рече Ристовски.
Виктор Јованов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мухамед Елмази до Арсовска: Ќе барате ли од вашите партнери да се откажат од бесправните објекти, ќе побарате ли и тука дигалка или ќе свртите глава

Мухамед Елмази од „Влен“ на прес-конференција денеска, упати неколку прашања до градоначалничката на Град Скопје, Данела Арсовска.
„Денес сме тука да поставуваме неколку прашања за госпоѓата Арсовска. Госпоѓа Арсовска дали знаете кој е сопственик на оваа зграда? Дали објектот е де факто на вашите коалициони партнери во Градот и во бизнисот?
На какво земјиште е изграден, на државно или приватно?
На чие земјиште е изграден – државно, општинско или приватно? Дали имало располагање со државно земјиште без валидна јавна постапка?
Кој е вистински сопственик на оваа зграда?
Дали во документацијата се води на друго име за да се сокрие вистинскиот сопственик?
Ако да, зошто инспекциските служби не отвориле постапка за лажно пријавување? Дали овој објект го има во урбанистичките планови?
Дали деталниот урбанистички план (ДУП) воопшто предвидува ваков објект на оваа парцела? Ако не, кој и кога дал согласност за отстапување од планот? Дали вие сте учесник во тоа?
Дали е спроведен инспекциски надзор од Општина Сарај? Дали Градежниот инспекторат има издадено решение за уривање или забрана? Ако не – зошто бројните пријави од локалното население останале без одговор“, праша Мухамед Елмази на денешната прес-конференција.
„Г-ѓо Арсовска, пред да продолжите да зборувате за „дивоградби“ и „заштита на јавниот интерес“, одговорете: ќе барате ли од вашите партнери да се откажат од бесправните објекти? Ќе побарате ли и тука дигалка или ќе свртите глава затоа што станува збор за ваш пријател и коалициски партнер? Попатно, прашајте го и Димитар Апасиев?
ВЛЕН ќе инсистира на: Итно постапување на сите градежни инспекциски служби; Итно постапување на финансиската полиција за откривање на скриениот имот за политичарите од ДУИ; Отпочнување кривична постапка за злоупотреба на службена должност и урбанистички криминал против Арсовска; Јавна објава на сите локации во Скопје каде фирми или лица поврзани со кланот на ДУИ градат или поседуваат диви објекти.
Доколку градоначалничката и надлежните служби продолжат да молчат, ќе ги искористиме сите правни и демократски механизми за да го заштитиме интересот на граѓаните. Ќе го спречиме ширењето на бизнис империјата на кланот на ДУИ, во која припаѓа веќе и Арсовска“, изјави Мухамед Елмази.
Македонија
Арсовска до Мухамед Елмази: Дали си ти криминалец од ДУИ или од ВЛЕН?

„Таман мислиш не може да демонстрираат поголем очај за криминалот во кој се фатени, тие наоѓаат нов првенец од ДУИ! Мухамед Елмази беше член на Совет на град Скопје во овој мандат и истакнат член на ДУИ до септември 2024 година, кога претрпе магична трансформација и стана ВЛЕН за да го постават директор на државното НОМАГАС“, напиша градоначалничката на Град Скопје, Данела Арсовска на социјалните мрежи.
„Вчера барав на седница да се зборува за нелегални дивоградби во сите 10 скопски општини, ама Мухамед, иницијативата за дивоградбите од Сарај твоите коалициски партнери од ВМРО ја покренаа и сами си ја повлекоа.
Изгледа си пропуштил вчера на седница на совет кога побарав да се испитаат незаконските легализации на дивоградби во сите скопски општини вклучително Чаир и Сарај. Затоа што сакаш да глумиш политичар и на национална база да го сведеш ВАШИОТ криминал, читај тука: ЈАС ЗБОРУВАМ СО ФАКТИ И ЗА СЀ ИМАМ ДОКАЗИ.
Сега Мухамед да те прашам:
1. Дали си ти криминалец од ДУИ или од ВЛЕН?
2. Дали знаеш дека од 150 дивоградби од Чаир кои ги имаме фатено и сме известиле во изминативе 3 години, знаеме во која имаш ГРАТИС стан и живееш во истиот.
3. Дали знаеш дека следен тој предмет ќе го носам во јавното обвинителство бидејќи империјата на ТВОЈАТА УРБАНА МАФИЈА ќе ја срушам и воопшто не ми е гајле од која партија доаѓа!“, додаде Арсовска.
Македонија
Сиљановска-Давкова ги прими акредитивите на новоименуваниот амбасадор на Република Кореја, Ким Донгбае

Претседателката Гордана Сиљановска-Давкова ги прими акредитивните писма на новоименуваниот амбасадор на Република Кореја со седиште во Софија, Ким Донгбае.
Посакувајќи му добредојде на амбасадорот Донгбае, таа изрази задоволство од пријателските односи и од конструктивната соработка меѓу двете држави, по воспоставувањето на дипломатските односи во 2019 година. Оцени дека постои волја и посветеност за искористување на потенцијалите и интензивирање на соработката во сите сфери од заемен интерес.
Претседателката ја посочи важноста од развојот на соработката, потенцирајќи дека корејската економија нуди големи можности за партнерство во повеќе области, особено во информатичката технологија, дигитализацијата и обновливите извори на енергија, а од друга страна, нашата држава со стратегиската локација во срцето на Балканот, нуди поволни услови за корејските инвеститори и компании.
Таа изрази уверување и подготвеност за натамошен развој на соработката на мултилатерален план, особено во рамките на Обединетите нации. Малите и средни земји, според неа, треба да дејствуваат единствено, можат да понудат знаење и заслужуваат да имаат посилна улога во одлучувањето за глобалните прашања.
Обајцата ја истакнаа потребата заеднички да работат на отворање на резидентни амбасади во Скопје и во Сеул.
Сиљановска-Давкова, во духот на начелото на реципроцитет, побара да се укинат визите за македонските граѓани, со оглед на фактот на нивното непостоење за граѓаните на Република Кореја.
Амбасадорот Донгбае оцени дека по воспоставувањето на дипломатските односи пред шест години, двете држави станаа успешни партнери и изрази спремност за нивно продлабочување и проширување. Тој го посочи развојот на економската соработка како приоритет во неговата работа.
Претседателката Сиљановска-Давкова упати честитки по повод изборот на Ли Џе-Мјунг за нов претседател на Република Кореја на вчерашните вонредни претседателски избори.
На амбасадорот Ким Донгбае му посака успех во извршувањето на одговорната дипломатска мисија.