Судијата Даниела Алексовска Стојановска која требало да биде непристрасна и без партиски влијанија, не само што во нејзината кариера била пристрасна и работела по налог на СДС, туку во нејзиниот дом го сместила и општинскиот штаб на СДС во Ранковце, кажа денеска на прес конферанција Миле Лефков, пратеник и член на ИК на ВМРО-ДПМНЕ.

„Близината на судијката Даниела Алексовска Стојановска со СДС се гледа не само по нејзините пресуди против ВМРО-ДПМНЕ, туку и по тоа што на истите им отстапила простор за партиски штаб“, рече Лефков.

Фото: ВМРО-ДПМНЕ

„Очигледна е симпатијата на судијката Алексовска Стојановска кон СДС, штом како судија се дрзнала да отстапи простор за партиски штаб во нејзиниот дом. Ова се судиите на СДС, заради кои се потребни итни реформи во судството. Одговорност за слепите послушници на СДС во правосудството кои зацрнија цели семејства мора да има“, заклучи пратеникот Лефков.

Аеродром тоне во нечистотија. Неспособните градоначалници на ВМРО-ДПМНЕ Данела Арсовска и Дејан Митески целосно ја запустија некогаш најчистата и најзелена скопска општина, велат од СДСМ.

„Цели три години Аеродром личи на огромна дива депонија. Секојдневно сме сведоци на преполни корпи за џебен отпад кои делуваат како никогаш да не се исчистени.

Јавните површини меѓу зградите се полни со кабаст отпад кој со месеци стои на зелените површини на кои некогаш играа деца. Ѓубре на секој чекор можат да посведочат нашите сограѓани кои секојдневно упатуваат апели за редовно чистење на општината.

Ги потсетуваме градоначалниците од ДПМНЕ, Арсовска и Митески, дека добија доверба од граѓаните со ветувањата дека Аеродром ќе биде најчистата скопска општина.

Ветуваа реорганизацијата на службите за одржување на хигиената. Ова беше еден од неговите топ 7 приоритети за Аеродром. Секојдневие станаа и преполните контејнери во Стар Аеродром и околу трговските центри Скопјанка, Три Бисери, Бисер, Капитол, Лиса, Џевахир и други јавни површини со зголемена фреквенција на движење.

Јавно ги прашуваме Арсовска и Митески, имаат ли Град Скопје и Општина Аеродром градоначалници?“, пишува во соопштението на СДСМ.

Заменик-генералниот секретар на НАТО, Радмила Шекеринска, денеска на својот Фејсбук профил објави реакција откако неколку дена кружат објавите во кои се тврди дека интервенирала за пуштање на возачот Васил Јованов, осомничен за убиството на 22-годишната Фросина Кулакова, додека Обвинителството го истражувало за дрога.

Таа упати длабоко сочувство до семејството и блиските на Фросина.

„Најдиректно сакам да ги демантирам сите такви наводи – тие се целосна, безобразна и исконструирана лага за која не постои никаква основа.
Одговорно тврдам дека со ниту едно од споменатите лица немам никаков контакт, познанство ниту пријателство: ниту со сторителот ниту со неговиот родител, а уште помалку со судијката што одлучувала за неговите предмети. Со ниту едно! Дополнително, сите што ме познаваат го знаат мојот став за овие прашања. Како и сите вие, и јас се плашам кога мои блиски ја поминуваат „Партизанска“ (особено кај „Силбо“). Како многумина од вас, и јас сум реагирала на беснеењето на возачите што мислат дека правилата не важат за нив и дека нашите улици се писта за нивните комплекси и покажување „сила“. И никогаш, ама буквално никогаш не сум се јавила на никој за да побарам ургенција за каква било сообраќајна грешка. Никогаш! Некои пријатели ми замериле поради тоа (што не сум „им завршила работа”), но сум стоела зад мојот став, бидејќи искрено верувам дека неказнивоста води кон повторување на делата, а тоа значи само чекор до трагедија“, стои меѓу другото во објавата на ФБ профилот на Шекеринска.

22-годишната Фросина Кулакова пред четири дена беше прегазена од дваесет годишниот Васил Јованов, кој возел пијан, без возачка дозвола и минал на црвено светло, додека таа минувала на пешачки премин на Партизанска.

На 20-годишниот скопјанец осомничен за смртта на Фросина му беше определена мерка притвор од 30 дена, а за него и претходно имало кривични пријави за друга сообраќајна незгода и за недозволена употреба на дрога.