Македонија
Во земјите од Западен Балкан има дезинформации и руско мешање, ЕУ треба да им помогне, вели француската министерка за Европа
Европската унија треба да им помогне на земјите да се спротивстават на Владимир Путин со испраќање јасна порака за нивните изгледи за приклучување кон ЕУ, изјави француската министерка за Европа, Лорен Бун за „Политико“.
ЕУ се подготвува за потенцијален бран на проширување што би можел да донесе дури осум нови членки, вклучително и Украина и шест балкански земји, во нејзините редови во наредните години.
Неколку од овие земји се главни цели на кампањите за руско влијание чија цел е да се поткопува поддршката на ЕУ и да се држат надвор од блокот – поради што ЕУ треба да биде „јасна и избалансирана“ за тоа што е потребно за да се приклучат, рече Бун, пренесе „Политико“.
„Во овие земји (кандидати) има многу дезинформации и мешање. Тоа е проблемот. Владимир Путин, покрај територијалните амбиции, има за цел и да ја ослабне Европската унија. Ова е фактор што треба да го земеме предвид и да се бориме против него“, рече таа.
Додаде дека ЕУ треба „да им помогне на овие земји да се борат против стратегијата за влијание (на Русија) што е можно повеќе, почитувајќи го нивниот суверенитет“.
Нејзините коментари доаѓаат една недела пред претседателката на Европската комисија, Урсула фон дер Лајен, да го одржи својот годишен говор за состојбата на Европската унија, во кој се очекува да го објасни темпото и начинот на планираното проширување на ЕУ.
Додека претседателот на Европскиот совет, Шарл Мишел, во својот говор рече дека ЕУ треба да има за цел да прими нови членки до 2030 година, Комисијата реагираше поинаку, велејќи дека секое пристапување останува „засновано на заслуги“.
Но, земјите-кандидати, заедно со новите членки на ЕУ, предупредуваат дека оставањето на земјите во „чекалната“ на ЕУ без јасен пат кон пристапувањето навистина ќе предизвика поделби и ќе го отвори патот за влез на Путин.
Висок дипломат на ЕУ за „Политико“ изјави дека од проевропските протести во Украина, Путин го гледа статусот на кандидат за ЕУ како „блескаво црвена“ цел за неговите обиди да ги поткопа Брисел и Западот. Молдавија, мала земја во сендвич меѓу Украина и Романија, се соочи со особено решителни напори од страна на Москва да ја поништи нејзината кандидатура за пристап во ЕУ.
Секое прекумерно одложување или статус од втор степен на патот кон целосен пристап во ЕУ ќе го охрабри Путин да се обиде да влијае на таквите земји, рече дипломатот, кој исто така го критикуваше предлогот на францускиот претседател Емануел Макрон за повеќебрзински пристап во ЕУ, во кој земјите ќе добијат делумни бенефиции пред стекнување полноправно членство.
Запрашана за таквите критики, Бун рече дека Макрон сака да им дозволи на земјите-кандидати да ги дефинираат нивните односи со ЕУ – како што некои направија со неприфаќањето на еврото или приклучувањето кон Шенген зоната за слободно патување – наместо ограничување на нивните избори.
„Доколку три земји сакаат да формулираат заедничка надворешна политика, дали мислите дека другите 24 би се чувствувале исклучени? Станува збор помалку за идејата да има граѓани од втор ред, а повеќе за задоволување на различни потреби без ограничување на амбициите да се направи повеќе“, рече Бун.
Додека фон дер Лајен го подготвува својот говор на 13 септември, а Комисијата подготвува извештаи за напредокот на земјите-кандидати подоцна во текот на годината, лобирањето за пристапување во ЕУ е во полн ек. Постојаните претставници на ЕУ минатиот петок имаа ручек со Фон дер Лајен и разговараа за проширувањето и внатрешните реформи.
„Најважно е постојано да се испраќа порака за местото на овие земји во ЕУ. Мора да се фокусираме на суштината. Се надеваме на прогресивна динамика каде што нема вообичаен замор и допрва ќе можеме да спроведеме реформи“, рече Бун.
И Тања Фајон за проширување на ЕУ
Министерката за надворешни и европски работи на Словенија, Тања Фајон оцени дека земјите од Западен Балкан треба со полна брзина да ја искористат можноста спомената на Бледскиот стратешки форум, во врска со проширувањето на ЕУ до 2030 година.
За изјавата на претседателот на Европскиот совет Шарл Мишел и дали двете страни навистина би можеле да бидат подготвени за проширување до тој датум, таа вели дека нејзиниот одговор на тие прашања е многу јасен.
„Можноста е тука и треба да ја искористиме со полна брзина. Треба да работиме на изнаоѓање доволна политичка волја во Западен Балкан за реформи и доволна политичка волја во ЕУ за проширување“, рече таа.
Како што вели, треба да се фокусираме на крајната дестинација, а притоа „да не го занемариме патувањето“.
