Македонија
ВМРО-ДПМНЕ: Наместо на училишта и патишта, буџетот ќе се троши на двојазичноста

Социјалдемократскиот сојуз парите од буџетот, наместо за нови болници, училишта, градинки, патишта и објекти од полза за граѓаните, ќе ги троши за покривање на трошоците од двојазичноста. Ова го изјави Орце Ѓорѓиевски, член на Извршниот комитет на ВМРО-ДПМНЕ, на прес-конференција осврнувајќи се на економските последици кои, како што вели, би ги предизвикал штетниот закон.
„Неуставниот закон за двојазичност, кој парламентарното мнозинство, спротивно на забелешките на претседателот на државата, експертите и ставот на граѓаните, на сила го истурка во Собранието, ќе има огромни финансиски импликации врз буџетот на нашата државата. Сумата од 1,7 милион евра, што власта ја предвиде за имплементација на двојазичноста со буџетот за 2018 година, е само параван. Реалните трошоци ќе бидат далеку повисоки како за централните институции така и за институциите на локално ниво“, рече Ѓорѓиевски.
Според него, социјалдемократскиот сојуз крие од граѓаните колку пари би се трошеле за вработување преведувачи на албански јазик во Штип, Гевгелија, Струмица, Радовиш, Делчево и во другите градови од источниот и јужниот дел од државата, но и на сите гранични премини во државата.
„Социјалдемократскиот сојуз не кажува колку ќе чинат преведувачите и судските преводи во сите основни и апелациони судови во Република Македонија? Власта треба да одговори и колку пари ќе ги чини граѓаните изготвувањето нови униформи на полицијата, пожарникарите и на здравствените работници? Колку ќе чини изготвувањето на двојазичните пари во Република Македонија? Власта треба да им каже и на нотарите, извршителите, адвокатите, аптеките, мобилните оператори, дистрибутерите со електрична енергија и на други приватни субјекти што вршат работи од јавен интерес колку пари ќе треба да одвојуваат од својот буџет за имплементација на неуставната и штетна двојазичност. Колку секој од нас ќе треба да ја плати желбата на Зоран Заев по секоја цена да ја има поддршката на ДУИ“, рече Ѓорѓиевски.
Тој го повтори ставот на ВМРО-ДПМНЕ дека законот за употребата на јазиците е неуставен, штетен и практично неприменлив. Од опозицијата сметаат дека ставот на претседателот на државата да не го потпишува указот за прогласување на законот е државнички чин и единствено правилен чекор што може да се направи.
Ѓорѓиевски заклучи дека секое објавување на законот во „Службен весник“ повлекува и кривична одговорност.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Тројца повредни во пожарот во дискотеката „Пулс“ сè уште се во болница: еден во Истанбул, двајца во „Систина“

Тројца повредени во пожарот во дискотеката „Пулс“, при што загинаа 62 лица, веќе шести месец се на болничко лекување. Директорот на Фондот за здравствено осигурување, Сашо Клековски, рече дека еден од нив е во Истанбул, а двајца се во скопската болница „Аџибадем Систина“.
„Ме радува да спомнам дека за неколку дена бројот на повредени што се хоспитализирани се намали на тројца. Двајца пациенти се пуштени на домашно лекување, еден пациент од Истанбул се врати на 27 август и тој е на домашно лекување и еден пациент од Клиниката за пластична хирургија исто така е пуштен на домашно лекување. Во моментот на лекување во болнички услови останува еден повреден во Истанбул и двајца повредени во ‘Аџибадем Систина’. За жал, двајца сè уште се во тешка, но не критична состојба. Се надевам дека и таму борбата ќе биде успешна и ќе излезат закрепнати“, рече директорот Клековски денес при посетата на болницата во Кочани.
Освен тројцата, кои се на болничко лекување, двајца пациенти сè уште имаат потреба од повремени интервенции оти имаат отворени рани и тие се третираат во Кочани, а Фондот ги покрива контролите за шестмина повредени во болницата „Пирогов“ во Софија, Бугарија, настрана од физикалните терапии, кои редовно се вршат во кочанската болница.
Клековски извести дека пластичен хирург од Белгија направил процена на повредите кај пациентите со изгореници на лицето, вратот и на дланките.
„Имавме чест, дојде познат пластичен хирург од Белгија, кој правеше процена на повредените со изгореници на лицето, на вратот и на дланките. Тоа се осумнаесеттемина повредени со најсензитивни повреди за кои ќе треба подолготраен третман понатаму. Ние сме тука, ќе ја продолжиме поддршката и ќе направиме сè што е потребно повредените да излезат живи, здрави и убави“, рече директорот Клековски и уште еднаш потенцира дека закрепнувањето на повредените е борба на долги патеки.
Директорката на кочанската болница, Катерина Паниќ-Мирчовска, рече дека сè уште е рано за естетски зафати кај повредените, но доколку се неопходни зафати на функционалните делови, како што прстите и вратот, можни се корекции доколку има такви предлози. Паниќ-Мирчовска вели дека силиконските маски направени со 3Д-скениранње и печатење веќе се изработени и во наредниот период ќе ги добијат повредените со лузни на лицето и вратот, а за шест месеци повторно ќе прават набавка на нова компресивна облека.
Македонија
Мицкоски: Почнуваме со проектот за третата фаза од пругата кон Бугарија

