Македонија
(Видео) Во Прилеп со граѓански марш одбележан Денот на народното востание
Неколку илјади граѓани на Прилеп беа дел од денешниот граѓански марш, кој во чест на 11.Октомври, Денот на народното востание, го организираше Општина Прилеп.
Кон почитувачите на делото на антифашистичката револуција, се приклучија претставници на локалната власт, Сојузот на борци, политички партии, здруженија на граѓани, ученици од прилепските основни и средни училишта, како и официјалните делегации кои полагаа цвеќе на спомениците и спомен обележјата во Прилеп. Во чест на паднатите борци, граѓаните маршираа од меморијалниот музеј „11.Октомври“, односно Участакот, до Паркот на револуцијата каде делегациите се поклонија пред бистите во Алејата на народните херои и положија свежо цвеќе на споменикот „Жена борец“ и Могилата на непобедените.
Во своето обраќање пред присутните, градоначалникот Илија Јованоски рече дека со чествувањето на 78 години од Денот на народното востание 11.Октомври, граѓаните на Прилеп им оддаваат почит на 15-те народни херои и 650-те борци кои ги положиле своите животи на олтарот на татковината.
„Храбрите борци на Прилeпскиот одред отворија нова страница во историјата на македонскиот народ, го испишаа овој датум и Прилеп, градот – херој во историјата на македонската државност. Во народно-ослободителната војна, од прилепско учество зедоа 2.700 активни борци. 15 народни херои и 650 борци од Прилеп – градот херој, ги положија своите животи на олтарот на слободата. Овој ден е симбол на непокорот, вечно сеќавање на непобедените борци, во чија чест денеска го организиравме овој почесен марш, со кој воедно и ја обновуваме традицијата. Сигурно чекориме на патот на евро-атланските интеграции. Со успешното завршување на преговорите, ја остваруваме стратешката цел – да станеме полноправна членка на НАТО Алијансата. На патот на ЕУ ќе не’ води секоја успешна реформа, европски спроведен закон, секоја инвестиција и нови работни места, еднаквост, толеранција, дијалог, заеднички успех и достигнување. Наша обврска е одговорно и напорно да работиме за безбедна, стабилна, економски силна, за Европска Република Северна Македонија. Посветено работиме за економски и инфраструктурно развиен Прилеп, град со можности за подобар живот, подобра сегашност и иднина на генерациите што доаѓаат“, истакна градоначалникот Јованоски.
Претседателот на прилепскиот општински одбор на Сојуз на борци, Круме Соколски потенцираше дека е радосен на денешниот импозантен марш и собир и на тоа што дел од него се голем број млади луѓе.
„На сите вас, на овој според моето паметење најимпозантен собир, ви го честитам 11.Октомври, најголемиот празник на македонскиот народ. После многу неуспешни обиди, НОБ беше првото успешно движење во Македонија. Јас сум и емоционално поврзан со овој простор, но добро е што на ваков собир, најголем и највеличествен во Македонија, учествуваат и млади генерации кои треба да паметат дека најхрабрите, најпатриотските сили скоевци и комунисти, го дадоа својот живот за слободна Македонија, за независна држава“, изјави Соколоски.
Во име на Владата, обраќање имаше министерот за транспорт и врски, Горан Сугарески, кој напомена дека собирот во Паркот на револуцијата значи упатување достојна почит на сите борци кои треба да бидат пример како се сака и брани татковината.
„Тие се пример за идеологијата што не’ води сите нас и затоа слава им на сите херои што го дадоа животот за Македонија. Денеска го живееме сонот на нашите претци, но истовремено сме исправени пред нов предизвик. Денеска ја градиме Европска Македонија, која почива на темелите на слободата, демократијата и човековите права. Покажавме и докажавме како се сака државата, како се работи за нејзиниот развој и просперитет, за доброто на сите граѓани. Ни претстои период во кој сите заедно мора да се избориме и да ги изодиме клучните чекори за нашата европска интеграција. Друга опција немаме. Оваа земја мора да ја направиме подобро место за живеење, за сите нас, за генерациите што следат. Тежок бил патот на нашите претци за слободна држава, не е лесен ниту сега. Процесите што ги започнавме гарантираат сигурност, стабилност и здрава економија. Токму тоа не’ охрабрува да продолжиме со нашата визија, земјата да ја однесеме таму каде што припаѓа, во европското семејство“, потенцираше Сугарески.
