Министерот за локална самоуправа, Златко Перински, денеска ја посети Општина Аеродром, каде се работи на реализација на инфраструктурни проекти финансирани преку првиот владин повик за поддршка на општински проекти, соопштија од неговиот кабинет.

Во оваа најбројна скопска општина, како што е наведено во информацијата, во тек е санација и рехабилитација на скверот зад ТЦ „Капитол“, се обновуваат тротоарите на улица „23 Октомври“ во населбите Острово и Стар Аеродром, а од денеска започнаа да се реконструираат и тротоарите на улица „Анастас Митрев“ во населба Мичурин. Министерот Перински заедно со градоначалникот Дејан Митески, посетија дел од локациите каде се одвиваат градежните зафати и констатираа дека изведбата на терен се одвива непречено.

Согласни беа дека обновата на тротоарите ќе придонесе за зголемена безбедност и комфор за пешаците и дека интервенциите се доказ за посветеноста да се работи на решенија кои го подобруваат квалитетот на секојдневието на жителите, користејќи ја поддршката од централната власт на ефикасен и одговорен начин.

На Општина Аеродром на првиот владин повик одобрени и беа девет проекти, а на вториот, Општината веќе поднесе апликативни формулари за шест проекти.

Перински при теренската посета на Аеродром истакна дека градежниот бум во општината е потврда дека партнерството меѓу централната и локалната власт не е само административна формалност, туку двигател на вистински промени. Тој беше дециден дека синергијата ќе продолжи, уште поинтензивно, уште поцврсто, затоа што преку соработка и меѓусебна поддршка се создаваат услови за траен и одржлив развој на општините и подобар живот за граѓаните.

Утре домаќин на иницијативата „Каде што срцето е дома“ ќе биде Општина Центар, во чии рамки министерот ќе одржи средба со градоначалникот и членовите на општинскиот Совет.

Финансиската полиција ја тресе прилепската болница, а  во тек се претреси на осум локации.

„Основното јавно обвинителство Прилеп постапува во предистражна постапка поради сомненија за кривично дело Злоупотреба на службена положба и овластување, а поврзано со финансиското работење на болницата. Обезбедени се наредби за претрес на осум локации, а дејствијата ги презема Управата за финансиска полиција“, информираа од Обвинителството.

По претресите, предистражната постапка ќе продолжи со други дејствија за обезбедување докази.

Откако вчера пратеничката група на Левица поднесе Интерпелација за работата на министерот за внатрешни работи, Панче Тошковски, за пожарот во дискотеката „Пулс“ во Кочани, денес се огласи и претседателот на партијата и пратеник Димитар Апасиев.

Апасиев, во објава на социјалните мрежи, наведува дека досега, при секоја голема трегедија, актуелните министри си поднесувале оставки, кои потоа премиерите како што посочува „(Груевски и Заев) „не им ги прифаќаа!? Во Србија дури падна и Владата за трагедијата со 15 загинати во Нови Сад!“, подвлекува Апасиев.

„Но, овој бескрупулозен министер, со образ ѓон, кој е познат како “адвокат на урбаната мафија” – нема ниет да ја сфати суштината на оставката од морални причини, иако МВР и те како е криво за она што се случи во Кочани, каде што загинаа 60-на луѓе, а над 200 се повредени! Овој послушник на премиерот, има само една задача – да ја заташка истрагата со цел ниеден актуелен функционер-вмроид да не одговара! Затоа, ние му поднесовме Интерпелација и со него ќе се соочиме машки на собраниска седница“, пишува Апасиев на социјалните мрежи.

Интерпелацијата за Тошковски која вчера ја поднесе Левица, како што истакнуваат е затоа што од позиција на министер, грубо ја занемарил и несоодветно ја извршувал својата јавна функција, постапувајќи нестручно, неодговорно и непрофесионално што според Левица довело до низа противзаконски дејствија, скандали и кадрови промашувања во МВР.