Македонија
Генералка викенд – над 20.000 волонтери ќе чистат на повеќе од 500 локации во Македонија

На 9, 10 и на 11 мај петти пат ќе се одржи најголемата годишна национална акција за собирање отпад – ГЕНЕРАЛКА ВИКЕНД (волонтерска акција од граѓаните за граѓаните), создадена од „Мен енд маунтен“.
Акцијата е поддржана и од ЗЕЛС, Црвениот крст и од Министерство за животна средина. Над 20.000 волонтери ќе ја чистат нашата татковина на повеќе од 500 локации во сите општини во земјата вклучувајќи над 600 организации, институции и компании, еколошки, граѓански, спортски здруженија, пензионерски организации, јавни институции, локални и урбани заедници, градинки, училишта, факултети, волонтери и национални паркови.
Официјалното отворање на тридневна национална акција за чистење отпад – ГЕНЕРАЛКА ВИКЕНД ќе биде на 9 мај на скопскиот акведукт со почеток во 9 часот. Повеќе од 200 волонтери ќе ја исчистат околината на овој исклучително важен историски споменик.
Во пресрет на екоакцијата со видеопорака се огласи и претседателката Гордана Сиљановска-Давкова, која апелира до граѓаните да се вклучат: „Го раскинавме пријателството со планетата, ги игнорираме нервозните предупредувања на природата и не сакаме да се соочиме со тешката еколошка криза. Постојано зборуваме за зелени политики, а живееме во сиво-црна реалност на убиствен воздух, загадени езера и реки, опустошени шуми и контаминирана почва. Природата не може да биде жртва на профитната агресија. Крајно време е да трчаме маратон кон поздрава животна средина и да склучиме примирје со природата. Доколку сакаме здрава иднина, треба сите на 9, 10 и на 11 мај да се обединиме во најголемата еколошка акција ГЕНЕРАЛКА ВИКЕНД како доказ за национална одговорност и еколошка будност. Грижата ветува цврсти промени и верувам дека годинава ќе покажеме уште поголема еколошка зрелост доколку се вклучат повеќе волонтери за чиста и здрава животна средина“, вели Сиљановска-Давкова.
Со поддршка на Министерството за образование и наука и УНИЦЕФ првпат ГЕНЕРАЛКА ВИКЕНД ќе биде вклучена и во едукативниот проект „Екочас“.
Учениците од сите училишта во земјата ќе добијат домашна задача на 9 мај заедно со наставниците и професорите да ги исчистат училиштата, на 10 мај учениците заедно со своите семејства ќе ги чистат домовите и просторот околу нивните живеалишта, а на 11 мај учениците заедно со семејствата ќе ги чистат парковите и пикник-местата во нивното опкружување. Нивна задача е да го фотодокументираат чистењето и на првиот школски час да ги презентираат резултатите.
Врз основа на меморандумот во траење од 10 години, кој Министерство за земјоделство, шумарство и водостопанство и „Национални шуми“ го склучија со „Мен енд маунтен“, секоја година по завршувањето на екоакција ГЕНЕРАЛКА ВИКЕНД, во ноември се одржува вториот дел од акцијата наречена СОНЧЕВА ГОРА, што подразбира пошумување државно земјиште.
На секои 10 килограми собран отпад се посветува по едно дрво од годишните планови за пошумување. Во рамките на овие пошумувања во изминатите години беа засадени над 120.000 садници на разни локации: околу езерото „Младост“ во Велес, селото Ќојлија во општина Петровец, во близина на мегалитската опсерваторија „Кокино“ и во општина Старо Нагоричане.
Во изминативе четири години беа собрани 1 милион килограми отпад за време на ГЕНЕРАЛКА ВИКЕНД, досега учество зедоа над 44.000 волонтери, исчистени беа повеќе од 1000 локации и беа засадени над 120.000 дрвја.
Овој единствен масовен еколошки настан, не само во земјата туку и на целиот Западен Балкан, испраќа моќна и алармантна порака дека загадувањето стана најголемиот непријател за граѓаните. Идејата на ГЕНЕРАЛКА ВИКЕНД е да се поткрене екосвеста помеѓу граѓаните и со здружени сили да се степенува важноста за позитивни промени кон почиста животна средина.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Филипче: Лажниот патриотизам на ЗНАМ заврши како приватен бизнис-проект

