Македонско еколошко друштво во соработка со седум организации од Европа почна да го спроведува проектот „Балкан детокс LIFE“, финансиран од ЕУ, со кој ќе се подигнува свеста во однос на труењето диви животни, ќе се зајакнуваат националните капацитети за борбата против труење на дивите животни, што претставува една од најголемите причини за смртност и пад на популациите на многубројни загрозени диви видови, особено мршојадците.

Нелегалното труење и користењето отрови е голема закана и за животната средина и за јавното здравје.

„Нелегалното труење веќе предизвика целосно истребување на црниот и брадестиот мршојадец од нашата држава во последните неколку децении. Во моментот отровните мамки претставуваат најголема закана за преостанатите два вида мршојадци што живеат во нашата земја: египетскиот и белоглавиот мршојадец. Ние сме среќни и возбудени што ќе почнеме да го решаваме проблемот на институционално и на локално ниво и да бидеме вклучени во меѓународната мрежа на партнери. Очекуваме нашите напори да придонесат кон закрепнување на популациите на диви животински видови, кои се засегнати од оваа штетна пракса“, вели Ненад Петровски, раководител на проектот од Македонското еколошко друштво.

Преку проектот „Балкан детокс LIFE“ организациите ќе работат заедно со разни национални и меѓународни фактори, почнувајќи од владини органи до ловци и сточари, за да се минимизира заканата и да се постигнат резултати во седум балкански земји.

„Нелегалното труење на дивиот свет е еколошки криминал и како такво потребно е соодветно вклучување на властите при регистрација, истрага и казнување на овие активности. Овој проект ќе соработува заедно со владините органи за да го постигнеме токму тоа“, вели Јован Андевски, менаџер на програмите за заштита во Фондацијата за заштита на мршојадците од Шпанија.

Најчестиот начин на труење на дивите животни на Балканот е намерното поставување отровни мамки за убивање диви предатори или други диви и домашни животни, кои може да му нанесат штета на добитокот или на видовите дивеч. Покрај животните шот се таргетирани, страдаат и други ранливи видови бидејќи станува збор за неселективен начин на истребување животни.

Мршојадците што се исхрануваат исклучиво со мртви животни честопати стануваат жртви на труење со директно јадење на отровна мамка или со хранење на телата на затруени животни. Честите и континуирани инциденти со труење на Балканот резултираа со 465 случаи на затруени мршојадци во текот на изминатите 20 години. Студија спроведена од Фондацијата за заштита на мршојадците проценува дека најмалку 115 мршојадци годишно умираат од труење на Балканот бидејќи само 20 % од ваквите инциденти се откриени и документирани.

Мршојадците, исто така познати како екипата за чистење на природата, отстрануваат мрши од животни од дивината помагајќи да се одржат здрави екосистемите бидејќи тие дејствуваат како природни рециклирачи и обезбедуваат бесплатни услуги за екосистемите, дивиот свет и општеството како целина.