Македонија
(Видео) Главна преокупација на ВМРО-ДПМНЕ е да ги заштити партиските војници во МРТ, вели Селмани

Блокирањето на измените и дополнувањата на Законот за аудио и аудиовизуелни услуги од страна на ВМРО-ДПМНЕ покажува дека главна преокупација на пратениците на опозицијата не е судбината на МРТ туку преку одолговлекување на расправата да ги заштити партиските војници во Програмскиот совет на МРТ и Советот на Агенцијата за медиуми, рече претседателот на Здружението на новинарите на Македонија (ЗНМ), Насер Селмани.
„Загрижени сме што опозициската ВМРО-ДПМНЕ преку фиктивна амандманска расправа во собраниската комисија за транспорт и врски го блокира донесувањето на измените и дополнувањата на Законот за аудио и аудиовизуелни медиумски услуги“, вели Селмани.
Со измените на овој Закон се укинува коруптивниот систем за субвенционирање на домашна продукција во националните приватни телевизии, нуди нов модел за избор на управните органи на МРТ и Агенцијата за медиуми, поотпорен е на политички влијанија, а со него се намалуваат и казните за медиумите.
Според Селмани, единствен недостаток на овој Закон е што не обезбедува стабилно и одржливо финансирање на МРТ и Агенцијата за медиуми, што е, како што кажа, услов за нивната независност и професионалност. За претседателот на ЗНМ чудно е што од поднесените 80 амандмани од пратениците на ВМРО-ДПМНЕ ниту еден не се однесува на овој недостаток на Законот.
„Несфатливо е зошто ВМРО-ДПМНЕ се противи на изборот на нов состав на програмски совет на МРТ и на советот на агенцијата, кога од нивниот глас зависи кој ќе биде избран“, рече Селмани.
Тој јавно ја повика претседателката на Комисијата за транспорт, врски и екологија, Лилјана Затуроска, идната недела да закаже продолжување на расправата по законот, а пратениците од опозицијата да ја прекинат лажната дебата и да дозволат Собранието да ги изгласа измените.
Доколку не се изгласаат измените за законот, парламентарното мнозинство треба да ја преземе одговорноста и да ги деблокира реформите во медиумите. Ако ВМРО-ДПМНЕ продолжува да се однесува неконструктивно, бараме Комисијата за прашања за избори и именување да утврди престанок на мандатот на тројца членови на програмскиот совет на МРТ и еден член во советот на агенцијата за медиуми бидејќи при нивниот избор не е почитувана законската процедура, вели Селмани.
Тој рече дека ако парламентарното мнозинство не постапи на овој начин, ќе се доведе во прашање посветеноста за усвојување на Законот за АВМУ и за спроведување на медиумските реформи.
Виктор Јованов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) На 400 невработени Владата ќе им плати по 24.000 денари ако се пријават за помош во гасењето пожари, најдобрите ќе добијат и вработување

Владата ги повика невработените да се пријават на огласи што ќе ги распишат општините за помош во справувањето со пожарите. Ќе добиваат месечен надоместок од 24.000 денари, а оние кои ќе се покажат како најдобри, ќе добијат и вработувања. Повикот до невработените е нова мерка на Владата опфатена со оперативниот план за вработување која првпат се спроведува кај нас.
„Наместо да дејствуваме несинхронизирано и откако штетите се веќе направени, денес започнуваме со процес на навремена подготовка превенција и мобилизација на ресурси и луѓе. Мерката предвидува вклучување на 400 невработени лица кои ќе бидат ангажирани за извршување јавни работи со фокус на создавање на противпожарни појаси и други активности за спречување и намалување на ризикот од пожари. Секој ангажиран учесник ќе добива месечна финансиска поддршка од 24.000 денари. Сите оние кои ќе покажат особен интерес, посветеност и висока подготвеност, по завршување на оваа мерка ќе бидат трајно ангажирани преку нивно вработување во институциите кои се надлежни за оваа работа“, рече портпаролката на Владата, Марија Митева.
Владата смета дека мерката има двоен ефект, еколошки и социјален оти обезбедува приход и вклучување на невработени лица, а во исто време се гради функционален и одржлив систем за заштита од пожари. Предвидено е да бидат опфатени 14 општини, односно сите општини во кои има противпожарни единици со исклучок на Кочани и Струмица кои не аплицирале за мерката.
Директорот на Дирекцијата за заштита и спасување, Стојанче Ангелов ги повика сите граѓани, „особено оние кои бараат работа со малку поголем предизвик и кои истовремено сакаат да помогнат на татковината да се справи со пожарите кои претстојат“, да се пријават на огласите кои ќе бидат распишани од страна на општините. Ангелов кажа дека лицата кои ќе се пријават во Скопје на огласите на Општина Кисела Вода, се очекува бројката да биде меѓу 80 и 100, ќе бидат распоредени во тимовите за брз одговор на Дирекцијата за заштита и спасување. Предвидено е да поминат кратка обука, а потоа од најдобрите ќе бидат одбрани неколкумина за новата специјална единица за заштита и спасување.
„Можеби сумата на прв поглед не е примамлива, но сите оние кои ќе се пријават на овој оглас, на територијата на целата држава и ќе покажат особен успех во справувањето со пожарите ќе имаат можност професионално да бидат вработени во некоја од територијалните противпожарни единици низ државата. За жал две општини не аплицираа на овој оглас, Општините Кочани и Струмица не аплицираа, и бројките кои беа предвидени за овие две општини најверојатно ќе бидат распоредени во останатите општини. Оние кои ќе се јават на овој оглас треба да бидат психофизички здрави, верувам дека сите тоа го знаат, но дополнително ќе утврдиме на кој начин ќе биде проверена и физичката подготвеност на овие луѓе бидејќи луѓе кои имаат хронични болести срцеви заболувања, луѓе кои имаат проблем со шеќерот не е добро да се пријавуваат на вакви огласи“, рече директорот Ангелов.
Извршната директорка на ЗЕЛС, Дивна Перишиќ, сметадека со овие вработувања малку ќе се доближиме до неопходната бројка пожарникари, која е над 1500. Сега, според податоците кои ЗЕЛС ги прибира Општините, бројката на вработени пожарникари е меѓу 700 и 800 во цела држава. Со 400 нови вработувања ќе се реши половина од проблемот, а другата половина Перишиќ најави дека ќе се обидат да ја решат со изработка на нов закон за заштита од пожари во чија изработка ќе учествува и ЗЕЛС.
Македонија
Алиу: Дигитализацијата не е технолошки луксуз, туку предуслов за ефикасно здравство