– Кога станува збор за Европската унија, проширувањето на ЕУ несомнено е повторно на дневен ред. Геополитичкиот пејзаж јасно покажува дека нема алтернатива за проширувањето на ЕУ. Војната во Украина го зголеми апетитот за проширување и го потврди впечатокот дека проширувањето е стратешка неопходност за ЕУ. Едноставно кажано, сега е или никогаш – изјави таа.
Според Фајон, тоа секако не значи дека критериумите за проширување на ЕУ ќе бидат отфрлени и дека Западен Балкан би можел да влезе во унијата без нивно исполнување.
– Тоа значи дека ќе се посвети поголемо политичко внимание на регионот и дека од земјите од Западен Балкан ќе се бара што побрзо да ги исполнат критериумите. За ЕУ тоа значи само посветеност да го реформира процесот на одлучување и да се подготви во институционална и финансиска смисла на ЕУ – изјави таа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
На свечена церемонија, утре Пендаровски ќе и’ ја предаде функцијата на Силјановска-Давкова
Во Кабинетот на претседателот, утре – 12 мај ќе се одржи официјална церемонија на примопредавање на функцијата Претседател со највисоки државни и воени почести.
По свечената церемонија новоизбраната претседателка Гордана Силјановска Давкова и претседателот Стево Пендаровски предвидено е да остварат тет-а-тет средба.
Државната изборна комисија денеска и’ го издаде уверението за избран претседател на Гордана Силјановска-Давкова. ДИК ќе треба да достави извештајот до Собранието за да биде закажана седница за утрешната инаугурација на Силјановска Давкова. Потоа таа пред пратениците ќе треба да даде свечена изјава по која ќе почне нејзиниот мандат.
Мандатот на Пендаровски истекува утре.
Македонија
Aхмети тврди дека со челниците на „Вреди“ во јануари потпишале декларација дека ќе владеат само со партии што поддржуваат уставни измени
ДУИ тврди дека и првите луѓе на коалицијата „Вреди“ (Влен), со кои ВМРО-ДПМНЕ договара коалицирање во новата Влада, се потписници на декларација во која уверуваат дека ќе владеат заедно само со оние политички партии кои се согласуваат да ги поддржат уставните измени.
Лидерот на ДУИ, Али Ахмети на денешниот собир на претставниците и членството на коалицијата рече дека декларацијата била потпишана во јануари годинава.
Во неа, се наведува дека почетокот на преговорите со Европската Унија (ЕУ) носи стратешки и значајни придобивки за нашата земја, а потписниците со обединет глас се придружуваат да одговорат на итната потреба за решавање и стабилност во земјата.
„За овие цели ние како политички партии изјавуваме: ‘Ние, долупотпишаните политички партии, имајќи ја предвид состобата во која се наоѓа државата и должноста што jа имаме кон граѓаните, чувствуваме обврска да изјавиме дека сме целосно решени, сега и во иднина да соработуваме и да владееме заедно само со оние политички партии кои се согласуваат да ги поддржат уставните измени како услов за продолжуванье на процесот на интеграција на земјата во ЕУ. Потписи на партиски претставници (наредени по азбучен ред): Арбен Таравари, Африм Гаши, Али Ахмети, Билал Касами и Изет Меџити“, стои во документот што го прочита Ахмети.
Претпладнево се случи првата рунда на преговори помеѓу ВМРО-ДПМНЕ и Влен, по којашто партиите соопштија дека ги договориле општите начела за идната Влада, која ќе се базира на три постулати: евроинтеграции, забрзан економски развој, борба против криминалот и корупцијата и владеење на правото.
Од тука додадоа дека двете страни ќе формираат работни групи, на кое ниво ќе продолжат разговорите за коалицирање.
Во изборната кампања, ВМРО-ДПМНЕ и „Вреди“ излегоа со различни ставови за уставните измени, но во повеќе наврати беше потенцирано дека разговорите на таа тема ќе бидат ставени на маса по завршувањето на изборите.
Македонија
„Договорени се општите начела за идната Влада“ – заврши средбата на ВМРО-ДПМНЕ со Влен
Денеска беше остварена средба помеѓу ВМРО-ДПМНЕ и ВЛЕН. Од страна на ВМРО-ДПМНЕ беа присутни претседателот Христијан Мицкоски, потпретседателите Александар Николоски, Владо Мисајловски, Тимчо Муцунски и Гордана Кочоска Димитриеска, како и шефот на кабинет на претседателот Владимир Нелоски, од страна не ВЛЕН беа присутни Арбен Таравари, Изет Меџити, Биљал Касами и Африм Гаши.
„Договорени се општите начела на соработка за идната влада, која ќе се базира на три постулати: евроинтеграции, забрзан економски развој, борба против криминалот и корупцијата и владеење на правото“, објави ВМРО-ДПМНЕ по средбата.
Заклучено е дека двете страни ќе формираат работни групи, на кое ниво ќе продолжат разговорите до нивно финализирање.