Македонија
Вчерашното невреме во Прилеп направи огромни штети врз земјоделските површини

Невремето што вчера зафати повеќе населени места од Прилепско зад себе остави катастрофални последици. Огромни се штетите на земјоделските површини во атарот на селата Мало и Големо Коњари, Кадино Село, Галичани, населбата Варош и повеќе други населени места. Сепак, под налетот на стихијата најтешки се последиците во Мало и Големо Коњари, каде што речиси 100 отсто се уништени земјоделските производи.
На површина од 600 хектари речиси целосно се уништени насадите со тутун, пиперки, пченка и жито. Жителите од овој дел на Прилепското Поле велат дека во последните 25 години не паметат вакво невреме. Нагласуваат дека штетите на земјоделските производи се 100 отсто и бараат најбргу што може Комисијата за утврдување на настанатите штети да излезе на терен. Очекуваат помош од државата, во спротивно, како што велат, ќе биде доведена во прашање нивната егзистенција. Покрај тоа, поучени од искуствата во годините наназад, земјоделците се плашат дека повторно може да бидат изиграни и да не ги добијат парите од проценетета штета.
„Во 2010 година град ми го уништи родот на површина од 10 хектари посеани со пченица. Дојде комисија на терен, но ништо од тоа. И ден-денеска ги чувам документите, не добив никакво обесштетување. Сакам да кажам, да не остане и ова само на збор. Овој народ овде живее само од земјоделство. Не сме ние поединци, имаме семејства, имаме деца што студираат на факултет. Од ова живееме, од ова егзистираме. Ве замолуваме како градоначалник сериозно да биде сфатена работата“, рече Тони Петкоски, еден од земјоделците од Мало Коњари кои претрпеа големи штети.
И во Големо Коњари сликата е идентична. Жителите кажуваат дека невремето сè им собрало, а градот со големина на орев, освен што ги уништил тутунот и другите земјоделски култури, направил штета врз покривите на куќите, а настрадале и поголем број домашни птици, пајки и кокошки.
По увидот на терен и затечената катастрофална слика, градоначалникот Илија Јованоски рече дека штетите се огромни. Истакна дека Прилеп и тој како градоначалник на проблемот ќе му пристапат максимално сериозно и ќе направат сè што е во нивна надлежност земјоделците да ја добијат неопходната помош. На земјоделците им порача дека средствата ќе бидат правилно распределени.
„Ги разгледавме штетите во атарите на Мало и Големо Коњари и навистина ми е жал за тоа што го видовме. Штетите на земјоделските производи се огромни. Оштетени се повеќе од 600 хектари и оштетувањето е максимално, 100 процентно. Ќе направиме сè што е во наша надлежност да се добијат што поголеми средства за штетата. За таа цел, апелирам до сите вас, да поднесете барање до Општина Прилеп, со кое, покрај личната карта и трансакциската сметка, ќе доставите и имотен лист. Доколку го немате, со двајца сведоци потпишани на нотар, ќе дадете изјава дека е тоа ваша нива за да може комисијата да ја определи штетата, а сите нотарски трошоци ќе ги плати Општина Прилеп. Ве уверувам дека нема потреба никој да стравува оти ќе добие помалку од утврдената штета. Ќе побараме од водостопанството да ве ослободи од трошоците за наводнување. Ќе разговарам со министерот за земјоделство и ќе му укажам дека штетите се толку големи што треба да биде прогласена елементарна непогода“, рече Јованоски на средбата со жителите од Мало и Големо Коњари.
Заедно со градоначалникот во посета на погоденото подрачје беа и раководителот на подрачната единица за земјоделство, Зоран Пачешкоски, и претседателот на Комисијата за процена на штетите од елементарните непогоди при Советот на Општина Прилеп, Жарко Северкоски.
Пачешкоски рече дека Комисијата за утврдување на штетите е веќе излезена на терен и побара од земјоделците веќе од утре во Општина Прилеп да доставуваат барања, имотен лист од нивите и копии од трансакциска сметка и лична карта.
Градоначалникот Јованоски се сретна и со тутунопроизводителите од населбата Варош, каде што вчерашното невреме исто така им нанесе огромни штети на површините засадени со тутун.
Инаку, ова е вторпат во овој месец силно невреме да зафати дел од Прилепското Поле. Според информациите од Комисијата за процена на штетите формирана по првото невреме што се случи на 9.7.2018 година, досега до Општина Прилеп се доставени 105 барања за обесштетување на земјоделците.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Фетаи жестоко го нападна Ахмети: Лицемерно е да зборувате за достоинство, додека замижувавте пред злосторства

