Македонија
Во Уставниот суд оформени пет предмети за личните документи без Северна, Кацарска не знае кога ќе се најдат на седница

Во судот се оформени пет предмети, доставени се до тимовите – судија известител и советник на судот, во врска со издавањето на личните документи, соопшти претседателката на Уставниот суд, Добрила Кацарска.
Таа не знае кога овие предмети ќе се најдат на седница бидејќи, како што рече, тоа ќе зависи од тимот што работи, а таа не сака да се меша во нивната работа.
„Конкретно, не знам што е оспорено, но секако е оној период на издавањето на личните документи и нивното времетраење. Има документи што се сѐ уште со важност, слободата на движење е ограничена на овој начин“, рече Кацарска.
Сепак, како што посочи Кацарска, граѓаните треба да знаат дека слободата на движење не е во надлежност на Уставниот суд.
„Мора да разграничиме што е наша надлежност. Се надевам дека политичарите ќе разберат зошто две и пол години бев силен поддржувач на уставната тужба. Ако ние го имавме овој институт, граѓаните ќе може да се обратат за секоја слобода и право што им е гарантирано со Уставот. Се надевам политичарите ќе разберат зошто барам измена на Уставот, односно проширување на надлежноста на Уставниот суд“, додаде Кацарска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Двајца браќа обвинети за убиство и за обид за убиство на подмолен начин

По спроведена истражна постапка, јавен обвинител од Основното јавно обвинителство Скопје денеска поднесе Обвинителен акт против две лица кои како соизвршители се товарат дека сториле едно кривично дело – Убиство од член 123 став 2 точка 1 и уште едно кривично дело – Убиство во обид предвиден со член 19 од Кривичниот законик.
Во текот на истрагата се обезбедени докази кои потврдуваат дека на 01.11.2024 година во Арачиново двајцата браќа на возраст од 23 и 31 година со умисла и на подмолен начин лишиле од живот едно лице и се обиделе да лишат од живот уште едно. Со двајцата оштетени – татко и син обвинетите се договориле да се најдат и да разговараат за наводен долг од 7.000 евра. Со автомобил пристигнале на договорената локација, но по краток разговор, едниот од обвинетите извадил огнено оружје – пиштол и започнал да пука кон жртвите. Од нанесените огнострелни повреди оштетениот татко починал, а синот се здобил со тешки телесни поврeди.
Јавниот обвинител до Основниот кривичен суд Скопје достави и предлог за продолжување на претходно определената мерка притвор за двајцата обвинети, бидејќи се уште постојат законските основи за најстрога мерка за обезбедување.
Македонија
Филипче ја следи политиката на Заев, кој со една раката на срцето се колнеше во македонската жичка, а со другата ја распродаваше, велат од ВМРО-ДПМНЕ

Венко Филипче се гордее со неговиот претходник, Зоран Заев и учи од него. Тој призна дека не сака да се одвои од неговата сенка и дека и народот треба да учи од неговото искуство и политики спроведени во минатото, велат од ВМРО-ДПМНЕ.
„Неговите политики спроведени во минатото од Заев, покрај криминал и корупција се предавството на националните интереси. Зоран Заев е човек кој со едната рака на срце се колнеше во македонската жица и тврдеше дека си ја сака земјата, додека со другата ја распродаваше. Откако со Бугарија влезе во процес на преговори и без око да му трепне, Заев прифати се што Бугарите од него побараа. Сега, таа попустлива политика на Зоран Заев спрема Бугарија, до најмал милиметар ја следи и неговиот наследник во СДС, Венко Филипче. Наместо државничка политика за заштита на националните интереси, Филипче инсистира на попустлива и политика на предавство на националните интереси“, според партијата на власт.
Од оваа партија оценуваат дека политиката на Филипче и СДС е предавничка.
„Пред некој ден потврди и Бујар Османи, кој призна дека со дозвола на СДС, со Бугарија преговарал за етнички прашања.
Со вакви погубни и предавнички политики и послушнички и поданички однос кон Заев, не е ни чудно што на последните анкети на јавното мислење, половина од граѓаните Филипче не го препознаваат за лидер на опозицијата“, додаваат од ВМРО-ДПМНЕ.
Со неговите потези, како што велат, Филипче само потврдува дека СДС продолжува да биде синоним за неспособност, криминал и предавства.
Македонија
„Како Тошковски и МВР штитат роднини на партиски функционери од ДПМНЕ“, СДСМ најави нов скандал

СДСМ извести дека денеска ќе објави нов скандал, поткрепен, како што велат и со видео докази, „како Панче Тошковски и МВР штитат роднини на партиски функционери од ДПМНЕ“.
„Брат да ми е ќе одговара? Дали е ова точно што го кажува Панче Тошковски или уште една голема лага? Дали роднините на партиските функционери од ДПМНЕ праваш што сакаат и никој не ги казнува“, прашуваат од СДСМ и додаваат дека за денеска за 11.30 часот е закажана прес-конференција, во седиштето на партијата.