Македонија
Годинава 440 лекари положија стручен испит

Во 10 испитни сесии, кои беа организирани во текот на 2023 година, стручен испит положија вкупно 440 доктори на медицина, кои ги исполнуваат условите за добивање лиценца за работа. Најголем интерес за полагање стручен испит и оваа година имаше во декемвриската испитна сесија кога положија 232 доктори на медицина, извести Лекарската комора.
Докторите на медицина, по завршување на Медицинскиот факултет и приправничкиот стаж, најдоцна во рок од една година треба да полагаат стручен испит за да може да се стекнат со лиценца за работа. Организацијата на полагањето на стручниот испит е една од надлежностите на Комората, покрај издавањето лиценци, водење регистар на лиценци, акредитација за континуираната медицинска едукација и спроведување стручен надзор.
Минатата 2022 година стручен испит положиле 435 доктори на медицина, во 2021 уверенија за положен стручен испит добиле 350, а во 2019 година оваа бројка била 420, соопшти Лекарската комора.
Во 2024 година Комората ќе го модернизира процесот на полагање стручен испит по примерот на другите коморски асоцијации од западноевропските држави со кои се остварува блиска соработка. Базата на испитни прашања е обновена и дополнета и веќе е објавена на интернет-страницата на Комората. Новина ќе биде тоа што писмениот дел од испитот ќе се полага на компјутер, каде што посебена програма ќе генерира тест со испитни прашања и понудени одговори, од кои само еден ќе биде точен. Откако ќе бидат одговорени сите прашања, компјутерската програма автоматски ќе го дава и бројот на точни одговори. Докторите што точно ќе одговорат на 60 проценти од прашањата, ќе се упатуваат на полагање практичен и устен дел од испитот. Во практичниот дел докторите ќе добиваат студија на случај на пациент и тие треба да објаснат како ќе го лекуваат. Во последниот устен дел, како и досега, акцентот се става на познавањето на етичките норми и правила што лекарот треба да ги почитува во практикувањето на докторската дејност, се наведува во соопштението на Лекарската комора.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Голема екоакција за собирање текстилен отпад во општина Аеродром

Компанијата „Тексомак“ во соработка со oпштина Аеродром организира екоакција за собирање текстилен отпад.
Првиот дел од оваа акција започнува утре, вторник, 8 април. Контејнери, каде што граѓаните ќе можат да го оставаат текстилниот отпад, ќе бидат поставени на следниве локации:
– ООУ „Лазо Ангеловски“
– ЈДГОА „Срничка“ (главен објект)
– ООУ „Љубен Лапе“
– ЈУДГ „Буба Мара“ (главен објект)
– ООУ „Браќа Миладиновци“
– Зад „Капитол мол“ (пред влезот на „Рамстор“)
Текстилниот отпад треба да биде добро спакуван во пластични ќеси со цел да се избегне негово оштетување.
Следниот чекор е едукација по училиштата и градинките што ќе се одвива во текот на наредниот период, а датумите ќе бидат дополнително објавени, извести општина Аеродром.
Македонија
Сиљановска-Давкова: Мојата земја, во сè пофрагментиран свет, останува силно посветена на ефективниот мултилатерализам, со ОН во нејзиниот центар

Претседателката Гордана Сиљановска-Давкова оствари средба со заменичката генерална секретарка на Обединетите Нации, Амина Џ. Мохамед и се обрати пред постојаните координатори на ОН од Европа и од Централна Азија.
Изразувајќи сочувство за трагедијата во Кочани, Мохамед истакна дека од несреќата, за жал, сите научија голема лекција и сфатија дека може секому да му се случи. Според неа најдобрата одлука којашто ја направила државата е што голем дел од повредените биле испратени на лекување во странство. Со ваква голема загуба, посочи таа, ниту една земја не може и не треба да се справува сама.
Разговарајќи за улогата на Обединетите Нации, како организација создадена да го штити мирот, соговорничките се согласија дека по 8 децениско постоење, неопходно е Организацијата да се реформира во согласност со современите мировни и демократски предизвици.
„Да градиме почитувано и инспиративно лидерство, да ги облагородиме суровиот реализам и силата со идеализам, со право, етика и морал“, истакна претседателката.
Заменичката генерална секретарка рече дека ОН мора да ги задржат вредностите и принципите на Организацијата и да бидат погласни, со што на сегашните и на идните земји членки ќе им докажат дека има имаат бенефит од членството во ОН.
Осврнувајќи се на процесот на нашата евроинтеграција, заменичката генерална секретарка рече дека е важно ОН да се заложат за нас, како мала земја која неправедно и предолго, чека за влез во ЕУ.
Пред постојаните координатори на ОН од Европа и од Централна Азија, Сиљановска-Давкова истакна дека иако светот претрпе длабока геополитичка, економска, еколошка, демографска и технолошка трансформација, надлежностите, структурите и процедурите на ОН останаа главно непроменети.
„Неопходни се суштински реформи што ќе ги направи Генералното собрание и Советот за безбедност полегитимни и подемократски институции во исполнувањето на Повелбата на ОН. Советот за безбедност не може да се бира, да има состав и да одлучува како во 1945 година. Тој мора да се реформира и да стане поодговорен за одржувањето на меѓународниот мир и безбедност. Генералното собрание мора да ја надмине својата дебатна улога и да прерасне во клучно тело во процесот на одлучување и креирање политики. Пресудите на Меѓународниот суд на правдата мора да станат обврзувачки за сите држави“, рече таа.
За неа координаторите на ОН се носители на глобалната совест, поборници и борци за мир, даватели на помош на оние на кои им е најпотребна, носители на надеж во време на очај. Таа им ја изрази и вети нејзината поддршка и додаде: „Како човек којшто го посветил својот живот на правото и правдата, сè уште верувам во потребата од ефективен мултилатерализам со силни, реформирани Обединети Нации“.
Претседателката исто така, ја истакна нашата заложба за интегрирање на Целите за одржлив развој во националната стратегија, фокусирајќи се на климатските активности, еднаквоста и владеењето на правото.
Македонија
„Дволичниот Апасиев беше против извршителите, но кога станува збор за негова корист, не му пречат“, велат од ВМРО-ДПМНЕ

„Апасиев кој е против извршителите, повторно докажува во јавноста дека е дволичен и дека нема став за ниту една работа во државата. Апасиев падна толку ниско, што си го скрши дадениот професорски збор само за да добие нешто во негова корист од извршителите“, велат од ВМРО-ДПМНЕ.
„Апасиев и Левица, заедно со извршителот кој работи и со Дрин Ахмети, внукот на нивниот коалиционен партнер, Али Ахмети, купиле деловен простор во центарот на Скопје за 3 пати пониска цена од пазарната.
Апасиев, најверојатно, по препорака на Ахмети, добил контакт од извршителот Андреја Буневски, за да се договорат да си купи Апасиев деловен простор од 409 м2, преку одземен имот од граѓани или од фирма, која паднала финансиски и не можела да го исплаќа кредитот.
Институциите треба да се позанимаваат со тоа како Апасиев купил простор за 3 пати пониска цена од пазарната и дали постои некаков скриен договор меѓу Апасиев, извршителот и банката?
Апасиев и Левица со ова само ја потврдуваат тајната коалиција на Левица, СДС и ДУИ, која очигледно продолжува да работи во рамки кои се надвор од законските норми.
Со ова се покажа правото лице на Апасиев и Левица. Нив не ги интересира подобар живот за граѓаните, проекти, инвестиции и слично, нив ги интересираат само канцеларии за ич пари, скапи коли и скапи станови“, соопштуваат од ВМРО-ДПМНЕ.