Македонија
Герасимовски: Ветеното кон пензионерите целосно исполнето, отворени три пензионерски клуба
Општина Центар за помалку од една година отвори три пензионерски клуба, со што го исполни ветувањето и барањето на пензионерите во предизборниот период. Градоначалникот на општина Центар, Горан Герасимовски, денеска го отвори пензионерскиот клуб кој го носи името на најмладиот партизан Миле Арсовски, кој со своите 16 години жестоко се борел за ослободување на Скопје.
„Денеска, за помалку од една година од мандатот, успеавме да го исполниме барањето на пензионерите во предизборниот период, кое се однесуваше на отворање три пензионерски клуба на локации што самите ни ги посочија. Навистина ми е чест и задоволство да соопштам дека овој пензионерски клуб го носи името Миле Арсовски, име на најмладиот народен херој, кој живеел во близина на оваа локација. Благодарение на храброста на нашите борци денес живееме во слобода и од нашите највозрасни граѓани слушаме за неизмерната љубов и пожртвуваност на партизаните кон татковината“, изјави Герасимовски.
Со отворањето на овој пензионерски клуб општината брои вкупно 8 клуба за пензионерите, што ја покажува нашата грижа и помош за оваа категорија граѓани.
Општина Центар минатата недела го отвори пензионерскиот клуб во просториите на ЈП „Паркинзи на Општина Центар“, каде што највозрасните граѓани од Крњево и Кале ќе може да се сретнуваат и дружат.
Општина Центар исто така за пензионерите го спроведува и проектот „Нега на стари лица во домашни услови“, со што обезбедува домашна нега од лиценцирани негуватели, физиотерапевти и психолози на 90 корисници со полни 62 години. Во соработка со Банката за храна, Општина Центар секој месец доделува пакети со храна и хигиенски производи за пензионерите со ниски примања.
Општината Центар ќе продолжи да работи силно и посветено за највозрасните граѓани во општината да имаат безгрижни пензионерски денови.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Вонредни инспекции на Детската клиника и во Козле ја бараат вината за смртта на 14-месечното дете
Државниот санитарен и здравствен инспекторат и стручна комисија, формирана од министерот за здравство, од утрово прават увид во Универзитетската клиника за респираторни заболувања кај децата во Козле и на Клиниката за детски болести за да се утврдат причините за смртта на 14-месечното дете, кое во саботата почина на Детската клиника. Министерот за здравство, Арбен Таравари, вели дека утрово имал состанок со директорот на Државниот санитарен и здравствен инспекторат.
„Првиот состанок што го имав утрово беше со директорот. За овој случај формирана е и стручната комисија и веќе е на терен. Од девет часот утрово на терен се и стручната комисија и Инспекторатот“, рече министерот Таравари.
Тој вчера потврди дека 14-месечното дете било вратено од Детската клинка, односно лекарите одбиле да го хоспитализираат. Родителите помош побарале на клиниката во Козле, каде што го примиле, но поради влошена состојба, било пренесено на Детската клинка, каде што и почина.
Министерството за здравство извести дека детето било примено со тешка респираторна инфекција, тешка општа состојба и засегнати витални функции. Настапило рапидно влошување на состојбата со отежнато дишење и пад на сатурацијата. Телото на детето е предадено на обдукција за која од Министерството очекуваат да ги утврди причините за смртта.
Директорот на Детската клиника, Реџеп Мемеди, вчера, на социјалните мрежи објави дека смртта на 14-месечното дете е голема трагедија за него и како родител и како доктор. Најави дека нема да остане мирен сè додека не ги дознае причините за смртта и додека не се побара индивидуална одговорност за случајот доколку се утврди пропуст.
Македонија
(Видео) Мицкоски – Вучевиќ: Во овие турбулентни времиња неопходно е да бидеме заедно
„Денес, тука во Скопје имавме значајна и искрена средба со премиерот на Република Србија, господинот Милош Вучевиќ, истакна македонскиот премиер Христијан Мицкоски.
Средбата како што вели била израз на заедничката желба за подобра иднина и зацврстување на врските помеѓу нашите две земји.
„Во срцето на нашите разговори беше разбирањето дека споделуваме многу повеќе од заедничка граница. Многу од граѓаните на двете земји споделуваат историја, култура, семејни врски и, најважно од сè, заеднички стремежи за просперитет и мир за нашите народи. Разговаравме за начините како да ја продлабочиме економската соработка, како да ги поврземе нашите луѓе и како да создадеме можности за идните генерации кои доаѓаат“, вели Мицкоски.
„Посебно се осврнавме на културната соработка и образованието. Се согласивме дека инвестирањето во младите е инвестирање во иднината. Кога нашите млади уште повеќе ќе се поврзат, ќе учат едни од други и ќе создадат заеднички проекти, тогаш сме сигурни дека регионот ќе оди напред.
Зборувавме за предизвиците со кои се соочува регионот. Во овие турбулентни времиња, неопходно е да бидеме заедно, да бидеме глас на разумот и да работиме кон стабилност и безбедност на целиот регион. Ја истакнавме важноста на дијалогот како единствен пат за решавање на спорови и недоразбирања.
Во однос на нашите европски аспирации, ја потврдивме заедничката визија дека иднината на регионот е Европската Унија. Знаеме дека патот до таму не е лесен, но веруваме дека со заеднички напори и поддршка можеме да ги исполниме критериумите и да ги донесеме придобивките од европската интеграција на граѓаните во регионот.
