Македонија
Во Карпош се финализира проект за еко-населба која ќе се простира меѓу Злокуќани и Бардовци

Општина Карпош е во финална фаза на подготовка на проектот за изградба на првата еко-населба во Република Македонија. Истата е предвидена да се простира на потегот меѓу Злокуќани и Бардовци.
По средба што ја имаше во ноември (2017), градоначалникот Стефан Богоев, денеска имаше можност да се запознае со напредокот на проектот и да се запознае со новостите на тој план со присутните гости, учесници во проектот Cool Heating.
„Она што е значајно е дека, населбата ќе користи обновливи извори на енергија кои ќе ги заменат традиционалните начини на греење и ладење кои предизвикуваат загадување на животната средина“, информираат од општината.
Градоначалникот Богоев извести дека има нов урбанистички момент кај делот меѓу Бардовци и Злокуќани, а тоа е изградбата на новиот Клинички центар. Исто така, посочи дека постои голем интерес кај инвеститорите за вложување во овој дел на Општината, а и за комплетно подобрување на инфраструктурата во целост.
„Оваа еко населба ќе има олеснат пристап и преку изградбата на мостот над реката Вардар, проект кој е во процес на подготовка, а ќе го спроведеме заедно со Град Скопје. Поврзувањето на левиот и десниот дел од Вардар ќе придонесе за директно поврзување на Бардовци со централниот дел на Карпош, но, и за намалување на сообраќајниот хаос“, изјави Богоев.
На работната средба присутните гости покажале интерес и за други теми од областа на енергетиката, ставајќи акцент на гасификацијата на Општината и доближувањето на овој енергенс до сите домаќинства.
„На планот на замена на старите со нови, еколошки енергенси, во текот на вчерашниот ден, Градот Скопје формираше Јавно претпријатие ‘Градски енергетски системи АД Скопје’ кое ќе врши снабдување со природен гас и топлинска енергија, а граѓаните веќе од претстојната грејна сезона ќе можат да ги користат услугите на ова јавно претпријатие“, информираат од општината.
Градоначалникот Богоев посочи дека Општината прави напори за поголем дел од општинските установи (градинки и основни училишта) да користат соларни панели за снабдување со електрична енергија.
Учесниците на проектот Cool Heating ја поздравија отвореноста на локалната самоуправа и способноста да ги препознае приоритетите. По завршување на средбата, тие се упатија на локацијата во близина на Зајчев Рид каде што треба да биде спроведена Студијата за новата населба.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Филипчe: ВМРО-ДПМНЕ се гушка со ДУИ, ние ја научивме лекцијата

Претседателот на СДСМ, Венко Филипче, во интервју за телевизија Сител категорично ја отфрли тезата дека неговата партија ја рехабилитира Демократската унија за интеграција (ДУИ), нагласувајќи дека политичкиот процес не функционира на таков начин.
„Не ја рехабилитирам ДУИ ниту јас, ниту СДСМ. Партија се рехабилитира со работа на своите членови, а на крај довербата ја враќаат или не ја враќаат граѓаните“, изјави Филипче.
Тој потенцираше дека социјалдемократите ги научиле лекциите од претходната коалиција со ДУИ и дека денес принципите на коалицирање се поставени на сосема поинакви основи: „Се темелат на вредности, на политики, на луѓе и на програми.“
Филипче истовремено ја насочи критиката кон ВМРО-ДПМНЕ, за која рече дека е токму таа партија која во моментов гради нова блискост со ДУИ, и тоа спротивно на ветувањата дадени во кампањата.
„Ние слушаме дека има некаква нова релација, дека ВМРО-ДПМНЕ е таа што иницирала приближување и затоплување на односите со ДУИ. Да потсетам – што ветуваа премиерот и ВМРО-ДПМНЕ? Дека ќе ги апсат ДУИ, беа криминалци, Соравија, Лотарија… Што видовме од тоа? Ништо. На Артан Груби му ја дигнаа рампата за Косово, а Максим Димитријевски со ДУИ си гласаа ДУП-ови во Куманово“, истакна лидерот на СДСМ.
Повикувајќи на политичка сериозност, тој повтори дека социјалдемократите во овој момент немаат никаква соработка со ДУИ и дека таа епизода за нив е затворена: „Ја научивме лекцијата, и таа добра лекција ќе ја користиме во градењето на идните коалиции“.
Македонија
Пожарите еден по еден се гаснат, но опасноста останува кај Тиквешко езеро

