Македонија
ВМРО-ДПМНЕ: Скандалот со локалот на Груби продолжува, дури и банката го проценила двојно поскапо од цената по која бил платен

СДС и Ковачевски нека не изигруваат адвокат на Груби, а Обвинителството да се прави слепо пред очигледниот скандал. Институциите и Владата треба први да се запрашаат како братот на Артан Груби стекнал луксузен имот на улицата Македонија по багателна цена, се вели во соопштението од ВМРО-ДПМНЕ.
Од партијата додаваат дека деловниот објект што семејството Груби го стекнало за речиси 100 илјади евра, односно за помалку од 650 евра за квадрат, самата банка што му го доделила кредитот го проценила истиот локал за 200.000 евра. Притоа банката прави процена со најниската цена за квадратен метар зашто така си ги штити своите пари, но дури и по таа процена, Груби го платил дуќанот двапати поевтино од најниската реална вредност.
Од ВМРО-ДПМНЕ велат дека ако Ковачевски се прави недоветен и не бара одговорност од својот заменик, тогаш и тој заедно со Груби ја потценува интелигенцијата на народот. Ова е класичен пример за политичка корупција, а постои основано сомнение дека Груби ја злоупотребил и својата функција и влијаел брат му да стекне таков луксузен имот по цена што другите граѓани може само да сонуваат.
Груби нека не продава некакви националистички приказни бидејќи овде не се работи за национализам, туку за корупција, па дури и за затаен данок. Ваквите криминогени зделки се на штета и на Албанците, и на Македонците, и на сите други, а се во интерес само на корумпираните функционери од власта, кои се богатат, се вели во соопштението.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Мемов: Дебар Маало е претворено во жртва на урбаното дивеење, Герасимовски е градоначалник со невино лице, без глас

Движењето ЗНАМ – За Наша Македонија на денешната прес-конференција објави уште еден, како што велат, урбанистички скандал во општина Центар.
Според портпаролот, Никола Мемов, Дебар Маало, симболот на култура, урбана традиција и живеење со душа во срцето на Скопје, денес е претворено во жртва на урбаното дивеење и апсолутната незаинтересираност на градоначалникот на Општина Центар, Горан Герасимовски.
„Пред само 2–3 недели никна нова нелегална градба, односно ресторанот „Мечка“ се прошири буквално преку ноќ, на простор кој е јавен: на тротоарот, па дури и зафаќајќи дел од коловозот.
Узурпиран е простор наменет за пешаци и за движење на граѓаните, простор кој треба да биде за сите, а сега е дел од приватен бизнис“, рече Мемов и запраша:
„Кој го дозволи ова? Кој дозволи во срцето на Дебар Маало, на неколку чекори од улицата „Орце Николов“, а на само 200 метри од кабинетот на самиот градоначалник, да се узурпира јавен простор и да се изгради дел од објект?
Дали воопшто градежниот инспекторат на Општина Центар постапил на терен?
Дали постои било каков документ, одобрение или решение – или ова е типичен пример на дивоградба, „пуштена“ да никне преку ноќ?
Дали ова е Општина Центар или Див Запад, каде секој си гради што сака и каде сака?
Кој ќе ја понесе одговорноста што објектот и понатаму стои, како симбол на беззаконие и селективна правда“.
Мемов потенцира дека ова не е прашање кое може градоначалникот Герасимовски да го сокрие со молк, затоа што се случува на улица, пред очите на сите и како што рече тој, и пред очите на Герасимовски, бидејќи тој секојдневно се вози со неговиот скап велосипед по улицата „Дане Крапчев“.
„Ова е буквално во Вашето маало, на неколку чекори од Вашиот дом.
Па, ако тука не реагирате, како граѓаните да веруваат дека ќе реагирате воопшто.
Ова е срамота. Ова е слика на една неспособна и незаинтересирана општинска власт, карактеристична за владеењето на СДСМ.
Жителите на Дебар Маало секој ден гледаат како јавните површини се претвораат во приватни имоти. Како зеленилото исчезнува. Како тротоарите се претвораат во маси и тераси. Како јавниот интерес исчезнува, а на негово место никнуваат бетон, стакло и пари.
Го прашуваме актуелниот градоначалник Герасимовски:
-Како ќе им погледнете во очи на вашите соседи, на луѓето со кои живеете во иста населба, од кои имено барате и поддршка за втор мандат?
-Што ќе им кажете на жителите на Дебар Маало – дека не можете да ги заштитите ни од дивоградба под вашиот прозорец?
Дека не сте виделе што се гради на само 200 метри од вашата канцеларија?“
Тоа што го гледаме денес, вели Мемов е деградација, потценување и отворено понижување на жителите.
Тој потенцира дека ова не е само проблем со една дивоградба кај националниот ррсторан „Мечка“, туку ова е симбол на начинот на кој четири години се владее во Центар.
Македонија
Медицинските сестри бараат да бидат слушнати, реагираат дека не биле поканети на јавна расправа со министерот

