Македонија
Германската амбасадорка загрижена како без пасоши ќе се вратат Македонците што работат таму; Тошковски порача: ни требаат законски измени како со возачките

Министерот за внатрешни работи, Панче Тошковски, и заменик-министерот, Назим Буши, остварија работна средба со германската aмбасадорка, Петра Дрекслер.
На средбата Тошковски ги образложи преземените мерки со цел ублажување на процедурите за вадење лични документи, ја образложи потребата од итно носење измени во Законот за патните исправи по примерот на оној со возачките дозволи во делот на запазување на техничките рокови, со цел навремено спроведување на потребните процедури за набавка на патни исправи и, секако, почитување на меѓународното право и основното човеково право на слободата на движење.
На средбата амбасадорката Дрекслер изрази загриженост за големиот број македонски државјани што не поседуваат нови патни исправи, а кои се на привремена работа во Германија. Оваа категорија луѓе, доколку одлучат да се вратат назад со цел вадење нова патна исправа и доколку не успеат навремено да ја извадат поради техничката неможност во моментот, тие не би можеле да се вратат назад во СР Германија со старата патна исправа. За ова прашање, министерот Тошковски повторно истакна дека во моментот единственото решение е носењето на измените Законот за патните исправи.
На крајот од средбата соговорниците оставија простор и за потврдување на заложбите за интензивирање на меѓусебната соработка, особено во борбата со организираниот криминал, а воедно министерот Тошковски се заблагодари за досегашната соработка и големиот број донации и обуки за Министерството за внатрешни работи, особено за граничната полиција.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Оставката на Папазов помина на владина седница

Владата ја прифати оставката на градоначалникот на Кочани, Љупчо Папазов.
Советот на општината ќе треба да назначи в.д. градоначалник на Кочани, откога одлуката ќе биде објавена во „Службен весник“.
Инаку, Папазов ја поднесе оставката по пожарот во дискотеката „Пулс“ каде животот го загубија 59 лица, а околу 200 беа повредени и префрлени низ клиниките во земјава и странство.
Папазов по оставката беше приведен и одреден му беше притвор. Во куќен притвор се и неговите двајца претходници од градоначалничката фотелја.
Според истрагата, тројцата осомничени градоначалници на Кочани во периодот од 2012 година до 16 март кога се запали дискотеката, не ги извршиле своите правни обврски во согласност со Законот за заштитата и спасувањето, со што овозможиле кабарето „Пулс“ незаконито да продолжи со вршење угостителска дејност. За целиот овој период, како што беше истакнато, Општината примала уплати по основ на надоместок за угостителски објект.
Македонија
„Вреди“: Посакуваме Бектеши да ја докаже невиноста, не сакаме ниту еден Албанец да биде одговорен за Кочани

Коалицијата „Вреди“ посакува ексминистерот за економија од редовите на ДУИ, Крешник Бектеши да ја докаже својата невиност во случајот со лиценцата за дискотеката „Пулс“ во Кочани, без оглед на ривалството со Интегративците.
„Без разлика што сме лути политички противници, не сакаме ниту еден Албанец да биде одговорен за трагедијата во Кочани. Но, за тоа одлучуваат правосудните органи, а не политичките чинители“, велат од „Вреди“.
Понатаму додаваат дека ДУИ веќе се претвориле во партија чија единствена идеологија е одбрана на своите поранешни функционери. За таа нивна цел, како што додаваат, се подготвени да ги бојкотираат локалните избори и да се обидат да предизвикаат политичка криза.
„Кога ДУИ зборува за систем, треба да одговори на што точно мисли. На системот кој нивниот режим го создаваше 22 години, додека беа дел од сите Влади на СДСМ и ВМРО-ДПМНЕ? На Јавното Обвинителство на Ислам Абази? На бегалците од правдата Артан Груби и Прпарим Бајрами? На системот на владеење кој од голобради функционерчиња на ДУИ направи милионери на грбот на Албанците? На системот во кој имаше селективна одговорност за трагедиите со модуларната болница во Тетово, Ласкарци, Беса транс?“, се додава во соопштението на коалицијата на албанските партии која е дел од владејачката гарнитура.
Понатаму заклучуваат и дека колку и да се препелка ДУИ, колку и лажно да се претставуваат како фактор меѓу Албанците, политичкиот крај на ова нивно корумпирано раководство пристигнува.
Македонија
Обезбедувачот на Мицкоски за 50.000 евра оддавал службени тајни, приведен е

За 50.000 евра откривал полициски службени тајни од истрага. Припадникот на обезбедувањето на премиерот Христијан Мицкоски е во притвор.
Од Обвинителството објавија дека се гони за Оддавање службена тајна. Вечерта на 30 март, на паркин пред хотел во Велес, се сретнал со сведок во постапка и му покажал службени документи на МВР, што претставуваат службена тајна.
Обезбедувачот му дозволил на сведокот и да ги снима документите, а и му кажувал кој документ на што се однесува.
Обвинителството побара притвор во траење од 30 дена, што беше прифатено од страна на судот.
За ова кривично дело предвидена е затворска казна од најмалку една година.
Основното јавно обвинителство за гонење на организиран криминал и корупција укажува дека ниту лицата, ниту документите во овој предмет, не се поврзани со лицата и групата од Грчец, како што во текот на вчерашниот и денешниот ден објавија дел од медиумите.