Македонија
ВМРО-ДПМНЕ: Народот нема за леб, а Заев ја поскапува струјата
Државата е во рецесија, народот нема за леб, а Заев ја поскапува струјата за да има за негов џеб, велат од опозициската ВМРО-ДПМНЕ.
Во партиското соопштение се наведува СДСМ ја одвеле државата во рецесија, а неспособноста на власта предизвикала пад од 12.7% на БДП во вториот квартал во 2020 година. Пад бележат и индустријата, и увозот и извозот, а невработеноста е зголемена за 40.000 лица, граѓани кои ги изгубиле своите работни места.
„Рецесијата се очекува да продолжи и во третиот квартал. Како што пишува реномираната Фајнанс тинк третиот квартал ќе го завршиме со минус 4.7%, а во негатива ќе биде и целата година, која ќе ја завршиме со 3.8% пад. Тоа значи нови потреси, нови отпуштања од работа и многу нови семејства кои ќе се соочат со егзистенцијални проблеми. Во услови кога неколку десетици илјади се борат за гола егзистенција, а 100.000 граѓани живеат со по под 50 денари на ден владата на Заев ја поскапува струјата.
Така поскапената струја оди за профит, кој преку универзалниот снабдувач завршува во тендери за обезбедување на имот и лица кои ги добива струмичка агенција за обезбедување, додека другиот дел завршува во РЕК, каде преку услуги за транспорт и ископ струмички камиони и машини вршат работи, кои сам РЕК може да ги заврши доколку власта смогне сили да ги пресече бизнис каналите и набави опрема и механизација, наместо да плаќа поскапо на приватни фирми.
Владата буквално зема од народот за да може Заев да стави во џеб.
Македонија со СДСМ тоне секој ден. Владата, криминалот и мафијата во Македонија се едно исто. Колку повеќе остане Заев, толку полошо за Македонија. Оваа влада мора да падне“, додава ВМРО-ДПМНЕ во соопштението.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ВЛЕН: Целосна поддршка за пратеничката Мимоза Муса, покажа висок политички и институционален интегритет во чувствителен период

„ВЛЕН ја изразува целосната поддршка и благодарност за принципиелниот и непоколеблив став на пратеничката Мимоза Муса, која покажа висок политички и институционален интегритет во чувствителен период за албанската политичка сцена во земјата“, велат од ВЛЕН.
„Пратеничката Муса, избрана претставничка од редовите на Алијансата за Албанците, остана лојална на волјата на 107 илјади албански граѓани кои му дадоа доверба на овој коалиционен блок со цел да донесе промени и да отвори ново поглавје на чесно политичко претставување.
Нејзиниот став е јасен доказ дека претставувањето во Собранието не е само политички мандат, туку мисија во служба на граѓаните, на вистината и на стремежот за длабока реформа на албанската политика.
ВЛЕН потврдува дека единството, принципите и лојалноста кон граѓаните се темелот врз кој ќе ја изградиме нашата политичка иднина. Нашите пратеници, без исклучок, се обврзани да ги застапуваат граѓанските интереси и да се држат далеку од каков било компромис што е во спротивност со волјата на слободниот глас.
Јавно ѝ се заблагодаруваме на г-ѓа Муса и ѝ посакуваме понатамошен успех во достоинственото претставување на интересите на албанските граѓани“, се наведува во соопштението на ВЛЕН.
Македонија
Градоначалникот Ѓорѓиевски на одбележувањето на Националниот ден на Власите

Градоначалникот на Општина Кисела Вода, Орце Ѓорѓиевски, вечерва присуствуваше на Свечената академија што се одржа во Македонскиот Народен театар по повод 120 години од официјалното признавање на Власите како посебен народ.
На настанот беше присутен државниот врв, претставници на институции, организации и бројни членови на влашката заедница во Македонија.
„Влашкиот народ има длабоки историски корени и значајна трага во македонското културно и општествено ткиво. Со својот труд, со својата култура и посветеност, тие оставиле и сѐ уште оставаат длабоки траги во економскиот, културниот и општествениот развој на нашата држава.
Ова е ден кога се потсетуваме дека секоја етничка заедница е непроценлив дел од мозаикот на македонската државност. И токму затоа, наша обврска како институции е да продолжиме да создаваме општество во кое секој ќе се чувствува виден, вреднуван и подеднакво вклучен.
Горди сме што Општина Кисела Вода е дом и на бројни припадници на влашката заедница и ќе продолжиме да ги поддржуваме сите иницијативи што водат кон градење на почит, соработка и траен соживот“, изјави градоначалникот Ѓорѓиевски.
Македонија
Сиљановска-Давкова во базиликата „Сан Клементе“ во Рим присуствуваше на молебенот во чест на Свети Кирил

Претседателката Гордана Сиљановска-Давкова во базиликата „Сан Клементе“ во Рим присуствуваше на молебенот во чест на Свети Кирил и се поклони на гробот на сесловенскиот просветител.
Молебенот, на којшто присуствуваа членовите на државно – црковната делегација, претставници од дипломатскиот кор и други гости, го отслужија владиката Јосиф и владиката Јаков со претставници на Македонската православна црква — Охридска архиепископија.
Поклонението на гробот на Свети Кирил во базиликата „Сан Клементе” во Рим, првпат е организирано во 1969 година по повод 1100 години од неговата смрт. Оттогаш секоја година, на 24 мај, со највисоки почести се одбележува во присуство на македонска државно – црковна делегација.