Македонија
(Видео) Град Скопје распиша јавен повик за субвенции на инвертер клима-уреди

Град Скопје денеска го распиша јавниот повик за субвенции на инвертер клима-уреди за затоплување на домаќинствата, каде што граѓаните ќе може да аплицираат и онлајн.
Портпаролот на Град Скопје, Ваљон Салиху, денеска одржаа прес-конференција и ги објасни деталите за распишаниот повик за субвенции на инвертер клима-уреди.
„Согласно со условите на овој јавен повик се отвора можноста за над 5.000 граѓани на Скопје да им бидат целосно надоместени трошоците за набавка на инвертер-уред, но не поголема од 62.000 денари во нето-износ. Сите граѓани на територија на Град Скопје кои немаат искористено субвенции за затоплување на своето домаќинство од Градот Скопје и кои немаат приклучок или можност за приклучок на централно греење во објектот каде што ќе биде инсталиран уредот имаат право да учествуваат на повикот. Набавениот уред потребно е да биде монтиран во објектот со адреса од личната карта на барателот. Повикот ги опфаќа граѓаните кои купиле инвертер од 1.1.2020 година, до завршувањето на повикот на 30.11.2020 години или до денот на исцрпување на средствата“, изјави Салиху.
Тој додаде дека на овој повик новитет е условот граѓаните доброволно да ја достават (без надоместок) постојната печка на дрва, јаглен, нафта или на мазут на локација која дополнително ќе им биде соопштена.
„Овие субвенции се дел од мерките предвидени во Планот за подобрување на квалитетот на воздухот и Акциониот план на Стратегијата за климатски промени на Град Скопје. Согласно со многубројните истражувања за квалитетот на воздухот во Скопје, најголемо учество во емисијата на ПМ10 и ПМ2,5-честичките има затоплувањето на домовите кои немаат централно греење. Ова се јавува пред сè поради нецелосното и несоодветно согорување на огревното дрво, лошиот квалитет на дрвото, начинот на неговото чување и употребата на стари, дотраени и технички неисправни печки. Инвертерите за затоплување се економични, еколошки, не користат фосилни горива, а истовремено го постигнуваат максималното задоволство при затоплувањето на домовите. Со субвенциите за овие уреди создаваме услови за поголем број граѓани да се одлучат да инвестираат во нов начин на греење, со кој ќе се намали загадувањето на воздухот, ќе се намалат трошоците за греење, а ќе се подобри нивото на комфор и удобност во нивните домови“, нагласи Салиху.
Доколку се направи паралела во трошоците за греење на стан со 60 м2 за една грејна сезона во однос на греење со термопечка, печка на дрва и инвертер-клима уред ќе се добијат следните пресметки: термопечка која троши 10.920 kwh електрична енергија троши околу 40.000 денари годишно, печка на дрва која троши 12 м3 огревно дрво троши околу 37.000 денари годишно, инвертер клима-уредот на годишно ниво троши само 4.580 kwh електрична енергија, односно само 18.000 денари годишно.
Според анализата, на годишно ниво ќе се заштедат од околу 19.000 денари во однос на загревањето со печка на дрва или 22.000 денари во однос на загревањето со термопечка. Новитет на овој повик е и можноста граѓаните за субвенции на инвертер клима-уреди за затоплување на домаќинствата да аплицират онлајн.
Сите информации за повикот, како и формуларите за електронското пријавување ќе ги најдете на следниов ЛИНК.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Филипче од Ресен: Резултатот на владата на ВМРО-ДПМНЕ е чиста нула

„Чиста нула“ е резултатот на работењето на ВМРО-ДПМНЕ во изминатите 4 години локална власт и година и половина централна власт, порача вечерва претседателот на СДСМ, Венко Филипче, на трибината која се одржа во градот Ресен. Тој пред ресенчани зборуваше дека ВМРО-ДПМНЕ не само на локално ниво, туку и како централна власт не донесе ништо добро за граѓаните и државата.
„Изминатите 4 години локална власт на ВМРО-ДПМНЕ и година и пол централна власт не донесоа ништо добро за државата и граѓаните, резултатот им е чиста нула. Ниту еден нов проект, ниту една инвестиција, ниту една реална мерка што го подобрува животот. Празни ветувања и безидејност. Застој, запуштени општини, заборавени граѓани. И овде во Ресен многу јасно се гледа нивното неработење. Погледнете го Ресен денес после 4 години, што ветуваа, а што се направи“, рече Филипче.
Филипче зборуваше дека ветените проекти останале само на хартија, и наместо развој во Ресен, граѓаните добиле застој. Затоа ги повика ресенчани да стават крај на неработењето и не дозволат неодговорни кадри да се грижат за граѓаните.
„Ги нема ветуваните нови стопански комплекси, нема нови инвеститори во туризмот, нема реконструкција на водовод и канализација, нема нови патеки, нема поддршка за младите, за социјално загрозените лица, нема енергетски ефикасна општина, нема развој на туризмот, на спортот и на културата. Ова „ништо“ и нула сработено не смее да продолжи и следните 4 години да го уништува Ресен, да го уништува регионот и да ги брка младите од градот. Не смееме да го оставиме Ресен на неспособни и неодговорни кадри кои забораваат и не се грижат за нивните сограѓани“, порача Филипче.
Претседателот на СДСМ, исто така рече дека дел од носителите на власта ја користат функцијата за моќ и привилегии, за разлика од СДСМ кои секогаш ја гледале како должност кон граѓаните.
„Не водат сметка за народот, туку за себе и за партиските другари. И тоа суштинската разлика меѓу нив и меѓу нас, социјалдемократите. Ние се бориме за секој човек, за секое семејство, за интересот и прогресот на народот. Ние секогаш сме служеле на народот и не сме ги оставале граѓаните сами“, потенцираше Филипче во Ресен.
Македонија
Мицкоски: Граѓаните знаат, Филипче никогаш не бил со народот, туку со Заев кои ги гледавме како крстарат со луксузни јахти по Егејското крајбрежје

