Македонија
Град Скопје тврди дека не се укинуваат средствата за обнова на „Вардариште“

Градот Скопје го демантира Здружението за заштита на животните „Анима Мунди“ дека во предлог-изменувањето и дополнување на буџетот на Град Скопје за 2018 година, што ќе биде разгледувано на утрешната седница на Советот на Град Скопје, се укинуваат парични средства првично наменети за стационарот за бездомни животни „Вардариште“.
„Парите наменети за обнова на стационарот „Вардариште“ остануваат во буџетот, зашто Град Скопје е цврсто решен да го реконструира постојниот стационар според сите важечки стандарди во таа област и според препораките на експертите и трајно да го реши овој горлив проблем. Во таа насока, Град Скопје ја чека дозволата од Општина Гази Баба за легализација на овој објект, по што ќе може да се преземат и конкретни чекори на ова поле. Сакаме да појасниме дека од Буџетот се тргаат средства наменети за проект за расчистување на депонијата „Вардариште“, што воопшто не е поврзано со стационарот „Вардариште“ и не треба да создава забуна кај јавноста“, се вели во соопштението.
„Во меѓувреме, грижата за бездомните животни Град Скопје ја докажува секојдневно, преку нивен хуман третман. Доказ за тоа е новото возило наменето за заловување и транспорт на бездомните кучиња од скопските улици, што неодамна го стави во употреба ЈП „Комунална хигиена“. И покрај лавината неточни обвинувања што на наша адреса пристигнаа од Здружението за заштита на животните „Анима Мунди“, градоначалникот Петре Шилегов потенцира дека здруженијата за заштита на животните и понатаму остануваат ценет и близок партнер на градот за решавање на проблемот со бездомните животни, зашто само заедно може да се дојде до најповолното решение за соодветна грижа за уличните животни“, се додава во соопштението.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сиљановска-Давкова ќе учествува на Состанокот на лидерите на земјите учеснички од Процесот „Брдо-Бриони“

Претседателката Гордана Сиљановска-Давкова од денеска престојува во работна посета на Драч, Република Албанија, заради учество на Состанокот на лидерите на земјите учеснички од Процесот „Брдо-Бриони“.
Во фокусот на годинашниот состанок ќе бидат неколку теми: Европската интеграција, Планот за раст на ЕУ, младинската политика и одливот на мозоци (brain drain), како и регионалната соработка и безбедност.
Главната цел на процесот е интеграција на сите земји од регионот во Европската Унија, како и стабилизирање на состојбите на Западен Балкан преку јакнење на регионалната соработка. Лидерите на земјите учеснички од Процесот „Брдо-Бриони“ се состануваат најмалку еднаш годишно.
Процесот „Брдо-Бриони“ е заедничка иницијатива на претседателите на Република Словенија и на Република Хрватска. Првиот состанок на лидерите се одржа во 2013 година, во Брдо кај Крањ.
Македонија
(Видео) Петрушевски: Заев своевремено зема куферче од Бојко, што зема сега Филипче за да ги продава националните интереси?

„Заев своевремено зема куферче од Бојко, што зема сега Филипче за да ги продава националните интереси?“, праша денеска на прес-конференција, Бране Петрушевски, пратеник на ВМРО-ДПМНЕ.
„Бојко Борисов своевремено сам кажа дека лично ја помогнал опцијата на Зоран Заев за доаѓање на власт. Од тогаш до сега во СДС ништо не е сменето, тоа што функционирало со Заев, функционира и со Филипче, затоа што првиот е ментор на вториот. Ако тоа го направиле еднаш и знаеме како заврши, тогаш што сега ќе добие СДС за бонбона бизнисот со Бугарија? Таканаречената Резолуција која ја брендираа со таканаречени црвени линии не се ништо друго, туку Тројански коњ за измама на народот. Но едно забораваат, народот нема да падне на нивните лаги, ниту можат повеќе да го лажат. Граѓаните видоа што се вистинските намери на СДС и затоа жестоко ќе ги казнат на овие избори“, истакна Петрушевски.
Македонија
Мециновиќ: Енегријата е очигледна, одиме во втор круг

„Енергијата е очигледна. Луѓе, одиме во втор круг! Таму ќе разговараме за многу нешта затоа што во првиот круг противкандидатите ќе бегаат од дебати. Но, во втор круг нема каде да избегаат и ќе се сретнеме конечно. Ние во мандатот ќе се залагаме за градскиот превоз, за загадувањето на градот, за зајакнување на претпријатијата и преку тоа создавање на функционални јавни претпријатија кои сите услуги ќе ги даваат на задоволително ниво. Утре продолжуваме понатаму, по улиците, онаму каде што патот ќе нè однесе. На улиците ги промовираме нашите спотови кои се цензурирани. Ова движење не е запрено, тоа станува сè поголемо од ден на ден,“ изјави Амар Мециновиќ, пратеник и кандидат за градоначалник на Скопје од редовите на Левица.
Мециновиќ заедно со кандидатот за градоначалник на Аеродром, Марјан Димитриев и советниците за Град Скопје и Општина Аеродром одржаа средба со граѓаните.
„На терен сме, лице в лице со народот – ја слушаме секоја мака и секој предлог. Нашата сила е токму во народот, а нашата визија е чиста, праведна и современа општина и град по мерка на жителите,“ порачаа од партијата.
Димитриев, кој во Аеродром влегува со амбициозна програма, пред граѓаните потенцираше:
„Денес сме тука да ја претставиме нашата програма. Дел од приоритетите се чиста и здрава општина, да ставиме крај на загадувањето и конечно да го решиме паркинг просторот. Аеродромци се спремни за победа, така што морам да кажам – доаѓа нашето време.“
Од Левица нагласуваат дека нивната цел е да го вратат Скопје и Аеродром во рацете на народот – преку транспарентно и одговорно управување во интерес на сите граѓани.