Македонија
Второ издание на Националниот саем за храна и пијалоци „Вкуси ја традицијата“, претставени 400 изложувачи со над 2000 традиционални производи

Денеска во Градскиот парк, се одржува второто издание на Националниот саем за храна и пијалоци „Вкуси ја традицијата“.
Настанот е во организација на Министерство за земјоделство, шумарство и водостопанство со поддршка од Слоу Фуд Македонија и Германското друштво за меѓународна соработка (ГИЗ), а се одржува под мотото „Taste life, taste tradition“ односно „Вкуси го животот, вкуси ја традицијата“.
Ова е втора година по ред да се одржи саем со ваков обем, на кој се претставија повеќе од 400 производители, со над 2000 домашни производи, кои го презентираат македонското земјоделство и гастрономија.
„Денеска, овде, ја славиме традицијата, но истовремено ја испраќаме и пораката дека зголемување на домашното производство на земјоделски производи и храна е еден од најважните приоритети на Владата. Економската и енергетската криза покажаа колку е важно да произведуваме доволно за дома, но и за извоз, за да ја зајакнеме економијата. Тоа подразбира стратегија која опфаќа повеќе сегменти, од модел на субвенции, капитални инвестиции, советодавни услуги, европски фондови до вложување во човечки ресурси. Затоа, презедовме низа мерки за поддршка на домашното производство на храна, како што е новиот модел за субвенции, капитални инвестиции во водостопанството, поддршката за малите производители на храна, за малите семејни винарии, за младите земјоделци, за жените земјоделки и други мерки. “ потенцираше премиерот Ковачевски.
На настанот, чиј домаќин беше министерот за земјоделство, шумарство и водостопанство Љупчо Николовски.
Присуствуваа бројни гости, претставници на Владата, дипломатскиот кор како и гости од странство, меѓу кои министерката за земјоделство на Србија, Јелена Танасковиќ.
„Овој саем има за цел да ја зачува традицијата, да останат засекогаш зачувани рецептите од нашите баби. Сите оние стари рецепти, запишани во тефтерите кои се предавале од генерација на генерација, како дел од миразот на невестите, сите тие рецепти кријат богатство. Од нив извира љубовта со која нашите баби меселе домашен леб, правеле највкусна зимница, во старите казани се варела домашна ракија, се правело домашно вино. Сѐ има таму. И нашето минато и нашата иднина. Е тоа СЕ денеска го имаме овде, распослано на тезгите на малите производители-чувари на традицијата, чувари на локалното, на домашното, на оригиналното“ рече министерот Николовски.
Националниот саем се одржува втора година по ред во заедничка соработка со Слоу Фуд Македонија, а прв пат со поддршка на Германското друштво за меѓународна соработка (ГИЗ).
Саемот дишеше во ритамот на домашната македонска музика, посетителите уживаа во вкусовите на тазе подготвена храна, се пробуваше од се по малку, за да може да се почувствува целиот тој колорит од бои, вкусови, мириси, звуци, детски џагор и насмеани лица. За сѐ да биде совршено, се погрижија нашите соработници малите производители, кои на своите тезги нудеа оригинални брендови на ајвар, пинџур, маџун, намази, слатка, сирења, кашкавали, домашни сокови и разни други напитоци, подготвени по традиционални рецепти. Во името на сите нив се обрати младиот земјоделец Филип Димкоски од Прилеп, кој е дипломиран земјоделски инженер и производител на храна.
На просторот во Градски парк, беа поставени 80 штандови, се готвеше вкусна традиционална храна од познати готвачи, разиграно беше и детското катче, со цел на децата одблизу да им се претстават домашните земјоделски производи, храна, пијалоци и автохтони сорти на семиња. За целосна позитивна атмосфера, посетителите освен во вкусовите на домашна храна и пијалоци уживаа и во звуците на музичката етно група „Баклава“.
Националниот саем „Вкуси ја традицијата“ е уште една успешна приказна која произлезе од одличната соработка на Министерството за земјоделство, шумарство и водостопнаство и малите производители, младите земјоделци и жените земјоделки.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Условната казна за случајот со терапијата за рак е непочитување на жртвите, рече Андоновска

Пратеничката Викторија Андоновска од ВМРО-ДПМНЕ денеска оцени дека условната казна изречена за злоупотребата на терапијата за пациенти со рак претставува „потценување на интелигенцијата на народот и непочитување на жртвите“.
„Со години пациентите добивале физиолошки раствор наместо вистинска терапија. Додека тие мислеле дека се лекуваат, тие всушност умирале,“ рече Андоновска.
Таа додаде дека според обвинението, со оваа злоупотреба е направена штета од 2.2 милијарди денари врз буџетот, а истовремено стотици пациенти биле лишени од можност за продолжување на животот.
Андоновска порача дека по ваква пресуда во нормални околности би следеле разрешувања и оставки во судскиот систем, кој, како што нагласи, е „зрел за ремонт“.
Македонија
Засилен систем за енергетска транзиција – стартува Единица за техничка поддршка

Министерството за енергетика, рударство и минерални суровини поддржа формирање на Единица за техничка поддршка (ЕТП) чија цел е помош во координација на процесот на енергетска транзиција.
ЕТП ќе претставува клучна алка во поврзувањето на сите релевантни чинители: државните институции, јавните претпријатија, приватниот сектор, синдикатите, регулаторните тела и меѓународните партнери.
„Со формирањето на оваа Единица воспоставуваме јасен систем за поддршка на целиот процес, координација, следење и дијалог со сите засегнати страни. Целта е да обезбедиме забрзана и поорганизирана транзиција, со конкретни резултати и со целосна отчетност пред јавноста,“ порача министерката Сања Божиновска.
„Процесот на праведна транзиција е сложен и бара целосна координација, одговорност и заедничка работа. Нашата земја има амбиција да постигне јаглеродна неутралност до 2050 година и да го напушти јагленот како ресурс за производство на електрична енергија. Но еднакво важно е да се осигураме дека ниту една заедница или поединец нема да биде запоставен,“ нагласи министерката Божиновска.
ЕТП ќе функционира под надзор на Министерството за енергетика, а во неговиот состав се вклучени експерти од области како енергетика, комуникации и проектен менаџмент.
„Само преку систематски и транспарентен пристап можеме да ја обезбедиме довербата на граѓаните и поддршката на сите засегнати страни. Формирањето на оваа Единица е чекор напред во градење на силна институционална основа за успешна и праведна енергетска транзиција,“ додаде министерката Божиновска.
Македонија
СДСМ: Учебници сè уште нема, потребно е итно решение

СДСМ денеска преку портпаролката Богданка Кузеска потсети дека е поминат еден месец од почетокот на учебната година, а голем дел од учениците сè уште немаат учебници.
Од партијата посочуваат дека дел од учениците се приморани да учат без учебници, а дел располагаат со стари и оштетени изданија. Родителите не треба да печатат материјали дома, ниту наставниците да импровизираат, велат од СДСМ.
Според нив, обврска на Министерството за образование и наука е да обезбеди учебници навремено за сите ученици. Од таму бараат итно да се најде решение и учебниците да бидат доставени во најкраток рок.