Покрај градоначалникот на Прилеп и претседателот и членови на Советот на општина Прилеп, на денешното одбележување на 11.Октомври присуствуваа делегации и на Претседателот на државата, Владата, Собранието, Армијата, амбасадата на Руската федерација, Сојузот на борци, политички партии, здруженија на граѓани и претставници на неколку локални самоуправи, кои положија цвеќе на спомениците на Методија Андонов-Ченто, Кузман Јосифоски, споменикот „Жена борец“ и Могилата на непобедените, а свежо цвеќе на бистите во Алејата на народните херои, положија членовите на прилепскиот извиднички одред.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
До 17 часот најмал одзив на гласачи во Куманово и Шуто Оризари
До 17 часот излезноста на гласачи на Локалните избори за Град Скопје изнесува 28,52%, соопшти ДИК. Процентот на избирачки места од каде пристигнале податоците е 99, 56% за вкупно 682 избирачки места.
Излезноста на гласачите во другите општини од државата до 17 часот, според ДИК изнесува 39,28%.
„Процентот на избирачки места од каде се пристигнати податоците изнесува 96,94%. Најголема излезност до 17 часот е забележана во Општина Конче со 64,44%“.
Најмал одзив имало во Општина Куманово од 27,72% и во Општина Шуто Оризари со 25,82%.
„Досега до ДИК нема пристигнато информација дека би имало евентуално продолживање на гласањето на некое избирачко место, и не се пријавени поголеми неправилсноти“.
Македонија
Утре променливо облачно, претпладне по одделни котлини со појава на магла
Времето утре, променливо облачно, претпладне по одделни котлини со појава на магла. Попладне и во текот на ноќта ќе има повремени локални врнежи од дожд и услови за ретки грмежи. Ќе дува слаб до умерен ветер од јужен правец. Минималната температура ќе биде во интервал од 1 до 8, а максималната ќе достигне од 16 до 21 степен.
Во Скопје, променливо облачно, претпладне во делови од котлината со појава на слаба магла. Попладне и во текот на ноќта ќе има повремени врнежи од дожд. Ќе дува слаб ветер од југоисточен правец. Минималната температура ќе се спушти до 5, а максималната ќе достигне до 18 степени.
Во наредните денови следува период на променливо облачно време, по одделни котлини со појава на утринска магла. Во вторник ќе има повремени локални врнежи од дожд и ќе дува умерен, повремено засилен северен ветер. Дневната температура ќе опадне за неколку степени. Во среда и четврток ќе преовладува претежно стабилно време, а локални врнежи од дожд повторно се очекуваат во деновите од следниот викенд.
Македонија
27,19 проценти е излезноста на граѓаните до 15 часот во вториот круг од локалните избори, според ДИК
Излезноста на гласачите во вториот круг од локалните избори до 15 часот е 27,19 отсто, според податоците објавени од Државната изборна комисија.
Според комисијата, излезноста за Град Скопје до 15 часот изнесува 29,94%.
Најголема излезност е забележана во Општина Карпош со 32, 40% и Општина Центар со 31,65%, најмала излезност за градот Скопје има во Општина Сарај 6% и во Чаир со 8,83%.
„Споредено со излезноста во првиот круг и пресекот направен тогаш во 15 часот, излезноста изнесувала 31,16% за градот Скопје.
Во однос на излезноста за градоначалници на општините според пресекот во 15 часот, процентот на избирачи кои гласале во избирачките места од кои се пристигнати податоци до ДИК изнесува 30,26%. Процентот на избирачки места од кои се пристигнати податоците изнесува 93,59%“.
Гласањето како што соопштија од комисијата се одвива непречено и во најдобар ред.
„Се што беше доставено како приговори за избирачко право се решава и сите граѓани непречено си го остваруваат своето право на глас“. Засега велат од таму не се пријавени никакви инциденти.

