Македонија
Втора пресуда за „Монструм“

Кривичниот суд денеска треба да донесе втора пресуда за случајот „Монструм“ за петкратното убиство кај Смилковското Езеро што се случи на 12 април 2012 година.
Алил Демири, Африм и Агим Исмаиловиќ се обвинети за тероризам и за нив Обвинителството побара доживотен затвор. Од нив, првите двајца се во бегство во Косово.
Хаки и Фејзи Азири се гонат за помагање во тероризмот, а за нив Обвинителството бара затворски казни од 9 до 10 години за едниот и 15 години затвор за другиот.
Петтиот обвинет, Сами Љута, се очекува да добие ослободителна пресуда поради немање докази за вмешаност во настанот.
Во петкратното убиство што се случи во пресрет на Велигден беа убиени четири момчиња на возраст од 18 до 21 година од населбата Радишани: Филип Славковски, Александар Наќевски, Цветанчо Ацковски и Кире Трпковски, како и 45-годишниот рибар Борче Стевковски од селото Црешево.
Ова ќе биде втора пресуда изречена за „Монструм“ од Основниот кривичен суд во Скопје. Во првиот процес, сите се гонеа за тероризам и добија доживотни затворски казни. Врховниот суд во 2017 година ги усвои жалбите на обвинетите и го врати случајот на повторно одлучување за утврдување на фактичката состојба.
Предметот се врати на почеток, а го презеде тогашното специјално јавно обвинителство (СЈО) поради тоа што постоеја прислушувани разговори поврзани со предметот. Обвинителката Фатиме Фетаи во завршните зборови кажа дека генерално „бомбите“ не откриле некоја нова вистина за случајот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Фото) Герасимовски: Реконструкцијата на салата Работнички во завршна фаза

Градоначалник на општина Центар, Горан Герасимовски, изврши увид во градежните активности во спортската сала „Работнички“, придружуван од Атлетската федерација на Македонија, Велосипедската федерација, Училишниот спортски сојуз, Шаховската, Одбојкарската, Карате, Џудо и Кајак федерациите, како и од ЗСД „Работнички“ и ОК „Работнички“.
При увидот, констатирано е дека 80 проценти од реконструкцијата се завршени.
Поставен e централен семафор, а целосно се завршени осветлувањето и озвучувањето во салата. Се комплетираат трибините. Сите приоди се изведени, тоалетите се целосно опремени, се прават подготовки за поставување подно греење, а инсталациите и горниот простор наменет за федерациите се финализираат, велат од Општината.
„По 50 години, Работнички добива нов лик и нови услови за спортски активности, согласно ФИБА стандардите. Федерациите конечно ќе добијат современи услови за работа, а нашите кошаркари место за тренинг и натпревари. Скопје добива модерна спортска сала, КК Работнички свој дом,“ рече градоначалникот Герасимовски.
Со завршувањето на реконструкцијата, салата „Работнички“ ќе стане современ спортски центар, со уреден терен, нови трибини, функционални соблекувални и административен дел за спортските федерации.
Македонија
„Во вториот круг се бориме за 17 места, граѓаните масовно да излезат на гласање“, повика СДСМ

„СДСМ ја продолжува изборната кампања за вториот круг, во кој се бориме за 17 градоначалнички места. СДСМ докажа дека на овие избори има одлични кандидати кои ја добија довербата од граѓаните. Тие освоија повеќе од 155.000 гласа, и ги повикуваме сите кои ја препознаа чесната понуда на СДСМ и чесните кандидати да излезат во вториот круг“, велат од СДСМ.
„СДСМ ги повикува сите граѓани кои гласаа за другите кандидати што не влегоа во вториот круг, да дадат поддршка на нашите кандидати. Тоа се луѓе кои ќе работат во интерес на сите граѓани, кои им служат пред сè на граѓаните, нивните интереси и барања.
Нашите кандидати имаат реални програми и план за реализација на ветеното, наспроти кандидатите на ВМРО-ДПМНЕ кои докажано не реализираат ништо од ветеното“, се додава во соопштението на СДСМ.
Македонија
(Видео) Митески за алармантната состојба со отпадот: Кога безобразноста и дрскоста се присутни – мораме да вратиме со здрав разум!

„ЈП „Комунална Хигиена“ Скопје под раководство на Данела Арсовска е надлежна за собирање на смет, празнење на контејнерите и чистење на општините на територијата на Град Скопје. Истите, за таа работа се платени од граѓаните на Аеродром“, вели актуелниот градоначалник на Аеродром, Дејан Митески.
„Во изминатиот период или повеќе од 10 дена не се празнат контејнерите на територијата на општина Аеродром и не се подигнува отпадот од домаќинствата во Лисиче.
Ние како општина поднесовме кривична пријава до Основното Јавно Обвинителство – Скопје, како и до Министерството за внатрешни работи. Одговорноста има име и презиме и таа мора да се детектира.
Од страна на комунални инспектори на општината ги казнивме два пати по 80.000 евра, но попусто, кај нив не владее здравиот разум.
Надвор од нашите надлежности, се организиравме да го исчистиме Аеродром! Чистиме насекаде, од Долно Лисче до Мичурин. Благодарност до општините: Илинден, Зелениково, Сопиште како и до многуте општествено-одговорни компании кои помагаат во целиот процес.
Ќе издржиме уште 10 дена – Аеродром ќе го исчистиме!“, додава Митески.