Македонија
ВМРО-ДПМНЕ: Филипче привремено го скрати зимскиот сон, па застана на страна на трговците кои делуваат како воени профитери

Добро е што Венко Филипче излезе од егзил и зимскиот сон го скрати привремено. Лошо е што се стави на страна на трговците кои делуваат како воени профитери, реагира ВМРО-ДПМНЕ по обвинувањата на лидерот на СДСМ дека премиерот Мицкоски е виновен за покачувањето на цените во маркетите.
Од ВМРО-ДПМНЕ велат дека Филипче не треба да зборува за кошнички и стандарди бидејќи е запаметен и како министер кој тргуваше со човечки животи и набавуваше респиратори и вакцини по сомнителни договори. Според владејачката партија тоа е исто како лисицата да зборува за безбедноста на кокошарникот!
„Седум години владеење на СДС беа години на распродажба на државните интереси, зголемување на долговите, инфлација и систематска кражба. Тие се главната причина зошто граѓаните денес се соочуваат со вакви економски предизвици кои макотрпно како Влада ги надминуваме. ВМРО-ДПМНЕ не само што реагираше веднаш за да ги заштити граѓаните од алчноста на трговците, туку и воведе механизми за контрола и казнување. За разлика од СДС, кој ги охрабруваше картелите и мафијата да печалат на маката на народот, ние преземаме акција. Неврохирургот на Заеви треба да ја наведне главата од срам за милионите евра украдени од тендери, а не да држи лекции за морал и економија“, се вели во реакцијата.
ВМРО-ДПМНЕ додава дека граѓаните нема да дозволат оние кои ги уништија да им држат лекции за морал.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Манасиевски: Филипче е послушник на Заев, кој сака да ги применува истите методи и шеми

„Дали методот евро за Вицето, е методот кој народот треба да го учи од Заев, според Филипче?
Дали Венко Филипче е воодушевен од Заев и тврди дека нема друг како него, заради начинот на кој рекетирал во Струмица?
Дали Венко Филипче е воодушевен од Заев, кој цела јавност го слушна како вели дека сите во Струмица на кои им легализирал објекти, плаќале по истата шема – евро за Вицето? Учи ли Филипче од Заев кој ја ограби Македонија, а после си донесе измени на Кривичниот законик со цел да не одговара за ништо?“, прашува Валентин Манасиевски, член на ЦК на ВМРО-ДПМНЕ.
Тој дополнително прашува и дали Венко Филипче се бори во политиката за власт, за да може да работи по методот на неговиот учител Заев – евро за Вицето.
„Добро е што Филипче јасно им даде до знаење на граѓаните, за никој да нема дилема, дека е ученик на Заев, негов послушник кој сака да ги применува истите методи и шеми, со кои ја опустошија Македонија“, додава Манасиевски.
Македонија
Уникатното охридско кајче претставено на Меѓународниот саем за наутика во Белград

Охридски „Зелен град“ го претстави уникатното охридско кајче со фотоволтаични панели и електичен мотор на Меѓународниот саем за наутика во Белград
Екоздружението „Зелен град“ од Охрид имаше забележително учество на Меѓународниот саем за наутика во Белград, Република Србија.
Се претставија со единствениот и уникатен експонат на саемот, традиционалното охридско кајче, на кое беа поставени фотоволтаични панели и иновативен електичен мотор.
„Бродскиот мотор е создаден со примена на напредната технологија на комбинирани намотки ‘славјанка’. Се карактеризира со голема моќност, што му овозможува да го движи кајчето без поголеми проблеми, со користење енергија од фотоволтаичните панели“, информираат од „Зелен град“.
На Саемот за наутика беа прикажани јахти, глисери, катамарани и мотори од најголемите светски производители.
„Меѓу нив нашето кајче беше единствено со поставени фотоволтаични панели, со електромотор и изработено од еколошки материјал – дрво и метал. Се планира да се направат уште неколку тестови со фотоволтаичните панели на Охридското Езеро и со тоа да се иницира транзиција на водниот транспорт до еколошки извори на енергија за зачувување на чистотата на водата, флората и фауната на езерото“, потенцираат од „Зелен град“.
Македонија
Одбележани 24 години од загинувањето на бранителите кај Вејце

Осуммина припадници на специјалната единица на МВР, од кои четворица битолчани, на денешен ден пред 24 години, загинаа во масакрот кај селото Вејце во конфликтот во 2001 година.
Во нивна чест пред споменикот на загинатите бранители во кругот на СВР Битола, споменикот „Ангел“ кај Саат-кулата и споменикот на Бошко Најдовски во Долно Оризари, свежо цвеќе положија градоначалникот на општина Битола, Тони Коњановски, претседателката на Советот, Габриела Илиевска, со претставници на Советот на Општината, полицијата, семејствата на загинатите, политичките партии и граѓаните.
Градоначалникот на општина Битола, Тони Коњановски, истакна дека Битола секогаш ќе се сеќава на Марјан Божиновски, Илче Стојановски, Кире Костадиновски и Бошко Најдовски, со должна почит за прерано загубените млади животи и болката што остана во нивните семејства.
„Денес, им оддаваме почит на нашите битолчани, четворицата херои што го дадоа животот бранејќи ја татковината во Вејце. Да укажеме уште еднаш дека опомена за нас, за сите генерации, за помладите, е тоа дека она што се случило никогаш повеќе да не се повтори затоа што само единството, разбирањето, меѓусебната почит и разговорот може да нè доведат до просперитет на оваа држава и овој град. Слава на хероите, слава на јунаците, слава на бранителите на нашата таковина!“, рече градоначалникот Тони Коњановски.