Вицепремиерот за добро владеење Арбен Фетаи, остро реагираше ден по изјавата на лидерот на ДУИ, Али Ахмети, кој оцени дека само Арбен Таравари сфатил дека позициите на Албанците во Владата се понижувачки. Фетаи го обвини Ахмети за лицемерие и му порача дека тој „не е ничиј слуга“.
„Ахмети рече дека Арбен Таравари разбрал оти Албанците во Владата го понижиле и девалвирале својот народ. Колку дрско лицемерие. Ахмети, јас не сум ничиј слуга. Чувајте го овој епитет за себе, вие кои посветено им служевте на антиалбанските сили и го легитимиравте секое злосторство врз Албанците“, напиша Фетаи на социјалните мрежи.
Тој постави и неколку директни прашања до Ахмети, обвинувајќи го за молк и неактивност во клучни моменти за албанската заедница.
„Каде бевте кога вашите министри уапсија мајка и ќерка Албанка лажно обвинети за исламистички тероризам? Дали некогаш сте проговориле кога државните структури убиваа албански патриоти? Дали кренавте прст кога толпи хулигани тепаа Албанци по улиците на нашите градови? Каде беше тогаш вашето достоинство?“, праша Фетаи.
Во неговата реакција, Фетаи го обвини лидерот на ДУИ дека ја прифатил агендата на ВМРО-ДПМНЕ и ги изневерил интересите на Албанците.
„Ти си тој што дозволи институциите финансирани од нашите даноци да ги навредуваат Албанците на национална основа. Ти си тој што прифати „Скопје 2014“ како национален проект и лавот на ВМРО-ДПМНЕ како илирски симбол. Замижувавте пред манипулациите со пописот. Испразнивте цели региони од Албанци. Никогаш во историјата немало поголемо понижување, повеќе предавство и мизерија отколку за време на вашето мрачно владеење“, порача Фетаи.
Според него, ДУИ единствено успеала во „збогатување на тесен круг луѓе“, додека народот, како што рече, останал да страда.
„Албанците не забораваат. Албанците не простуваат. Вашиот проблем е сметката – и таа ви тропа на врата“, заврши Фетаи.
Македонија
ВМРО-ДПМНЕ: СДСМ го понижи културниот сектор и сега нема кредибилитет да зборува за достоинство

Од владејачката ВМРО-ДПМНЕ остро реагираа на денешната изјава на СДСМ, оценувајќи ја како „дрзок обид за дефокусирање на јавноста“ токму на големиот христијански празник Велигден.
„СДС денес, кога се слави Велигден, повторно се обидува дрско да го пренасочи вниманието од катастрофалното наследство што ѝ го остави на Македонија во културата. Јавноста добро памети кој ја газеше културата, кој ја претвори во мрежа на партиски вработувања и кој го користеше Министерството за култура како алатка за наградување на блиски личности и фаворизирани ‘уметници’“, соопшти ВМРО-ДПМНЕ.
Според нив, сегашната власт покажува поинаков пристап, транспарентност и отчетност.
„Извинувањето на именувано лице е коректен гест што јасно покажува разлика во пристапот. За разлика од времето на СДС, кога навредите и дисквалификациите врз уметници и институции беа секојдневие, денес имаме отчетност, одговорност и сериозен однос кон културата“, велат од партијата.
Од ВМРО-ДПМНЕ најавуваат дека ќе продолжат да работат во интерес на сите кои навистина придонесуваат во културата.
„Ќе продолжиме да ја градиме културата врз вистински вредности – без партиски кланови и без привилегирани. Ќе има поддршка за сите што творат и вложуваат, а не за политички миленици“, велат од владејачката партија.
Во реакцијата се наведуваат и конкретни критики кон поранешните министри и функционери од СДСМ, обвинувајќи ги за финансиски злоупотреби, непотизам и партиски фаворизирања.
„Во времето на СДС, грантовите се делеа без јасни критериуми, а дел од тие средства завршуваа кај лица блиски до партијата – дури и за проекти што никогаш не се реализираа. Последната министерка за култура беше под лупа поради злоупотреби, а институциите добиваа пари според политичка подобност“, тврдат од партијата.
Во реакцијата се посочува и дека функционерите на СДС користеле државни ресурси за лични цели, додека одговорноста била избегнувана.
Македонија
Со БМВ-то „летал“ со 142 км/ч кај Ранковце, полицијата го приведе

Полициски службеници од ОВР Крива Паланка вчера го привеле 47-годишниот Т.М. од Крива Паланка, откако бил фатен како управува со „БМВ“ со дупло повисока брзина од дозволената на патот кон селото Гиновце.
Како што информираа од Министерството за внатрешни работи, возачот бил застанат во 11:30 часот, откако полициска патрола регистрирала дека се движел со 142 километри на час, на дел од патот каде максималната дозволена брзина е 70 километри на час.
„Возачот веднаш беше исклучен од сообраќај и задржан во полициска станица. По целосно документирање на случајот, против него ќе биде поднесена соодветна пријава за безобѕирно управување со моторно возило“, велат од МВР за нашиот медиум.
Против Т.М. ќе биде поднесена кривична пријава по член 297-а од Кривичниот законик, кој се однесува на безобѕирно управување со моторно возило.