Членот на Извршниот одбор на СДСМ, Јон Фрчкоски, денеска одржа вонредна прес-конференција, на која се осврна на, како што рече, обвинувањата и нападите што ВМРО-ДПМНЕ со денови ги пласира во јавноста.

Фрчкоски наведе дека по изгласувањето на Резолуцијата, која, според него, наместо борба против дезинформации, значи забрана на вистината и слободата на говорот, започнале закани со кривични пријави и апсења. Тој оцени дека вакви практики постоеле во времето на Третиот рајх.

Според него, темата „мигранти за пари“ е причина за, како што рече, паниката во ВМРО-ДПМНЕ. Фрчкоски тврди дека постои таен договор поврзан со мигранти и финансиски средства, кои, како што наведе, служеле за продолжување на тендерски практики.

„Одеднаш почнуваат да излегуваат вести за СДСМ, за наводни тендери со кои СДСМ нема никаква врска. На секоја вест ни го лепат ДУИ. Ова нивното е чист дефокус. Да постоеше нешто реално, одамна ќе реагираа. Сега ова е нивен сензационализам со цел да ги прикријат двете главни теми: „Мигранти за пари“ и забраната на слободата на говор со изгласаната Резолуција, по примерот на Декретот од Третиот рајх“, рече тој.

Во таа насока, тој изнесе примери за тендери во вредност од, како што рече, 5,3 милиони евра, 9 милиони евра и други милионски износи, доделени на фирми за кои тврди дека се поврзани со лица блиски до ВМРО-ДПМНЕ, како и врски со Алта банка и Српската напредна странка.

Фрчкоски истакна дека ова, според него, е само почеток на откривање на криминално-корупциски шеми и афери, наведувајќи дека платформата Micko.mk и организацијата АКТ секојдневно прибираат нови информации, а по поднесувањето на пријавите, како што рече, настанала паника.

Тој обвини дека премиерот Христијан Мицкоски брза со реформи во правосудството со цел, според него, да го стави под контрола судството и обвинителството, додавајќи дека веќе 20 дена нема одговор за поднесените пријави.

Фрчкоски се осврна и на објавувањето негови фотографии и текстови од страна на ВМРО-ДПМНЕ, наведувајќи дека тоа претставува кампања за дефокус, во која, како што рече, без причина се споменува и неговиот татко. Тој посочи дека објавите следеле по неговата прес-конференција поврзана со трагедијата во Кочани, со цел, според него, да се тргне вниманието од одговорноста за тој настан.

Во однос на објавените фотографии, Фрчкоски рече дека настанот се случил пред пет години, дека тогаш бил помлад и дека веднаш ја презел целосната одговорност, нагласувајќи дека со тоа ги повредил само своите најблиски.

Тој истакна дека на последниот Извршен одбор добил нова шанса од претседателот и од колегите, за што, како што рече, е благодарен и нема да ги разочара.

„За оваа тема зборувам последен пат. Вистината ќе победи“, изјави Фрчкоски, порачувајќи на крајот: „АКТ ви дише во врат. Борбата започна и нема да застане додека не ја ослободиме Македонија од криминалот и корупцијата“.

Администрацијата на американскиот претседател Доналд Трамп заменува 30 дипломати од кариера од амбасадорски и други позиции во амбасадите, меѓу кои и американската амбасадорка во земјава, Анџела Агелер.

Ова доаѓа како дел од напорите за преобликување на американските дипломатски мисии и назначување персонал кој се смета дека целосно ги поддржува приоритетите на Трамп отелотворени во неговата порака „Америка на прво место“.

„Шефовите на мисии во најмалку 29 земји беа известени минатата недела дека нивните назначувања завршуваат во јануари“, изјавија двајца претставници на Стејт департментот кои зборуваа под услов на анонимност, пренесе „АП“.

Оние кои се погодени од промените не ги губат своите работни места во Надворешната служба и се враќаат во Вашингтон за други должности доколку сакаат да ги преземат, рекоа тие претставници.

Сите отповикани амбасадори ја презедоа функцијата за време на администрацијата на претседателот Џо Бајден, но останаа на тие позиции по првичната чистка на почетокот на вториот мандат на Трамп во јануари. Тоа се променило минатата среда кога почнале да добиваат известувања од Вашингтон дека треба да заминат.

Стејт департментот не коментираше за конкретниот број на засегнати вработени или амбасадори, но рече дека тоа е стандарден процес во секоја администрација. Како што беше најавено, амбасадорот е „личен претставник на претседателот и право на претседателот е да се осигура дека има поединци во овие земји кои ја промовираат неговата агенда „Америка на прво место“.

Најпогодена од промените е Африка, каде што беа повлечени амбасадори од 13 земји – Бурунди, Камерун, Зелен ’Рт, Габон, Брегот на Слоновата Коска, Мадагаскар, Маврициус, Нигер, Нигерија, Руанда, Сенегал, Сомалија и Уганда.

На второ место е Азија со промени на амбасадори во шест земји – Фиџи, Лаос, Маршалски Острови, Папуа Нова Гвинеја, Филипини и Виетнам.

Во Европа, смени се случија во Ерменија, Северна Македонија, Црна Гора и Словачка.

На Блискиот Исток во две земји – Алжир и Египет, како и во Јужна и Централна Азија – во Непал и Шри Ланка) и на Западната хемисфера – во Гватемала и Суринам.

Македонија се најде на третото место во Европа според стапката на убиства на жени извршени од партнер или член на семејството, покажуваат најновите податоци на Евростат за 2023 година, анализирани од „Еуроњуз“.

Според податоците, во Северна Македонија биле убиени шест жени на еден милион жители, што ја става земјата веднаш зад Латвија и Литванија. Латвија бележи највисока стапка во Европската Унија со околу 17 жени убиени на милион жители, додека Литванија е на второто место со 10 жени на милион жители.

Жени убиени од партнерите или членовите на семејството, во просек од еден милион луѓе

Просекот во Европската Унија изнесува 4,1 убиена жена на еден милион жители, што е значително помалку од стапката регистрирана во Македонија. Според Евростат, жените во ЕУ се убиени речиси двојно почесто од мажите кога сторителот е партнер или член на семејството.

Најниски стапки во Европската Унија, со исклучок на Малта, се забележани во Грција, Шпанија и Холандија. Во Грција стапката изнесува 1,8 жени на милион жители, во Шпанија 2, а во Холандија 2,3.

Податоците покажуваат дека во последната деценија бројот на вакви убиства во ЕУ останал релативно стабилен, со највисоко ниво во 2022 година, кога биле убиени 4,4 жени на еден милион жители.

На глобално ниво, според Обединетите нации, Африка е континентот со највисока стапка на фемицид – 30 жени на милион жители, како и со најголем апсолутен број жртви, со проценети 22.600 убиени жени во 2024 година. Во поширокиот европски регион стапката изнесува пет жени на милион жители.

Обединетите нации наведуваат дека 60 отсто од сторителите на фемицид во 2024 година биле интимни партнери или членови на семејството и ваквите убиства ги дефинираат како „фемицид“ – намерни убиства мотивирани од родово базирани фактори, како нееднакви односи на моќ, родови стереотипи и штетни општествени норми.