Македонија
Град Скопје: Информациите за булеварот АСНОМ беа дадени на новинарско прашање, немаше официјален настан
Град Скопје ги демантира наводите изнесени од ВМРО-ДПМНЕ дека имале сознанија оти проширувањето на булеварот АСНОМ се прави без одобрение за градба од непознат изведувач на градба и од непознат надзор на градба. Според ВМРО-ДПМНЕ, постојат сомневања за сторени кривични дела, а според нив, уште поважно е што овие кривични дела се прават во временски период во изборна кампања, односно пред вториот круг на претседателските избори.
„Град Скопје остро ги демантира невистините изнесени од ВМРО-ДПМНЕ и Светлана Колариќ во врска со изградбата на булеварот АСНОМ и мостот на реката Вардар помеѓу Аеродром и Ќерамидница. Град Скопје деновиве почна со подготвителните работи од првата фаза од овој капитален проект за кои беа поминати сите потребни законски постапки. Активностите се извршуваат во согласност со програмата за работа и планот за јавни набавки и според нив булеварот АСНОМ е почнат навреме според сите правила. Дополнително, токму со цел да се избегнат вакви можни проблеми поради изборната кампања за претседателските избори, Град Скопје реши да не организира официјален настан, туку овие информации беа дадени како дел од новинарско прашање, а Градот секако дека има право да ги информира граѓаните за своите активности“, велат од Град Скопје.
Од аспект на дозвола за градба, велат од таму, деновиве почнаа само подготвителни работи за овој проект, а соодветна градежна дозвола Град Скопје сам ќе издаде во моментот кога ќе дојде времето за конкретни градежни активности.
„Во врска со обвинувањата за непознати извршители на градежните работи, Град Скопје спроведе транспарентна јавна постапка и преку електронска набавка е избран најповолниот понудувач, а договорот е потпишан пред еден месец. На официјалната страница на Бирото за јавни набавки се објавени потпишаниот договор помеѓу Град Скопје и ‘Бауер БГ’, самото електронско наддавање помеѓу учесниците на јавната набавка и сите други потребни информации што ѝ стојат на располагање на целата јавност“, се вели во демантот на Град Скопје.
Од СДСМ, пак, велат дека со поднесувањето на неосновани пријави, ВМРО-ДПМНЕ денеска покажа дека е против изградба на нов мост во Скопје, против решавање на сообраќајниот хаос, против подобрување на инфраструктурата во Скопје.
„ВМРО-ДПМНЕ со ништо не може да го прикрие фактот дека токму нивната кандидатка го прекрши Изборниот законик преку груба злоупотреба на деца без родители и родителска грижа во изборна кампања и за полиитчки цели. Наместо да се обидуваат да браат алиби во секој проект што е во интерес на граѓаните, ВМРО-ДПМНЕ и Сиљановска нека се спремаат за пораз на 5 мај кога граѓаните уште еднаш ќе ја поразат нивната матрица на криминал, деструкција и блокади“, велат од СДСМ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Центар и Бутел денеска без вода
Од ЈП Водовод и канализација – Скопје известуваат дека денеска без вода ќе бидат делови од општините Центар и Бутел.
Поради дефект на улична цевка ф 2“ на улица Рајко Жинзифов бб раскрсница со улица Киро Крстевски Платник без вода ќе останат корисниците на дел од улицата Киро Крстевски Платник и дел од улицата Шумадиска во општина Центар. Водоснабдувањето ќе биде прекинато од 08:00 часот до завршување на интервенцијата.
Поради дефект на огрлица од ф 250мм на улицата Македонско Косовска Бригада крак 11 бб. без вода ќе останат корисниците од комплекст Вива Фреш, касарната Илинден и улица Македонско Косовска Бригада крак 11 во општина Бутел.
Водоснабдувањето ќе биде прекинато од 09:00 часот до завршување на интервенцијата.
Македонија
Мурал на потпорен ѕид долг 120 метри крај реката Пена со порака за отпорност кон поплавите
Потпорниот ѕид изграден за спречување на лизгање на земјиштето во близина на ХЕЦ Пена, покрај тоа што обезбедува сигурност за возилата и пешаците, трансформиран е и во дело на уличната уметност, преку голем мурал кој пренесува порака за отпорност и единство во заедниците соочени со катастрофи.
Муралот е изработен како дел од серијата активности кои УНДП ќе ги спроведе за одбележување на меѓународниот ден за намалување на ризиците од катастрофи, 13-ти октомври.
На претставувањето на муралот нацртан по целата должина на ѕидот долг 120 метри денеска присуствуваа Постојаниот претставник на Програмата за развој на Обединетите Нации (УНДП), Армен Григорјан и градоначалникот на Тетово, Биљал Касами.
„Овој ѕид е одлично направен и обезбедува безбедно одвивање на сообраќајот и движење на граѓаните на Тетово кон Бањиче, популарна рекреативна дестинација. Но, беше сив и ние сакавме да го разубавиме, но и да испратиме значајна порака за отпорност и единство во заедниците соочени со ризик од катастрофи“, изјави Григорјан.
„Големо задоволство е да се биде тука со нашите партнери од УНДП, на презентацијата на овој мурал, во чија подготовка учествуваа и повеќе млади лица. Заедно спроведуваме значајни активности со кои сакаме во Полог да ја засилиме отпорноста кон поплавите и нашите заедници да ги направиме поотпорни на катастрофи“, рече Касами.
Инспирација за приказната претставена на муралот, уметниците најдоа во цртежите кои ги изработија учениците од повеќе основни училишта во Тетовско, на работилниците организирани од УНДП.
Ѕидот кој послужи како платно за уличните уметници е изграден во рамки на проектот за „Подобрување на отпорноста кон поплавите во Полошкиот регион“, финансиран од Швајцарија, кој Програмата за развој на Обединетите нации го спроведува во партнерство со Министерството за животна средина и просторно планирање и општините во регионот.
Македонија
Потпишан договор за европски грант, 50-тина училишта ќе добијат соларни фотоволтаични системи
Педесетина училишта во Македонија ќе ја подобрат енергетската ефикасност преку инсталирање на соларни фотоволтаични системи, за што, денеска министерката за образование и наука проф. д-р Весна Јаневска и вицегувернерот на Банката за развој на Советот на Европа, Томас Бошек потпишаа договор за неповратен грант вреден 1,1 милион евра.
Училиштата ќе ја заменат енергијата базирана на фосилни горива со чиста и обновлива енергија. На овој начин, тие ќе дадат дополнителен придонес кон заштитата на животната средина, а ќе заштедат и средства кои ќе можат да се реалоцираат во унапредувањето на условите за настава.
На потпишувањето на договорот за овој проект одобрен преку Европскиот фонд за зелени општествени инвестиции, наменет за јакнење на инклузивните климатски мерки, Јаневска изрази благодарност до Банката за развој при Советот на Европа за континуираната поддршка на државата во унапредувањето на инфраструктурните услови во областа на образованието.
Министерката изрази очекувања дека соработката во насока на достигнување на европските стандарди за квалитет, ќе продолжи и во иднина.