Македонија
„Глупи август“, „Коњот останува коњ“ – му рече Ковачевски на Лефков одговарајќи му на пратенички прашања
Премиерот Димитар Ковачевски го нарече пратеникот Миле Лефков „глупи август“, по што се извинуваше од собраниската говорница доколку се чувствува навреден. По ова, посочи дека Лефков бил член на СДСМ па преминал во ВМРО-ДПМНЕ чиј пратеник е денеска.
„Идеолошки татко на вас сите, точно е дека Никола Груевски и Сашо Мијалков. Ама една дигресија, идеолошки татко на Миле Лефков не му е ниту Никола Груевски, ниту Сашо Мијалков. Идеолошки татко му е Зоран Заев, Владо Бучковски и Радмила Шеќеринска пошто тој беше член на СДСМ. И знаете зошто мора да прави ‘глупи август’ овде од себе? Затоа што се прави поголем вмровец од вмровците“, рече Ковачевски.
На ова возврати Лефков кој рече: „Одговорот не стигна бидејќи премиерот беше деконцентриран, го бранеше вицепремиерот“.
„За навредата нема да коментирам. Секој епитет се однесува на вас. Кога ќе слушнете глупи август размислете дали се однесува на вас или некој друг. Не беше долично да се слушне од собраниска говорница“, кажа Лефков.
Одговарајќи на последното прашање од Лефков, премиерот кажа дека ќе одговори на ниво на кое тоа е поставено.
„За крај, јас обично секогаш сум се обидувал да одржам ниво на дискусија на ниво кое одговара на соговорниците. Би сакал да ви одговорам на уште една работа, која постојано ја повторувате, вие и вашиот шеф, нов бидејќи имавте бивши кај нас во партијата. И сакам да ви одговорам во шаховски жаргон, како што вие го поставувате: пионот во шаховска табла може да стане и кралица. Ама коњот секогаш ќе остане коњ“, кажа Ковачевски.
И координаторот на пратениците од ВМРО-ДПМНЕ, Никола Мицевски, имаше реакција.
„Да се нарече пратеник ‘глупи август’ и да не се го укори, е навистина проблем. Господине премиере, ова е ниско за човек што треба да ја води државата. Барам премиерот да се извини зошто тој е гостин кај нас, треба да одговара на прашања, а не да чита исти текстови што ги читал и вчера. Премиере, ве замолувам и сметам дека може да се издигнете над ова и да не ве слушнам со вашите жалопојки. Господине потрпетесдател на Собранието зачувајте го дигнитетот на Собранието и укорете го премиерот, а премиерот да се извини на сите пратеници, порача координаторот на пратеничката група на ВМРО-ДПМНЕ, Никола Мицевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Уапсен врховен судија поради сомненија за примање поткуп
Врховниот судија Наке Георгиев е уапсен поради сомнеж за примање поткуп.
„Денеска 20 мај, лишен од слобода е судија од Врховниот суд поради сомневања за сторено кривично дело Примање награда за противзаконито влијание. Судијата е лишен од слобода на лице место при извршување на кривичното дело. Се чекаат натамошни насоки од надлежен јавен обвинител“, велат од МВР.
Засега не е позната локацијата каде што е приведен судијата, ниту пак, за колкава сума станува збор.
Македонија
Сиљановска доби честитка од кралот Чарлс
Претседателката Гордана Сиљановска Давкова денеска го прими амбасадорот на Обединетото Кралство на Велика Британија и Северна Ирска, Метју Лосон.
На средбата беа разменети мислења за севкупните билатерални односи меѓу двете држави, при што претседателката Сиљановска Давкова истакна дека нашата држава придава особено значење на развојот на пријателските односи и соработката со Обединетото Кралство, вклучувајќи го сојузништвото во НАТО алијансата. Претседателката Сиљановска Давкова посочи на нејзината подготвеност за натамошно унапредување на билатералната соработка со Обединетото Кралство во сите сфери од заемен интерес.
Претседателката Сиљановска Давкова истакна дека како држава особено ја цениме британската поддршка во исполнувањето на стратешката цел – членство во Европската Унија, која продолжи и по Брегзит.
Амбасадорот Лосон на претседателката Сиљановска Давкова и предаде честитка од Кралот Чарлс Трети по повод нејзиното стапување на функцијата, во која упатува најискрени честитки за нејзиниот избор.
„Уверен сум дека ќе го вложите целиот Ваш капацитет за време на Вашиот мандат како Претседател за справување со големите предизвици на нашето време, почнувајќи од справувањето со климатските промени до продлабочувањето на евроатлантската интеграција на Северна Македонија. Многу сум задоволен што нашите две земји имаат воспоставено цврсти трговски и безбедносни односи. Оттука, се надевам дека за време на Вашиот мандат како Претседател односите, кои се веќе толку блиски, уште повеќе ќе се продлабочат“, се вели во честитката од Кралот Чарлс Трети.
Македонија
Сиљановска Давкова се сретна со украинската амбасадорка Дир
Претседателката Гордана Сиљановска Давкова денеска ја прими амбасадорката на Украина, Лариса Дир.
На средбата, беше изразено задоволство од традиционалните пријателски односи, засновани на заемна почит и меѓусебно разбирање. Претседателката Сиљановска Давкова ја нагласи нејзината заложба за продлабочување на соработката во сите области од заеднички интерес, реафирмирајќи ја поддршката за Украина против руската агресија, со која се поткопува европската глобална безбедност и стабилност.
Двете соговорнички разменија мислења и за стратешките определби и перспективите на двете земји, истакнувајќи ја потребата од натамошна заемна помош, споделување искуства и експертиза. Претседателката Сиљановска Давкова ја нагласи македонската поддршка за Украина на нејзиниот пат кон Европската Унија и НАТО.
Амбасадорката Дир, упатувајќи честитки за изборот на претседателката Сиљановска Давкова ѝ посака успешно извршување на функцијата.