Македонија
Германска поддршка за земјата во Берлинскиот процес

Меѓупартиската парламентарна група за следење на имплементацијата на обврските од Берлинскиот процес и реформската агенда од Планот за раст, оствари средба со Михаел Рајфенштул, директор за Југоисточна Европа во Германското министерство за надворешни работи.
Претседателот на Групата и потпретседател на Собранието, Антонијо Милошоски, го истакна важниот момент за одржување на средбата, а тоа е формирањето нова германска влада, момент битен и за нашата земја и за Регионот. Во очекување се подобри резултати на германската економија, што има директно влијание кај нас и нашите соседи, со оглед на тоа што Германија е најважниот трговски партнер.
Исто така, како битно, Милошоски го издвои и вклучувањето на Парламентите во Берлинскиот процес, како додадена вредност. Берлинскиот процес го означи како порелевантен проект за приближување на Западен Балкан кон ЕУ од Проектот Отворен Балкан, кој не беше инклузивен, односно не ги вклучуваше Црна Гора и Косово, и со самото тоа не беше комплетен. Од друга страна, во Берлинскиот процес, кој започна во 2014 година, покрај шесте земји од Западен Балкан – Северна Македонија, Албанија, Србија, Босна и Херцеговина, Црна Гора и Косово, учествуваат и 9 земји членки на ЕУ, како и Велика Британија, која пак од јуни ќе го презеде претседавањето од Германија.
Во својата прва посета на Скопје, политичкиот директор Рајфенштул, истакна дека е тука, пред сѐ, да слуша, да ги слушне овдешните искуства, впечатоци, и да научи од нив. Изрази задоволство од неодамнешното формирање на оваа Група, која е политички мешана, што е показател за демократијата. Тој информира дека германската новоформирана влада се соочува со голем број предизвици, но останува посветена на Берлинскиот процес, кој се темели на три столба, и тоа: поддршката за проширување на ЕУ, регионалната енергетска соработка и добрососедските односи. Приближувањето на Западен Балкан кон ЕУ е нужност која треба да се случи што поскоро, а билатерализмот нема што да бара во пристапниот процес – беше дециден Рајфенштул.
Присутните пратеници го пренесоа евроскептицизмот кај граѓаните, со оглед на тоа што сме долго во чекалницата на ЕУ поради билатерални прашања и нови и нови услови за отворање на преговорите. Ставот е дека билатералните спорови се злоупотребуваат и служат како изговор за блокада на евроинтегративниот пат. Се побара германска поддршка за надминување на овие спорови и движење напред, онаму каде што припаѓа земјата – во европското семејство. Од проширувањето никој нема да загуби, напротив, ЕУ ќе добие на тежина, а Западен Балкан ќе биде онаму каде припаѓа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Казни и до 2.000 евра: МВР со потсетување на целосната забрана за движење во шумите

Министерството за внатрешни работи ги известува граѓаните дека согласно насоките на Владата по барање од корисниците на шумите – ЈП „Национални шуми“ и Националните паркови кои управуваат со заштитените подрачја, Министерството за земјоделство, шумарство и водостопанство даде согласност за целосна забрана на движење во шумите и шумското земјиште.
Согласноста е издадена врз основа на членот 57 став 3 од Законот за шумите, поради зголемена опасност и превенирање од појава на шумски пожари на отворен простор.
Целосната забрана за движење во шумите започнува од 01.07.2025 година и ќе трае се до 31.08.2025 година.
Движењето во шумите ќе биде дозволено единствено со писмено одобрување издадено од страна на подружниците на ЈП „Национални шуми“ и Националните паркови, соодветно за подрачјето со кои управуваат.
За непочитување на оваа целосна забрана за движење во шумите и шумското земјиште, на физички лица кои ќе се затекнати да се движат во шума и шумско земјиште, согласно член 106 од Законот за шумите, ќе им се изрече глоба од 1.500 до 2.000 евра во денарска противвредност.
Македонија
„Се на свое место“- со настап на Роџер Санчез одбележан 70 роденден на Кисела Вода

