Македонија
(Видео) Во Македонија сѐ уште владеат селективната правда и партизирањето на администрацијата, тврди Народниот правобранител

Народниот правобранител, Иџет Мемети, денеска го презентираше годишниот извештај за степенот на почитување, унапредување и заштита на човековите права и слободи во кој констатираше дека сѐ уште се присутни селективната правда и партизираната јавна администрација на централно и локално ниво.
– Ова е сериозна пречка во остварувањето на правата на граѓаните, лошиот систем на извршување особено го погодува најсиромашниот слој граѓани. Социјалната заштита останува систем со кој не се надминува социјалниот ризик на граѓаните, вели Мемети.
Според него, голем проблем е и појавата на дискриминација по сите основи, неефикасното судство и обвинителство кои поттикнуваат недоверба кај граѓаните. Минатата година Народниот правобранител почнал 4.185 претставки од кои во 1137 случаи се констатирани повреди на човековите права и слободи. Од овие 1137 случаи, прифатени се 970 интервенции на омбудсманот. Споредбено со 2016 година кога во 1523 случаи се констатирани повреди на човековите права, оваа стапка е намалена за 5.9 отсто помалку во однос на 2017 година.
-Правната регулатива за јавната администрација, како и партизираната и непрофесионална структура создаваат сериозни проблеми на граѓаните. Утврдени се одредби кои не се применливи и услови кои ни оддалеку не гарантираат стручна, квалитетна и неполитизирана администрација, вели Мемети.
Тој смета дека партиските вработувања во администрацијата на локално ниво и натаму се присутни и особено се видливи во непродолжувањето на договорите на определено работно време во образовниот процес.
-Ваквата појава особено е карактеристична по изборниот процес, што наведува на заклучок за наградување на партиски лојалните и класична злоупотреба на трудот на претходно ангажираните лица, рече Мемети по што го повика министерот за информатичко општество итно да пристапи кон порадикални промени во овој систем со што ќе обезбеди стручна и ефикасна администрација ослободена од партиски влијанија.
Омбудсманот упати забелешки и кон полицијата, Јавното обвинителство и правосудството во Република Македонија за кои смета дека не ги извршувале работите на потребното ниво со што биле повредени човековите права во голем број од случаите.
-Полицијата непрофесионално постапува применувајќи двојни аршини во работата со што се потврдија укажувањата за длабока партизираност на овој орган, што е за секаква осуда. Јавното обвинителство не покажа сериозна намера за откривање и соодветно казнување на сторителите на кривични дела. Препорачувам Обвинителството објективно да постапува согласно со надлежностите и да не дејствува селективно, изјави Мемети.
Народниот правобранител исто така констатираше дека правосудството е област во која граѓаните најмногу се жалат на неефикасното решавање на предметите и времетрањето на ниво комплетирање.
-Управното судство остана немоќно пред органите на управата, без можност да обезбеди извршување на своите одлуки од органите на државната управа, кои наместо да постапат согласно со правните ставови во судските одлуки и дадените укажувања, носеа исти одлуки како претходно поништените, рече Мемети, кој препорача да се направат измени во Законот за управните спорови и воведување императивни одредби за задолжително одржување јавни расправи.
Мемети информираше и дека работата на Народниот правобранител била попречувана во имплементацијата на новата надлежност да дејствува како „пријател на судот“ што подразбира овластување да учествува во сите фази од постапката со право да дава предлози и мислења кои судот треба да ги земе предвид.
-Во некои случаи каде што побаравме вклучување во постапките, не ни беше дозволено со образложение дека Народниот правобранител на рочиштата може да присуствува само како јавност и дека ваквото дејствување не е пропишано во процесните закони, вели Мемети.
Виктор Јованов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Бендевска: Да го продолжиме заветот од Илинден и пораката од АСНОМ

По повод 2 Август – Денот на Републиката, во име на претседателот на Собранието на Република Северна Македонија, Африм Гаши, потпретседателката на Собранието на Република Северна Македонија, Весна Бендевска, заедно со собраниска делегација во состав: Бране Петрушевски, Никола Коњановски, Даниела Николова и Даниел Стојчевски, одбележа 81 година од Првото заседание на АСНОМ, во Меморијалниот центар АСНОМ во Пелинце.
„На хероите на двата Илиндена кои се жртвуваа за денес да можеме да бидеме свои на своето, да им ветиме уште еднаш дека денешните генерации нема да го заборават заветот што ни го оставија. Да ги насочиме нашите погледи, стремежи и напори од заедничкото минато, кон заедничката сегашност и иднина. Да го продолжиме заветот од Илинден и пораката од АСНОМ“ – порача потпретседателката Бендевска.
Македонија
(Фото) Сиљановска-Давкова: Мора да го искорениме плевелот на корупцијата и криминалот, време е за нова пролет на нашата македонска република

