Неформалната организација „Млади за Македонија“ соопшти дека во раните утрински часови, штандот што за кампањата „Бојкотирам“ во Охрид бил поставен од членовите на организацијата, бил уништен, а рекламните материјали од кампањата украдени.

Злосторниците се уште не се идентификувани, но од „Млади за Македонија“ велат дека ги преземаaт сите можни мерки кои би овозможиле идентификување на сторителите и нивно соодветно судско казнување. Исто така, ги повикуваат органите да почнат да ја вршат својата работа, а не да остануваат слепи поддржувачи на насилството во земјата.

Од организацијата велат дека рушењето на штандот претставува нечесен, антидемократски обид, со примена на фашистички методи да се замолкне младината во нивниот обид да ја заштити својата татковина.

„Овој чин претставува директен обид да се наштети не само финансиски на организацијата која се финансира за сметка на доброволни прилози од нејзините членови, туку и директна закана до младите кон нивниот физички интегритет и со цел да се исплашат“, се наведува во соопштението од „Млади за Македонија“.

Оттаму на ова гледаат како систематски и планиран притисок.

„Да потсетиме деновиве беше најавено дека пратениците и пратеничките групи ќе имаат право на повластени термини и ценовници за рекламирање за време на ‘Северниот’ референдум на 30 септември. Сите останати – партии, граѓани и граѓански организации, ќе можат да се рекламираат, но во терминините кои нема да бидат искористени од парламентот и по комерцијалните цени. На тој начин се прави обид да не замолкнат преку оневозможување за рекламирање на незаконски и неуставен начин“, стои во соопштението.

„Вчера започнаа со дискриминација во рекламирањето, денеска е штандот, утре нас ќе сакаат да не нападнат. Но ние не се плашиме и ќе одиме до крај. Ова уште повеќе не поттикнува да ја продолжиме борбата за татковината“, велат од „Млади за Македонија“.