Претседателот на СДСМ, Венко Филипче, на средбата со општинската организација на СДСМ во Неготино, посочи дека лажниот патриотизам на движењето ЗНАМ завршило како приватен бизнис проект. Тој упати остра критика до раководството на ЗНАМ и претседателот Максим Димитриевски, по денешните обвинувања.
Филипче нагласи дека Димитриевски ја изневерил довербата на граѓаните со лажен патриотизам, кој подоцна се покажал како параван за лични интереси.
„Во 2021 година, некои луѓе се одвоија од СДСМ и отидоа во ЗНАМ. Тогаш, тогашниот претседател на ЗНАМ и градоначалник на Куманово продаде еден лажен патриотизам. Излегуваше на бугарска телевизија, кажуваше „јас сум патриот“, го спомнуваше Гоце Делчев, ја спомнуваше НОБ. Му успеа манипулацијата – да се претстави како патриот и да ги привлече и излаже нашите членови, нашите симпатизери, па и други граѓани. И што излезе? За што се борел? За бизнис интереси. Што му била целта? Само бизнис да прави, пари да прави од позиција на градоначалник,“ изјави Филипче.
При тоа, Филипче повика на враќање на разочараните членови во СДСМ.
„Упатувам апел до нашите членови кои се излажаа и гласаа за ЗНАМ, да се вратат дома. Тука им е домот, во СДСМ. Да не се лажеме дека една мала група луѓе ќе манипулира само за сопствени финансиски интереси“, рече Филипче.
На средбата, Филипче ја посочи и, како што рече, недоследноста во однесувањето на Димитриевски во однос на ДУИ.
„Нели ДУИ беа предавници и криминалци, а со кого го изгласал Димитриевски ДУП-от во Куманово? Гледајте ги и двојните стандарди на премиерот, вика не може Таравари во Владата ако соработува со ДУИ, а Максим Димитриевски може да соработува со ДУИ, дополнително, за негови финансиски интереси. Какво лицемерие е ова?“ , потенцираше претседателот на СДСМ, Венко Филипче.
Македонија
Невреме во повеќе градови низ државата

Времето денес е променливо облачно и нестабилно со локален пороен дожд и грмежи. Во источните делови процесите беа во форма на невреме со пообилен пороен дожд, силен ветер и изолирана појава на град.
Невреме имаше во Велешко, Штип, Кавадарци, Неготино, Струмица, Богданци и во Дојран, јавува УХМР.
До крајот на денот времето ќе биде сончево со умерена облачност. Ќе дува слаб до умерен ветер претежно од југозападен правец. Во текот на ноќта ќе преовладува малку до умерено облачно.
Утре променливо облачно време со сончеви периоди. Ќе дува умерен, а во западните делови засилен ветер од југозападен правец. Попладне ќе има изолирана појава на нестабилност со пороен дожд, грмежи и засилен ветер. Минималната температура ќе биде во интервал од 5 до 12, а максималната ќе достигне од 20 до 28 степени.
Во Скопје, променливо облачно со сончеви периоди. Ќе дува умерен ветер од југозападен правец. Минималната температура ќе се спушти до 9, а максималната ќе достигне до 27 степени.
Во ноќта петок кон сабота и во сабота претпладне ќе биде нестабилно со локални поројни врнежи од дожд, кои наместа ќе бидат пообилни проследени со појава на грмежи. Преодно стабилизирање на времето ќе има во недела, а во понеделник се очекуваат повремени врнежи од дожд. Дневните температури од сабота ќе бидат во опаѓање.
Македонија
Учество на министерот Муцунски на неформалниот состанок во GYMNICH формат во Варшава

Министерот за надворешни работи и надворешна трговија, Тимчо Муцунски, утре во Варшава, Полска, ќе учествува на неформален работен ручек во т.н. GYMNICH формат – состанок на министрите за надворешни работи на земјите-членки на Европската унија и земјите-кандидати за членство.
Учеството на министерот Муцунски се остварува на покана од министерот за надворешни работи на Полска, Радослав Сикорски, во рамки на полското претседателство со Советот на ЕУ.
Дискусиите ќе бидат фокусирани на актуелните предизвици во европската надворешна и безбедносна политика, со посебен акцент на градењето отпорност кон хибридните закани.
Во рамки на престојот во Полска, министерот Муцунски ќе ја посети меморијалната поставка во Треблинка и ќе положи цвеќе на спомен-обележјето на депортираните македонски Евреи.