Македонија
Герасимовски во „Соседска патрола“ со наставници, родители и претставници на МВР кај младите во Градскиот парк

Градоначалникот на општина Центар, Горан Герасимовски, синоќа, заедно со родители, наставници и претставници на Министерството за внатрешни работи и СВР Скопје беше во „Соседска патрола“ кај младите во Градскиот парк. Патролата е дел од кампањата на МВР и таа е насочена кон децата, нивната безбедност и среќа, велат од Општина Центар.
На средбата Герасимовски потенцира дека желбите на сите родители се исти, а тоа се среќни, безбедни и безгрижни затоа, посочи тој, дека како родител и функционер има поголема обврска да вложи максимални и лични напори во соработка со институциите тоа да биде исполнето.
„Верувам дека настанот што се случи во Белград сите нè стаписа и нè исплаши, затоа приоритет треба да ни бидат превенцијата и следењето на промените во развојот на нашите деца. Мислам дека од сите можни сфери и од сите можни аспекти треба да преземаме мерки за однесувањето, размислувањето и постапувањето на нашите деца во училиштето, надвор со другарите и другарките. Семејството е основното јадро што треба да го трасира вистинскиот пат по кој треба да се движат нашите деца. Вториот елемент е образовната институција, а можам да ве уверам дека нашите основни училишта интензивно работат на програми, обуки и работилници во кои активно ќе бидеме вклучени сите за ним да им обезбедиме весело детство, а нам спокојни денови“, истакна Герасимовски.
Притоа Герасимовски, потсетувајќи на пролетните тепачки во општината, упати апел до децата да внимаваат да однесувањето, да ги вреднуваат позитивните дружби и да не учествуваат, ниту да практикуваат девијантно и хулиганско однесување. На угостителите Герасимовски им порача да ги почитуваат законските норми и на малолетниците да ги послужуваат само со сок, а на родителите да не замижуваат при евентуални проблеми затоа што тие може да се решат доколку се реагира навреме ,во спротивно може да станат трагедија, соопшти Општина Центар.
„Блискоста, отворениот разговор преку укажување на грешките, како и квалитетните семејни односи, градат успешни и здрави генерации“, порача Герасимовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Собранието ќе формира комисија за избор на нов претседател на антикорупциската

Собраниската Комисија за прашања на изборите и именувањата во 12 часот ќе одржи седница на која се очекува да ја формира Комисијата за селекција на кандидати за нов претседател на Државната комисија за спречување на корупцијата (ДКСК).
Процесот следи откако на 5 август беше распишан јавен оглас, со рок за пријавување од 10 дена. Оваа постапка се спроведува по оставката на претходната претседателка Татјана Димитровска, која е обвинета за оддавање службена тајна и компјутерски фалсификат.
Според Законот за спречување на корупцијата и судирот на интереси, до изборот на нов претседател, функцијата ја врши заменик-претседателот на ДКСК. Новиот претседател мора да има најмалку десет години работно искуство, од кои осум во областа на борбата против корупцијата, владеењето на правото или добро управување.
Македонија
Свечена седница по повод 24 години од потпишувањето на Охридскиот рамковен договор

Во Владата ќе се одржи одбележување на 24 години од потпишувањето на Охридскиот рамковен договор.
По тој повод со почеток во 10:00 часот во Свечената сала во Владата на Република Северна Македонија ќе се одржи свечена седница на која ќе се обрати премиерот Христијан Мицкоски.
Настанот ќе биде пренесуван во живо на „Фејсбук“ и „Јутуб“ каналот на Владата.
Охридскиот рамковен договор беше потпишан на 13 август 2001 година помеѓу претставниците на тогашните најголеми политички партии и специјални претставници на ЕУ и на САД.
Македонија
Сончево и многу топло со мала локална облачност: максималната температура до 39 степени

Времето денеска ќе биде сончево и многу топло со мала локална облачност. Ќе дува слаб до умерен ветер од југоисточен правец. Минималната температура ќе биде во интервал од 13 до 21, а максималната ќе достигне од 32 до 39 степени.
Во Скопје сончево и многу топло со слаб до умерен ветер од југоисточен правец. Минималната температура ќе се спушти до 19, а максималната ќе достигне до 38 степени.
Времето во наредните денови
Ќе се задржи сончево и топло време со умерена облачност преку денот. Ќе дува слаб до умерен ветер претежно од југоисточен правец.