„Тоа ќе биде од големо значење за нас како држава, за Македонија како целина, бидејќи на тој начин ќе ја потврдиме онаа наша цел, а тоа е да бидеме крстосница на два многу значајни паневропски коридори, коридорот 10 и коридорот 8“, вели Христијан Мицкоски претседател на Владата на Република Северна Македонија одговарајќи на новинарско прашање до каде се процесните подготовки за третата фаза од изградбата на железничката пруга.
„Третата фаза е во процес на развивање, би рекол. Битно е дека сите оние пречки коишто во минатото се случуваа, се надминати. Постигната е согласност со нашиот источен сосед. Нашиот дел, би рекол, со одлуката на Влада да се активира грантот, што значи техничка поддршка од страна на Европската инвестициона банка, подразбира дека и ние отпочнуваме со овој проект. Техничката поддршка значи ревизија на основниот проект, ревизија на целосната документација и потоа објавување на јавен повик за изградба и на третата фаза, со што практично ние ќе ја заокружиме целата делница, којашто е дел од коридорот 8, од Куманово до граница со Бугарија“, изјави премиерот Мицкоски.
„Од другата страна, исто така, процесот добро напредува, така што, со ова коридорот 8 ќе биде целосно исполнет.
Коридорот 10 знаете е дел од проектот којшто го имаме со Владата на Обединетото Кралство, и тука сме во напредна фаза. Така што убави вести, убави моменти ќе има за Македонија и граѓаните во периодот којшто следи“, нагласи Мицкоски.
Македонија
И без документи, оние што се сомневаат дека биле непотребно оперирани нека поднесат претставка, повика Клековски

Сите што се сомневаат дека биле непотребно оперирани по скандалот дека се правеле операции на срце само за да се извлечат пари, треба да пријават. Директорот на Фондот за здравствено осигурување, Сашо Клековски, вели дека и по објавата на скандалот, кај нив нема претставки за непотребни операции.
„До средата немаше ниедна пријава или претставка за евентуална непотребна операција. Ги повикуваме сите пациенти што се сомневаат, без разлика дали имаат документи или не, да поднесат претставки. Документите за операциите се чуваат во архивите на болниците“, повика директорот Клековски.
Скандалот со наводно непотребни кардиохируршки интервенции во приватни болници во Скопје го обелодени кардиологот Сашко Кедев, кој јавно обвини дека кај пациенти без медицинска потреба се вршеле операции на срце, исклучиво поради финансиски интерес.
Сомневањата ги насочи кон приватните клиники „Жан Митрев“ и „Аџибадем Систина“, кои ги отфрлија тврдењата и рекоа дека работат според утврдени медицински протоколи и дека секоја интервенција е документирана и оправдана. Клиниките посочија дека се отворени за соработка со надзорните тела и ги поддржуваат сите иницијативи за транспарентност и контрола.
По наводите за непотребни операции, Министерството за здравство формира две комисии за расчистување на случајот. Едната е интерна, составена од лекари, претставници од Фондот, правници и економисти, која има задача да ги анализира сите кардиолошки и кардиохируршки операции во земјата во периодот од јануари 2023 година со август 2025 година. Втората комисија е меѓународна, составена од тројца лекари, кои ќе извршат надзор и во приватните и во јавните здравствени установи.