СДСМ во континуитет го понижува и потценува македонскиот народ. Наместо живот, Зоран Заев донесе чемер и јад, велат во соопштение од опозициската ВМРО-ДПМНЕ.

Оттаму додаваат дека граѓаните се чувствуваат несигурно и понижено, победи нема, а поразите на секое поле се секојдневие.

„Судството стана партиска преставништво на СДСМ, а реваншизмот и прогонот на политичките неистомисленици на Заев, негова основна цел. Заев однапред ги најавува пресудите по обвиненијата креирани од него. Македонската економија е пред колапс, а резултатите од неработењето на Владата се евидентни. СДСМ изработи една голема нула во економијата. Толкав е растот за 2017 година, а подеднакво очајни се и 0,1 процент за првиот квартал од 2018 година. Трагедијата е поголема бидејќи ова се случува во време кога економијата во регионот и во Европа расне со забележително темпо поради поволната бизнис-клима. Кај нас градежништвото е во слободен пад, а со себе повлекува надоле и огромен број други стопански гранки“, се наведува во партиското соопштение.

Од ВМРО-ДПМНЕ исто така додаваат и дека на меѓународен план Македонија е понижена со низа капитулантски договори, со кои Заев се откажал од сè што е македонско.

„Заев иако ветуваше и се колнеше во своите идни и минати поколенија дека ќе ги заштити името, идентитетот и јазикот, го потпиша капитуланскиот договор со Грција. Заев се откажа од името, идентитетот, историјата, јазикот и македонското малцинство во соседството“, стои во соопштението.

Од партијата воедно наведуваат дека на ненародната власт мора да ѝ се каже доста и ги покануваат сите граѓани на Република Македонија на протестен марш во Струмица, в недела со почеток во 13 часот, во паркот во Струмица.