Македонија
Град Скопје: Поради советниците од коалицијата ДПМНЕ – СДСМ, скопјани нема да добијат 50 модерни автобуси

Коалицијата ДПМНЕ – СДСМ работи против интересите на граѓаните во Советот на Град Скопје, реагира Град Скопје по седницата на која настана расправија бидејќи претседателот на Советот од редовите на ВМРО-ДПМНЕ денес четврти пат одби да ја стави на дневен ред за гласање предлог-точката за набавка на нови екоавтобуси.
„Само поради антинародната коалиција ДПМНЕ – СДСМ во Советот на Градот Скопје, скопјани нема да добијат 50 нови, модерни и еколошки автобуси. ВМРО-ДПМНЕ и СДСМ се обединети кога станува збор за паушалите од 500 евра, кои ги земаат советниците, обединети во однос на паушалите што ги земаат нивните кадри во надзорните и управните одбори, обединети кога се работи за партиските вработувања, но се нема слух кога станува збор за интересите на граѓаните. Славевски и другите советници од ВМРО-ДПМНЕ се шетаа од врата на врата промовирајќи ја програмата ‘За модерно Скопје’ на градоначалничката Данела Арсовска, а сега кога станаа дел од Советот, работат спротивно на интересите на граѓаните и прават сè за програмата што ја доби довербата на граѓаните да не се исполни“, се вели во реакцијата на Град Скопје.
Од тука додаваат дека Градот ниту е пред банкрот ниту ќе банкротира и прави сè што е технички возможно да ги врати долговите што ги наследи од претходните градоначалници на ВМРО-ДПМНЕ и на СДСМ, кои, како што се наведува, работеле недомаќински и ги задолжиле скопјани за милионски суми.
Арсовска претходно денес им кажа на советниците дека не си ги заслужуваат паушалите. Таа излезе на говорница откога советниците одбија долгорочно задолжување на Градот за нови екоавтобуси да биде додадено како точка на дневниот ред, но прифатија да се додаде точка за субвенции за клима-уреди и субвенции за замена на азбестните покриви за социјално загрозените граѓани.
„Секој месец по 500 евра од човек плаќа секој граѓанин за вас тука за да дојдете да седите и да попувате, да продавате политика и да не ги поддржувате сите оние работи што ним им се неопходни“, рече Арсовска.
На денешната седница Советот ќе разгледа информација за финансиската состојба на Градот и јавните претпријатија, а ќе има и информација за состојбата со изгорениот мост „Беласица“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Забрана за камиони на патниот правец Охрид-Битола, кај превој Буково

АМСМ информира дека од 17 часот има забрана за управување со тешки моторни возила на патен правец Охрид-Битола кај превој Буково.
Од 16:20 часот поради врнежи од снег се воведува забрана за сообраќај за тешки товарни возила на патниот правец Битола – Ресен преку планинскиот превој Ѓавато.
Од 15:25 часот поради врнежи од снег е воведена забрана за сообраќај за тешки товарни возила на патниот правец Гостивар – Кичево преку планинскиот премин Стража и на патниот правец крак Маврово – Дебар.
Македонија
ЦУК: Планинар од Скопје поради лошите временски услови изгубил ориентација на Кожуф, за брзо е пронајден

Ефикасно и брзо е пронајдено залутано лице кај Мрежичко на Кожуф, информираат од Центарот за управување со кризи.
Во 13:15 часот денеска на бројот за итни случаи 112 во ЦУК, добиена била пријава за залутано лице на планината Кожуф, во близина на селото Мрежичко.
„Лицето било планинар од Скопје, кое претходната ноќ ја преспало во планината. Поради лошите временски услови и наросувањето од снег, загубило ориентација и решило да побара помош од службите“, велат од ЦУК.
Надлежните веднаш биле информирани.
„Од страна на Центарот за управување со кризи беа известени СВР Велес, ОВР Кавадарци, Гранична Полиција „ЈУГ“ Итна Служба, како и Општина Кавадарци и градоначалникот на Кавадарци, Митко Јанчев. Во 14.00 часот, лице од општината во Кавадарци кое го познавало теренот, стапило во контакт со залутаното лице и по кратко време го пронашол и со теренско возило го однел до безбедна куќарка во близината каде што бил згрижен, Потоа од страна на граничната полиција “ЈУГ“ лицето е транспортирано до градот“, стои во известувањето.
Македонија
Поради врнежи од снег се воведува забрана за сообраќај за тешки товарни возила на патниот правец Битола – Ресен преку планинскиот превој Ѓавато

Од 16:20 часот поради врнежи од снег се воведува забрана за сообраќај за тешки товарни возила на патниот правец Битола – Ресен преку планинскиот превој Ѓавато, информира АМСМ.
Претходно, беше воведена и забрана за сообраќај за тешки товарни возила на патниот правец Гостивар – Кичево преку планинскиот премин Стража.
Како што соопшти АМСМ, забраната важи и за патниот правец крак Маврово – Дебар и е воведена од 15.25 часот.