Трошоците за живот постојано растат, а платите остануваат ниски, работниците се оставени сами, голем дел размислуваат да ја напуштат државата во потрага по подобри услови, предупреди на прес-конференција портпаролката на СДСМ, Богданка Кузеска.

„Ова е реалноста со која секојдневно се соочуваат македонските семејства.

Работодавачите имаат желба да ги зголемат платите за да ги задржат работниците, но високите придонеси се главната пречка. Наместо тие пари да завршуваат во џебовите на работниците, тие се трошат на големи давачки.

Затоа, СДСМ предлага законско решение кое директно ќе им помогне и на работниците и на компаниите а ќе ја поттикне и економијата.

Со нашиот предлог-закон, платите за 400.000 работници ќе можат да се зголемат од 3.000 до 15.000 денари, без дополнителен товар за работодавачите, бидејќи за тој износ нема да се плаќаат придонеси.

Придонесите за пензиско, здравствено и социјално осигурување ќе бидат замрзнати на просекот од последните три исплати и тоа во траење од една година“, појасни таа. Ова, според неа, значи сигурност и предвидливост за компаниите, но и повисоки приходи за работниците.

Мерката како што рече, ќе важи за сите работници со нето плата до 65.380 денари, што опфаќа околу 400.000 вработени во државата.

Според неа, со просечно зголемување на платата од 7.500 денари, македонските граѓани ќе добијат дополнителни 585 милиони евра годишно, што ќе значи поголема потрошувачка и економски раст.

Кузеска оценува дека иако за зголемениот износ на платата нема да се плаќаат придонеси, државата и понатаму ќе наплатува 10% данок на личен доход, што ќе донесе 58,5 милиони евра во буџетот.

„Со овој закон сите добиваат – работниците кои ќе имаат поголеми примања, компаниите кои нема да имаат дополнителни трошоци, и државата со остварување на приходи“.

Ги повика сите пратеници во Собранието, особено од ДПМНЕ, да го поддржат овој закон.

„Нема оправдување за негласање. Ова е мерка што значи подобар живот за граѓаните, стабилност за стопанството и развој на економијата.

Ако владејачкото мнозинство го одбие овој закон, тоа ќе биде јасна потврда дека немаат интерес за подобрување на животниот стандард на граѓаните и дека се против зголемување на платите“, додаде Кузеска.

„Самоволието на ДУИ и натаму продолжува. Минатата недела, градоначалниот на општина Чаир, Висар Ганиу, помпезно промовираше уништување на заштитено културно наследство во Старата скопска чаршија, односно „поврзувачката порта на Бит-пазар со Старата скопска чаршија“, како што ја нарекоа од Општина Чаир. Во таа прилика Ганиу за медиумите арогантно изјави дека за оваа порта има одлука од Советот на Општина Чаир и не е потребна дозвола од Конзерваторски центар. На изјавата од Ганиу се огласи директорката на Конзерваторскиот центар – Скопје, Љиљана Китановска, која потврди дека портата е бесправна градба, која никако не може да биде легализирана и дека треба да се преземат сите законски мерки за итно нејзино отстранување. Исто така од Конзерваторски центар побараа и кривично санкционирање на одговорните лица за бесправното градење“, рекоа од Левица.

„Дел од градбата се наоѓа во границите на контактната зона наречена Дуќанџик кој што се наоѓа во границите на споменичната целина Стара скопска чаршија и каде се применува режимот на заштита од прв степен, кој подразбира забрана за поставување градби на јавни простори и за нарушување на интегритетот на заштитената целина. Воедно, во важечкиот детален урбанистички план „Стара чаршија“, донесен во 1999 година со одлука на Советот на Општина Центар, не предвидува никаква градба на предметната локација. Ова значи дека поврзувачката порта поставена меѓу Бит-пазар и Старата чаршија го намалува културниот идентитет и уникатниот карактер на чаршијата, и според тоа веднаш треба да се отстрани“, посочуваат од партијата.

Левица апелира Министерството за култура, веднаш да реагира и да ја заштити чаршијата како симбол на Скопје од понатамошно деградирање, и да реагира на непочитување на законот и подзаконските акти.

„Од коалицијата ДПМНЕ/ЗНАМ бараме да се покрене кривична одговорност за непочитување на законите и уништување на култирното наследство. Левица нема да дозволи и овој пат самоволитео на ДУИ да остане неказнето на сметка на ситнопартиските интереси“, завршуваат од Левица.

Министерот за европски прашања Орхан Муртезани, денеска имаше средба со Микела Телатин, директорка на Канцеларијата на Обединетите нации за проектни услуги – УНОПС во Србија, на која што беше потврдена долгогодишната успешна соработка во рамките на проектите поддржани од Шведска преку Шведската агенција за меѓународен развој (SIDA) и Швајцарија преку Швајцарската агенција за развојна соработка (SDC).

Муртезани изрази задоволство од долгогодишната соработка со УНОПС, особено со канцеларијата во Скопје, со која што веќе шест години заеднички работат на унапредување на европскиот реформски процес на Северна Македонија.

Тој нагласи дека успешното завршување на првата фаза од проектот „Поддршката на Северна Македонија за пристапувањето во ЕУ“, претставува силна основа за натамошни активности, а МЕП останува посветен на неговата доследна имплементација.

Муртезани и Телатин истакнаа дека во изминатиот период беше обезбеден континуитет на проектните активности, дека успешно се адресираа предизвиците и дека беше дадена потребната стручна насока за процесот. Дополнително, беше нагласена поддршката во повеќе клучни области, како што се подготовката на Националната верзија на ЕУ acquis преку превод и правна ревизија, подготовка на Насоки за интегрирање на антикорупциските стандарди во различни поглавја од acquis-то, зајакнување на капацитетите на медиумите, организација на настани за подигнување на јавната свест за процесот на ЕУ интеграција и Реформската агенда 2024 – 2027, експертска поддршка и јакнење на административните капацитети.
————————————————————————————————