Претседателката Гордана Сиљановска-Давкова, денеска се обрати на чествувањето на 2 Август – Илинден, Денот на Републиката на Мечкин Камен во Крушево.
Во својот говор, Сиљановска-Давкова рече дека е „време за нова пролет на нашата македонска република, за навраќање на републиканските корени“.
„Што значи тоа? Македонските граѓани од својата република очекуваат барем две нешта ̶ слобода и правда. Кога зборувам за слобода, не мислам само на политичката, туку и на економската, на академската, на културната, на социјалната… Кога зборувам за правда, не мислам само на правосудството, туку и на социјалната, еколошката и на генерациската правда. Не смееме да изумиме дека предуслови за слободата и за правдата се владеењето на правото и еднаквоста пред законот“, истакна претседателката.
Таа додаде дека „мора да го искорениме плевелот на корупцијата и на криминалот“.
„Никој не смее да биде недопирлив, независно дали е поранешен или актуелен политичар или функционер, судија или влијателен бизнисмен. За правдата да биде неселективна и навремена, потребни се забрзани и длабоки реформи во правосудството, а тие почнуваат со европска правна рамка, но и со европски критериуми на регрутирање, како и со европски стандарди на функционирање и одговорност“, вели Сиљановска-Давкова.
Според неа, потребен ни е здравствен систем по мерка на здравјето на пациентите и на нацијата. За креативните умови, потребни се инвестиции во образованието и науката, во истражувањето, во развојот и дигитализацијата.
Претседателката се осврна и на пожарите.
„Деновиве, републиката ни е во пламен. За помалку шумски пожари, потребен е не само правен, туку и ефикасен институционален систем, вистински луѓе на важни позиции, вградена превентивна и волонтерска димензија, стимулативни мерки за пожарникарите, пожарникарството и за волонтерите. И овие активности се во ек. За да се заштити здравјето на луѓето и на природата, мора да ставиме крај на дивите депонии и на нивното палење, но и да имаме контрола врз палењето“, вели претседателката.
Сиљановска-Давкова истакна дека имаме потреба од длабоки и суштински реформи во секоја област по европска мерка: со заштитени слободи и права, со владеење на правото и бескомпромисна борба со корупцијата; со стратегиски партнерства со државите со заеднички вредности и интереси; со независни и функционални институции; со компетитивна економија и со капитални инвестиции; со партиципативна политичка култура.
„Ние не сме стебло без корен. Нашата слобода и нашата република се вкоренети во европската пролет на народите, во демократските и хумани визии на „Млада Европа“. И затоа, на оној што ќе ни рече „вие сте млад народ со млада држава“, ќе му одговориме дека сме чеда на Гоцевата визија за „Млада Европа“ обединета Европа, и за светот како поле за културен натпревар на народите!
Колку и да ни е тешко, не треба да се обесхрабруваме од пречките и препреките. Сме опстоиле и сме надминале и потешки проблеми. Не сме сами. Имаме пријатели – демократи кои го почитуваат нашето право на национален и културен идентитет, на граѓански дигнитет и интегритет зашто и самите го сакаат и уживаат. Верувам во нивната поддршка и помош. Тие не се плашат да укажат и да се спротивстават на двојните стандарди и на анахроните обиди за ревизија на историјата.
Ние не се откажуваме од природниот пат кон членството во ЕУ, оти отсекогаш сме дел на Европа: географски, историски и културно, зошто да не и политички. Едноставно, ние балканските народи и нации сме биле, сме и ќе останеме Европејци.
Цврсто сме решени како што беше европски зацртано да стигнеме до целта до 2030 година, европеизирани по словото на Копенхагенските критериуми!“, рече претседателката Сиљановска-Давкова.
Македонија
Филков од Пелинце: АСНОМ нека ни биде потсетник – патот на правдата бара храброст, истрајност и одговорност

Министерот за правда, Игор Филков, беше дел од владината делегација која оддаде почит по повод 81 година од Првото заседание на АСНОМ, во Меморијалниот центар АСНОМ во Пелинце.
„Денес сме овде, во Меморијалниот центар АСНОМ во Пелинце, за да оддадеме почит на државничката визија и храброста на генерациите кои пред 81 година го поставија темелот на нашата државност.
Првото заседание на АСНОМ не е само историски момент, туку жив доказ дека борбата за правда, слобода и достоинство е темел на нашето постоење како народ и држава.
Како министер за правда, должност ми е да го чувам тој завет – да се грижам за правна држава, за независни институции и за заштита на човековите права.
Нека ни биде потсетник – патот на правдата бара храброст, истрајност и одговорност. АСНОМ ни остави обврска, а ние имаме должност таа обврска да ја преточиме во дела“, истакна министерот Филков.