Исто така можам да кажам дека зборувавме во делот на енергетското поврзување на двете земји. Посебно ја истакнавме важноста од изградбата на гасниот интерконектор којшто ги поврзува или ќе ги поврзува во иднина двете земји. Бидејќи ние сме сега во фаза на завршување на тендерска постапка со којашто конечно ќе отпочне изградбата на интерконекторот со нашиот јужен сосед, за да обезбедиме дополнителна опција за снабдување на гас на Централна Европа. Овој интерконектор со нашиот северен сосед е исклучително значаен. Тоа беше еден од важните сегменти во нашите разговори“, истакна македонскиот премиер.
Во фаза сме, додаде Мицкоски „да го пуштиме во употреба или продуктоводот или во јавноста познат како нафтовод којшто ја поврзува нашата земја со нашиот јужен сосед. Цениме дека тоа би било добра опција, да истиот тој продуктовод или нафтовод биде поврзан и со нашиот северен сосед и на тој начин да обезбедиме уште еден коридор“.
Станало збор и за изградба на брзата пруга којашто е дел од Коридорот 10, којашто според Мицкоски претставува стратешки приоритет на Владата исто како што е и Коридорот 8.
„Но заеднички приоритет е изградба на Коридорот 10 и со нашиот северен сосед. Можам да кажам дека регионалното поврзување останува приоритет за двете држави и тоа регионално поврзување да биде дел од идното поврзување и интегрирање во рамките на Европската Унија.
Исто така ја отворивме темата за одржување на заеднички влади, нешто кое што го правиме вообичаено со владини седници, истото што го правиме и со другите наши соседи. Така што мислам дека односите помеѓу двете земји се на исклучително високо ниво и во периодот кој што следи истите треба да ги продлабочуваме.
Како македонска Влада нашата ориентација е многу пати повторена, ќе ја повторам и денеска, а тоа е да градиме добрососедски односи со сите наши соседи и нормално заеднички како регион да бидеме дел од Европска Унија“, посочи Мицкоски.
Македонија
Јаневска: Продолжуваме да градиме поквалитетно образование; по седум години, првпат навремено испорачани учебници за сите ученици
Задоволна сум од сработеното и најавувам дека продолжуваме со исто силно темпо, максимално посветени кон учениците, студентите, наставниците, професорите, исто како и во првите 3 месеци. Почнати се крупни промени и им благодарам на сите што учествуваат во нивното креирање и имплементирање. Имаме идентична цел и ќе продолжиме да градиме поквалитетно образование за подобра иднина на младите во својата земја.
Ова го истакна министерката за образование и наука, Весна Јаневска, на денешната прес-конференција, на која информира за резултатите од работата во првите 100 дена од мандатот на новата Влада во областа на образованието.
„Моето прво, а воедно и реализирано ветување, беше навремено достапни учебници за сите ученици. По седум години, првпат навремено се испорачани учебници за сите ученици. Над еден милион примероци беа ставени на училишните клупи, на првиот училиштен ден. Успеавме да изработиме и повеќе нови учебници и наставни материјали по предмети за кои до неодамна воопшто немаше никакво помагало – 10-ина во основното и 100-ина нови наслови во средното стручно образование“, рече Јаневска.
Информира дека Министерството се посвети и на инфраструктурата, па така во моментот се реализираат 36 капитални инвестиции во изградби и реконструкции на училишта, како и 40 помали санации на училишни објекти. Потсети дека почната е и етапна реконструкција на државните студентски домови. Градежни активности се реализираат во „Кузман Јосифовски-Питу“ и „Стив Наумов“ во Скопје во вредност од 17 милиони евра.
„Во 140 училишта е воведена квалитетна, економична и ефективна едносменска настава, а набргу бројот ќе се зголеми за 50-ина. Заедно со наставниците се изработуваат нови наставни програми од седмо до деветто одделение откако претходно беше стопирана концепцијата за основно образование во овие одделенија и се одделија предметите кои преку спојување на историјата со географијата и граѓанското образование ги обезвредни претходната влада. По цели 20 години, почнат е и процес на етапна изработка на нови наставни програми во гимназиското образование“, рече Јаневска.
Првпат во основните училишта се ангажирани над 1.000 образовни асистенти, а ќе се постапи и по дополнително пријавени потреби од страна на родителите и старателите во меѓувреме.
Јаневска информира дека се менува и законската регулатива заради повеќе и подобри образовни можности во Македонија.
„Пет закони се предмет на јавна дебата – за основно образование; за средно образование; за средно стручно образование и обука; за образование на возрасните; за национална рамка на квалификации, а уште други 5 набргу ќе треба да поминат преку филтерот на експертската јавност“, рече министерката додавајќи дека ја поништила и одлуката за основање факултет за здравствени науки на Меѓународниот универзитет во Струга, кој не ги исполнувал условите за почеток со работа.
Јаневска спомена дека буџетот на МОН пред три месеци е затекнат во минус од 5 милијарди денари, но со ребалансот дел од парите биле вратени во касата за да може да се сервисираат услугите и да се исплатат сите задоцнети обврски кон граѓаните, како и кон институциите, на кои, како што рече, срамно е да им должиме, потсетувајќи дека претходната влада не исплатила средства за учество во ПИСА 2022, за учество во програмата „Хоризонт“ на ЕУ и во „Фулбрајт“, програмата на САД.
„Целата негрижа, која постоеше до јуни, ја заменивме со 100-процентна посветеност кон факторите на образовниот процес. Ги стопиравме лошите политики, кои го намалија бројот на ученици за 17 илјади во изминатите 7 години. Покажуваме дека не сме сите исти и дека ако се сака, може да се направи повеќе за секој граѓанин на нашата заедничка држава“, додаде Јаневска.