Пратениците на СДСМ и парламентарното мнозинство уште еднаш покажаа дека немаат слух за реалните проблеми и потреби на земјоделците. На вчерашната седница на Собранието на Република Македонија пратениците на парламентарното мнозинство предводено од СДСМ не го поддржаа донесувањето на предлог-законот за изменување и дополнување на Законот за земјоделство и рурален развој по скратена постапка и уште еднаш ги разочара земјоделците, соопшти пратеничката група на ВМРО-ДПМНЕ.

„Овој предлог закон пратениците од ВМРО-ДПМНЕ и колицијата го поднесоа по барање и во консултации со сите земјоделци. Со ова законско решение ќе се решат дел од секојдневните проблеми и предизвици со кои се соочува оваа категорија граѓани. Со предложениот закон за изменување и дополнување на Законот за земјоделство и рурален развој ќе се обезбеди поголема сигурност при откупот на земјоделските производи, ќе се воспостави обврска за склучување договор пред откупот на земјоделските производи, ќе се воведе обврска за навремено истакнување на откупните цени за винското грозје и ќе се изврши прецизирање на условите и роковите за исплата на винското грозје, како и субвенционирањето на откупувачите во услови на дисбаланс на пазарот“, се вели во соопштението.

Дополнително, велат од ВМРО-ДПМНЕ, за решавање на најголемиот проблем со исплатата на откупените земјоделски производи се предлага зајакнување на основниот рок на исплата од 30 дена од денот на извршениот откуп и се воведува субвенционирање на каматна стапка, односно намалување на каматната стапка на кредити наменети за земјоделството со што се обезбеди полесен пристап за финансирање за земјоделците.