Агенцијата за храна и ветеринарство на почетокот на овој месец спроведе вонредни контроли во игротеките во земјата.

Со контролите опфатени беа 92 игротеки, при што беше утврдено дека 16 од нив не се регистрирани во АХВ како оператори со храна, информираат од Агенцијата.

„Кај 8 инспекциските служби утврдиле дека не ги задоволуваат хигиенските барања, односно дека немаат имплементирано процедури на добра хигиенска пракса.
Кај 16 игротеки утврдено дека вработените немаат спроведено здравствени прегледи, а утврдени се и отстапувања во поглед на безбедноста на храната, при што се запленети и нештетно уништени 11,5 килограми млечни производи“, се потенцира во соопштението.
За утврдените недоследности, како што појаснуваат од Агенцијата, издадени се 19 решенија и наредени мерки за нивно отстранување, привремено се затворени 13 игротеки, а на 32 изречени им се глоби.

Премиерот на Албанија, Еди Рама, упати јавна поддршка за Северна Македонија и критики до Европската Унија што нашата земја се’ уште не ги почна преговорите за членство, додека денес тоа го направи Албанија.

За време на прес-конференцијата по отворањето на пристапниот процес за Тирана, Еди Рама изјави дека билатерализацијата на патот на една земја кон Европската Унија е болна работа, бидејќи ако се билатерализира овој процес само и се нанесуваат штети на таа држава.

„Со спречувањето на Македонија, а потоа и Северна Македонија, и се нанесе голема штета на државата, голема штета на луѓето и со тоа и голема штета на регионот“, истакна албанскиот премиер.

До ЕУ порача: Кажете и’ дека не ви се допаѓа нејзиното име кога ќе стане членка, но дозволете и’ да функционира како земја членка на ЕУ.

Рама изјави и дека Македонија беше пред 20 години неспорно ориентирана кон западната евроатлантска заедница, а сега работите се менуваат.

„Тажен сум што нашите браќа од Македонија се уште не може да влезат во фазата од преговорите во кои сега е Албанија, иако беше меѓу првите, ако не и прва, што го почна овој процес меѓу државите во регионот. Па кога зборувам за нашите понижувања затоа што три пати по ред бевме одбивани за почеток на пристапните преговори, тогаш се чувствувам некако засрамено затоа што морам да помислам на понижувањата на Северна Македонија. Тие го сменија името и за да можат да започнат преговори. Историјата не може да биде причина за запирање на пристапните преговори за која било земја“, рече Рама.

Во врска со заедничкиот пат на Албанија со Северна Македонија кој од денес се раздвојува Рама изјави дека двете држави низ годините биле како Владимир и Естрагон кои го чекаат Годо, а Брисел во тоа време изгледал како Семјуел Бекет.

Извештајот на Европската Комисија го потврди тоа што граѓаните на Скопје секојдневно го чувствуваат: јавниот превоз во Скопје е катастрофален, најлош во Европа, велат од СДСМ по извештајот што претходно беше објавен, а според којшто граѓаните на главниот град се меѓу најнезадоволните на европскиот континент од состојбата со автобусите.

Според опозициската СДСМ, локалната власт предводена од ВМРО-ДПМНЕ и градоначалничката Арсовска успеаја да го донесат Скопје на дното во Европа и во делот на транспортот и во секој можен поглед.

„Наместо да вложуваат во подобрување на услугите и модернизација, како што ветуваа, сведоци сме на епско потфрлање и тотален хаос во сообраќајот, што директно ги погодува жителите на Скопје. Советниците на ВМРО-ДПМНЕ намерно не гласаа за набавка на нови автобуси, Владата не презема ништо. ВМРО-ДПМНЕ бездушно ги остави скопјани да се справуваат со хаосот секој ден, само заради тоа што им пропаднаа бизнис зделките со Арсовска. ВМРО-ДПМНЕ создаде хаос во Скопје, тие се најголемите виновници за катастрофата која што му се случува на јавниот превоз и на целиот град“, се вели во соопштението на СДСМ.

Извештајот на ниво на европските градови покажува дека само 47 отсто од жителите на Скопје се задоволни од јавниот превоз во градот. Помало е задоволството само во Никозија, Белград, Подгорица, Тирана и во Рим. Најмногу граѓани изразиле задоволство од јавниот превоз во европските метрополи Виена, Хелсинки, Осло, Прага и Луксембург.