Дигитализацијата не е технолошки луксуз, туку предуслов за правично, ефикасно и отчетно здравство. Затоа почнавме со подготовка за измена на 12 основни закони од здравствениот систем, изјави министерот за здравство, Азир Алиу.
Тој рече дека секој закон ќе биде третиран од посебна експертска работна група затоа што, како што рече, модерно здравство не се гради со импровизации, туку со прецизни, системски правила.
„Здравствениот систем не може да се води со претпоставки. Затоа почнавме и со мапирање на состојбите, реална процена на капацитетите, потребите и на празнините. Времето на одлучување од око завршува, иднината е здравство што одлучува врз основа на податоци, не врз навика“, рече Алиу.
Додаде дека Министерството за здравство веќе активно работи на системот базиран на петте столбa со цел да се трансформира здравството во стабилен и политички независен здравствен систем, а посебен фокус е ставен на дигитализацијата како темел на здравствен систем базиран на реални податоци.
„Градиме систем како што се гради алгоритам, со точно дефинирани влезови, процеси и резултати. Во тој алгоритам граѓанинот е на излезот, а човечката грижа е во јадрото. Процесите што ги почнавме нема да останат декларативни, тие се дизајнирани да се засилуваат во динамика и да даваат мерливи резултати“, рече Алиу.
Македонија
ССНМ: Апелот на Министерството за здравство претставува потенцијална цензура

Повикот на Министерството за здравство да не се снимаат, фотографираат и да не се земаат какви било изјави од лицата што се рехабилитираат од повредите од пожарот во Кочани предизвикува сериозна загриженост за слободата на медиумите, но и за одбраната на јавниот интерес, смета Самостојниот синдикат на новинарите и медиумските работници.
Од таму додаваат дека новинарите и медиумските работници најдобро знаат, следејќи ги правилата и стандардите на својата професија, кога, каде и како да земат изјава за настан кој е од висок јавен интерес, како што впрочем е и процесот на лекување на повредените од трагедијата во Кочани.
„Македонските медиуми од денот на пожарот до денес покажаа внимателност и почитување на професионалните стандарди, притоа грижејќи се за чувствата и на настраданите и на нивните фамилии. Ваквите инструкции, односно забрани од Министерството за здравство, иако затскриени зад терминот апел, претставуваат опасен преседан, кој потенцијално може да прерасне во цензура, која е забранета со членот 16 од Уставот. Министерството, но и другите државни институции, мора да бидат свесни за својата позиција и дека вакви апели всушност претставуваат институционален притисок врз слободата на говорот како основно право не само на медиумите туку и на сите граѓани“, велат од ССНМ.
Од таму велат дека медиумите се чувари на јавниот интерес и клучна алка во откривањето на неправилностите во едно општество.
Со нивно професионално дејствување, односно известување, велат од ССНМ, се крева свеста кај граѓаните за одредена тема и се шири фронтот за подобрување на состојбите, како што впрочем беше и со сите извештаи за условите во кои се одвиваше рехабилитацијата на повредените по големата трагедија во Кочани.