Општина Кисела Вода синоќа го прослави својот 70-ти роденден и го отвори Културното лето 2025, кои годинава се одвиваат под слоганот “Се’ на свое место”.
Над 30.000 посетители од цело Скопје, од цела Македонија, како и од соседна Србија, Бугарија и Грција, беа дел од настапот на светската ДЏ ѕвезда Роџер Санчез.
Сцената ја отвори ДЏ Матс со енергичен сет, а по него следуваа одличните настапи на ДЏ Ампов и ДЏ Деан Мицкоски, кои ја подгреаја атмосферата до максимум. Ноќта кулминираше со појавувањето на американскиот диџеј и продуцент Роџер Санчез, кој ја раздвижи публиката со двочасовен сет кој ќе остане запаметен како едно од најголемите музички доживувања во Скопје.
Пред почетокот на главниот настап, градоначалникот на Кисела Вода, Орце Ѓорѓиевски го честиташе роденденот и потоа, заедно со водителот Сашко Коцев, го поставија последното парче од сложувалката во форма на голема карта на Скопје, делот со обликот на Кисела Вода. Публиката со аплаузи го поздрави коментарот на градоначалникот Ѓорѓиевски кој порача: „Сега се’ е на свое место.“
-Обединетоста што ја видовме вечерва е најголемата потврда дека сме на вистинскиот пат. Конечно, оваа година сè доаѓа на свое место. И не заборавајте – најдоброто допрва доаѓа!-изјави градоначалникот Ѓорѓиевски, посакувајќи им добра забава на сите присутни.
Културното лето продолжува и во следните денови со бројни концерти, настапи и театарски претстави кои ќе се одвиваат на повеќе локации.
Македонија
Интерконектор за гас со Грција, по 7 години недомаќинско владеење на СДС и ДУИ, поставени се темелите за енергетска стабилност, велат од Владата

Една година Влада на ВМРО-ДПМНЕ, една година Министерство за енергетика рударство и минерални суровини и поставена основа за енергетска стабилност, сигурен и ефикасен енергетски систем за одржлив и модерен развој, велат од Владата.
Според соопштеното, по 7 години нестручно и недомаќинско владеење на СДС и ДУИ со енергетскиот сектор кој доведе до девастација на електро енергетските капацитети и неколку кратно зголемување на сметките за електрична и топлинска енергија на граѓаните поставени се темелите за енергетска стабилност и независност.
„Министерството за енергетика, рударство и минерални суровини успешно го финализираше процесот на усвојување на новиот Закон за енергетика, со што Македонија изврши целосно транспонирање на Четвртиот енергетски пакет на Европската унија познат и како „Пакет за чиста енергија“.
Се овозможи воведување на паметни броила, батериски системи, граѓански енергетски заедници како и либерализиран пазар и дигитализација.
Се зголемија таксите за минерални суровини со што од 1 јануари 2025 година, Министерството започна со собирање до 100% зголемени такси за експлоатација на минерални суровини, со цел подобрување на редот во користењето на националните ресурси.
Зголемена е наплатата на концесиските надоместоци за минерални суровини за 2.5 пати па така наплатата за период 01.01.-15.04.2024 година изнесува 110.576.324,00 денари, додека пак за период 01.01.-15.04.2025 изнесува 260.258.272,00 денари“.
Посочуваат дека се заштитија ранливите потрошувачи со финансиска поддршка за потрошена електрична енергија.
„Во новиот Акциски план за 2025 на Еусаир стратегијата Македонија успеа да вгради два свои гасни проекти со соседна Грција и Србија кои беа подржани од страна на Европската Комисија: Гасен интерконектор со Грција, Проект за интерконекција со Србија“.
Додаваат дека е пуштен во работа новиот 400/110 kv трансформатор во ТС Битола 2 кој ќе го намали притисокот врз преносната мрежа и ќе ја зајакне сигурноста на снабдувањето во градовите Струга, Охрид, Ресен, Битола и Прилеп, обезбедувајќи стабилна електрична енергија за време на зголемената потрошувачка во зимските месеци.
„Проект за јакнење на преносната мрежа – Милетково (MEPSO). Нова трансформаторска станица 400/110 kV во вредност: 34.7 милиони евра. Приклучок за 1.2 GW од обновливи извори. Овој проектот за јакнење на преносната мрежа во југоисточниот регион на земјата вклучува изградба на нова 400/110 kV трансформаторска станица во близина на селото Милетково, поврзување со постоечката 400 kV линија од Дуброво до Солун, како и реконструкција на постоечките 110 kV линии и станици во и помеѓу Милетково, Валандово и Струмица.
Понатаму втора фаза – ветерен парк Богданци со дополнителни 4 ветерни турбини секоја со капацитет од 3,4 MW. Ова проширување значително ќе ја намали зависноста од увоз на електрична енергија“.