Унијата на медицински сестри бараат да бидат слушнати, реагираат дека не биле поканети на јавна расправа со министерот иако, како што велат од таму, претходно им било ветено дека ќе бидат вклучени во истата.
„Како претседател на најголемата и најактивна унија на медицински сестри во државата, остро реагирам на начинот на кој денес беше организирана јавната расправа поврзана со прашања што директно ги засегаат медицинските сестри.
Иако имавме официјална средба со министерот за здравство, на која јасно се договоривме Унијата на медицински сестри, предводена од здружението ЗМСТАС „За-нас“, да биде вклучена во работните групи, денес не бевме поканети. Ова го сметаме за директно игнорирање на реалните потреби и гласот на професионалците кои секојдневно се на терен и го носат товарот на здравствениот систем“, вели претседателката на Унијата, Гордана Бешлиовска.
Таа додава дека медицинските сестри заслужуваат да бидат слушнати — не преку формални претставници, туку преку вистински, активни и професионално организирани тела, каква што е нашата Унија.
Бешлиовска бара објаснување зошто е прекршен договорот со министерот и бара итно вклучување на легитимни и активни претставници на медицинските сестри во сите идни работни групи и јавни расправи.
„Апелираме до институциите да престанат со формални и политички решенија кои ја маргинализираат сестринската професија. Особено разочарува фактот што токму овие денови, додека државата нè игнорира, медицинските сестри од Македонија испишуваат историја. Овој викенд, во Струга, се одржа четвртиот меѓународен конгрес на медицинските сестри и Регионалната ЕСНО конференција, со повеќе од 80 предавања и со присуство на еминентни имиња од регионот, Европа и САД. Тоа беше настан од највисоко професионално и научно ниво, кој уште еднаш ја потврди посветеноста, компетентноста и лидерството на македонските медицински сестри на меѓународната сцена“, вели Бешлиовска.
Македонија
Се намалуваат цените на горивата

Цените на бензините и дизелот од ноќеска на полноќ ќе се намалат за денар и за денар и половина, соопшти Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ).
Од 7.10.2025 година од 00:01 часот максималните цени на нафтените деривати ќе изнесуваат:
Моторен бензин ЕУРОСУПЕР БС – 95 74,00 (денари/литар)
Моторен бензин ЕУРОСУПЕР БС – 98 76,00 (денари/литар)
Дизел гориво ЕУРОДИЗЕЛ БС (Д-Е V) 68,50 (денари/литар)
Масло за горење Екстра лесно 1 (ЕЛ-1) 68,00 (денари/литар)
Мазут М-1 НС 36,660 (денари/килограм)
Малопродажните цени на бензините ЕУРОСУПЕР БС-95 и ЕУРОСУПЕР БС-98 и на Екстра лесното масло за домаќинство на (ЕЛ-1) се намалуваат за 1,50 ден/лит.
Малопродажната цена на ЕУРОДИЗЕЛ (Д-Е V) се намалува за 1,00 ден/лит.
Малопродажната цена на Мазутот М-1 НС се намалува за 0,931 ден/кг и сега изнесува 36,660 ден/кг.