На прагот сме на уште едни избори на кои се носи одлуката за вашата иднина. Ова се избори од кои зависи како ќе се развива вашата општина, вашето маало, вашата улица. Од тоа дали ќе добиете ваш човек кој ќе биде вашиот глас во администрацијата или ќе имате човек и елита која ќе живее на вашиот грб. А, иднината се состои од вашите одлуки денес и од изборите кои ги правите токму денес, порача до македонските граѓани претседателот на ВМРО-ДПМНЕ, Христијан Мицкоски на денешниот народен митинг во Кратово во рамките на кампањата со слоган „Вистинскиот избор! Со твојот човек! За твоето место! За твојата иднина!“ за локалните избори кои ќе се одржат во недела на 19 октомври.
Мицкоски изрази убедување дека и граѓаните знаат дека коалицијата Твоја Македонија, предводена од ВМРО-ДПМНЕ е вистинскиот избор и опција која нема да разочара и која секогаш е со народот.
„Од другата страна имаме измамници во политиката, луѓе кои со децении изградија кариери и бизниси на штета на државата и на штета на заедничкиот интерес на граѓаните. Со едниот избор одите напред, а со другиот се враќате назад кон темното минато на договори во четири очи, срамни отстапки за идентитетот. Во времето кога најважно беше врхушката на власт да биде ситуирана, а народот гладен. Тоа се политичарите коишто ги украдоа сите наши заеднички соништа и донесоа сиромаштија и направија гладен народ. Нашите конкуренти немаат програма, никој не им ја видел, затоа што на овие избори дојдоа со празни и лажни ветувања. Така произволно дадени, потценувајќи го народот, а јас ви велам, мерете не по делата и програмата која ја нудиме, туку по она коешто вие чувствувате дека ние го правиме.
Мицкоски додаде дека СДСМ и нивната коалиција покажаа дека го потценуваат народот излегувајќи на овие избори во оваа кампања со тоа што од првиот ден, па се до денес водат исклучиво само црна кампања.
Мицкоски се осврна и Венко Филипче кој вели дек бил со народот, но граѓаните добро знаат дека тој бил со неговиот гуру од Струмица, Зоран Заев кои донесоа најголема сиромаштија за граѓаните а нив ги гледавме како крстарат со јахти по Егејското крајбрежје.
„Филипче вели дека кога било најтешко бил со народот. Што не е вистина, а и сите вие тоа го знаете, тој бил со неговиот ментор и гуру од Струмица и тие заедно двајцата како тандем го донесоа најтешкото време за целиот народ. И кога беше најтешко и кога народот, буквално, мака мачеше како да го помине денот, нив ги гледавме како се луксузираат на скапо платената јахта, крстарејќи по Егејското крајбрежје. И сите знаат дека дебело ќе загубат, а претседателот на СДСМ Венко Филипче, не може ниту сопствени пратеници да ги убеди, па затоа многу тешко можете да видите пратеник од коалицијата која ја предводи СДСМ на митинзите кои ги организира СДСМ и коалицијата“, рече Мицкоски.
Затоа, посочи Мицкоски, разликата помеѓу нив и нас е тоа што ние имаме визија за секое место и општина која ја посетуваме и токму затоа ги повика граѓаните да излезат на гласање во недела и масовно да гласаат за ВМРО-ДПМНЕ и коалицијата заокружувајќи го бројот 9 за кандидатите за градоначалници и советничките листи.
Македонија
„Се боревме заедно 213 денови и денес ни одлета“: последно збогум од медицинскиот тим кој го лекуваше Панчо од ДНК

По смртта на пејачот Владимир Блажев – Панчо, од болницата каде што тој се лекуваше во изминатите седум месеци „Аџибадем Систина“ на социјалните мрежи беше објавена порака посветена на него.
„Почивај во мир, драг наш Панчо…
Се боревме заедно 213 денови и денес ни одлета…
Нема зборови за утеха за твоите два ангела Марјан и Андреја и за твојата Маја…
Нема зборови што можат да ги запрат солзите на нашите доктори, сестри, болничари кои беа 24 часа со тебе …
Целата болница, заедно со тебе и твоето семејство се боревме и верувавме“, пишува во објавата на болницата.