Македонија
Воздухопловната бригада на AРМ го одбележува Денот на единицата
Припадниците на воздухопловната бригада (ВБР) од составот на Здружената оперативна команда (ЗОК), со воена свеченост што се реализира во касарната „Страшо Пинџур“ во Петровец го одбележаа 10 јуни – Денот на единицата.

Заменикот на началникот на ГШ на АРМ, генерал-мајор Азим Нуредин, честитајќи им го денот, истакна дека сите нејзини припадници се оспособени и обучени за извршување на задачите што произлегуваат од специфичната мисија на оваа единица, вежби и мисии во рамките на НАТО-структурите, како и при справувањето со разни елементарни непогоди што ја погодија Република Македонија во минатото.

По краткиот историски осврт за бригадата, командантот на ВБР, полковник Роберт Малезански, во своето излагање пред присутните посочи дека напорите ќе се насочат кон извршување на службата на највисоко можно ниво и со најдобар квалитет, како и кон обновување и квалитетно одржување на техниката, која е од витално значење за извршување на мисијата на единицата и за обука на персоналот со цел одржување на постојано висока борбена готовност на оваа единица.

По повод денот на единицата беа соопштени наредби за унапредување, а пехар и преодно знаме за постигнување резултати во извршувањето на мисијата на единицата доби сквадронот за транспортни хеликоптери.

Во рамките на свеченоста се реализираа прелет на воздухопловите од ВБР и Центарот за обука на пилоти и изложба на материјално технички средства со кои располага единицата.
На одбележувањето на Денот на ВБР, покрај заменикот на началникот на ГШ на АРМ, генерал-мајор Азим Нуредин, присуствуваа генерали од АРМ, претставници од МО и ГШ на АРМ, команданти на команди и единици на АРМ, поранешни команданти и припадници на единицата и други гости од институциите со кои соработува бригадата.
Со одлука на претседателот на Република Македонија за определување денови на единиците на АРМ, за ден на ВБР е одреден 10 јуни со традиции на денот на првиот лет на македонски воен екипаж на Военото воздухопловство на АРМ во 1992 година.
Од почетокот оваа единица беше составена од авијациска бригада со авијациски, транспортен и борбен хеликоптерски сквадрон по што во 2005 година се трансформира во помала, покомпактна единица наречена воздухопловен ВИНГ (воздухопловна извидувачка напаѓачка група), која фигурира до 2012 година кога повторно се формира воздухопловна бригада во составот на Здружената оперативна команда.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Отворени гласачките места, граѓаните избираат градоначалници во 32 општини и Град Скопје
Денеска во земјава се одржува вториот круг од локалните избори, на кои граѓаните избираат градоначалници во 32 општини и во Град Скопје. Право на глас имаат 1 013 375 избирачи, од кои 474 304 гласаат и за градоначалник на главниот град.
Во првиот круг на 19 октомври беа избрани 44 градоначалници, а денеска се гласа во Центар, Карпош, Аеродром, Куманово, Кичево, Струга, Тетово, Пробиштип, Кочани, Валандово и други.
Гласачките места се отворени од 7 до 19 часот.
Изборниот процес го следат 1 598 набљудувачи – 933 домашни и 651 меѓународен. Државната изборна комисија најави дека првичните резултати ќе ги соопшти вечерва, околу 23 часот.
Вчера гласаа болните лица и затворениците, а гласањето се одвиваше непречено.
Македонија
Сончево време со температура до 23 степени
Претпладне по одделни котлини ќе има услови за појава на магла. Во текот на денот ќе биде сончево со мала до умерена облачност. Ќе дува слаб ветер од југоисточен правец. Минималната температура ќе биде во интервал од -1 до 7, а максималната ќе достигне од 18 до 23 степени.
Во Скопје, претпладне во делови од котлината ќе има слаба маглa. Преку денот ќе биде сончево со мала до умерена облачност. Ќе дува слаб ветер од југоисточен правец. Минималната температура ќе се спушти до 6, а максималната ќе достигне до 21 степен, јавува УХМР.
Во понеделник попладне, во текот на ноќта и во вторник ќе има повремени локални врнежи од дожд кои наместа ќе бидат пообилни. Ќе дува умерен до засилен северен ветер, а дневната температура ќе опадне за неколку степени. Од среда повторно се очекува стабилно и суво време.
Македонија
ДИК: Без неправилности помина денешното гласање на болните и затворениците, гласовите ќе се бројат утре
Денес се спроведува гласањето на болните или немоќни лица, лицата кои се на издржување на казна затвор или се во притвор и лицата кои се пријавиле за гласање, а се сместени во установите за вонсемејна грижа.
Гласањето на оваа категорија гласачи се одвива во општините каде се одржува вториот круг на локалните избори и Градот Скопје.
Од вкупно 4.826 болни или немоќни лица кои можат да го остварат своето право на глас на вториот круг од локалните избори, до 20:00 часот гласале 3327 гласачи. Во 14 казнено поправни установи, каде што своето право на глас можат да го остварат 1256 лица кои се на издржување казна затвор или притвор, до 18:30 часот гласале 588 гласачи. Од 214 лица сместени во установите за вонсемејна грижа до 18:30 часот гласале 125 гласачи.
Гласањето за сите овие категории на гласачи се одвиваше непречено и без никакви проблеми и недоследности.
ДИК известува дека резултатите од гласањето на болните и немоќните лица, затворите и домовите за стари лица, не се објавуваат денес посебно. Секое поединечно гласачко ливче е ставено во посебен затворен плик и во гласачките кутии и тие не се отвараат денес. Броењето на овие гласови и објавувањето на резултатите од денешното гласање се врши заедно со резултатите од целокупното гласање на изборите утре после 19:00 часот, за секое избирачко место и секоја општина каде што се гласа.