Утрово до 08:30 часот во Македонија евидентирани се вкупно шест пожари, од кои еден сè уште е активен, а пет се ставени под контрола, соопшти Центарот за управување со кризи (ЦУК).
Активниот пожар е во Општина Кавадарци, во близина на Тиквешкото Езеро, каде огнот зафатил нискостеблеста шума и сува трева. Екипите на терен работат на негово локализирање, но поради сувата вегетација и повремениот ветер гаснењето е отежнато.
Покрај овој пожар, властите потврдуваат дека пет други пожари кои вчера предизвикаа сериозни проблеми се веќе под контрола. Во Македонски Брод, во повеќенаменското подрачје „Јасен“, огнот зафати мешана шума, но со интервенција на пожарникарите и шумската полиција е спречено негово ширење.
На планината Кожуф, во Општина Гевгелија, вчерашниот приземен пожар е стабилизиран, а надлежните дежураат за да не дојде до повторно разгорување.
Во Општина Желино се случија два пожара – во селото Мерово, каде изгоре дел од мешана шума, и во селото Церово, каде пламените јазици зафатија ниска вегетација и делови од мешана шума. Двете жаришта се ставени под контрола, но остануваат ризични поради топлото време.
Пожар се случи и во селото Долгаец, во Општина Долнени, каде исто така беше зафатена мешана шума. И таму состојбата е стабилизирана.
Надлежните апелираат на максимална внимателност, бидејќи сувата вегетација и високите температури овозможуваат брзо ширење на пожарите, а најмал невнимателен потег може да предизвика сериозни последици.
Македонија
Перински пред гласањето на 12 септември: Ако не се донесе законот, градоначалниците ќе останат без контрола

Министерот за локална самоуправа, Златко Перински, потврди дека институциите прават максимални напори новите измени на Законот за локална самоуправа да бидат изгласани до 12 септември, кога е закажана последната парламентарна седница пред изборите.
Тој посочи дека предлог-законот е подготвуван повеќе од половина година, со широки консултации и дебати со сите засегнати страни, вклучително и со координаторите на опозициските групи во Собранието.
„Жал ми е што ниту ДУИ, ниту СДСМ не успеаја да се надминат и да ги поддржат измените, иако тие директно се однесуваат на јакнење на демократијата и подобрување на услугите на локално ниво“, изјави Перински.
Според него, клучните новини се: воведување можност за референдумски отповик на градоначалник, задолжителна комунална полиција, транспарентно пренесување на седниците на општинските совети и нови градски архитекти.
Министерот предупреди дека доколку измените не се изгласаат на следната седница, тие нема да важат за идните градоначалници.
„Тоа би значело дека тие ќе останат единствените јавни функционери без можност за отповик, а локалната власт нема да има механизми како комунална полиција, што ќе влијае врз квалитетот на работењето“, нагласи Перински.
Тој се осврна и на бројот на советници по општините, објаснувајќи дека Владата веќе интервенирала согласно промените во бројот на жители.
„Во 17 општини имаше корекции, во 14 бројот на советници се намали, а во три се зголеми“, рече тој.
Министерот додаде дека барањата на опозицијата за вклучување на целото население од пописот не се оправдани, бидејќи според законот, советниците се избираат врз основа на реалниот број на жители во општината.
„Нема пример во светот каде нерезиденти се земаат како параметар за советници. Владата уште на старт ги расчисти овие дилеми“, потенцира Перински.