Македонија
Грковска – Брунета: Италија е силен поддржувач на Северна Македонија
Заменичката на претседателот на Владата задолжена за политики за добро владеење Славица Грковска денеска во Рим имаше продуктивна средба со италијанскиот министер за јавна администрација Ренато Брунета, со кого договорија низа конкретни чекори за поддршка на реформите и унапредувањето на јавната администрација во Северна Македонија.
Во исклучително пријателска и топла атмосфера двајцата соговорници нагласија дека Република Северна Македонија и Италија имаат историја на соработка и меѓусебна поддршка и токму затоа, во интерес на двете држави, но и во интерес на Европската Унија е таа соработка да се продлабочи и меѓудругото да се конкретизира на прашања кои ќе обезбедат зголемување на ефикасноста на јавната администрација.
За таа цел вицепремиерката Грковска и италијанскиот министер Брунета се договорија во најкус можен рок двете институции да формираат заедничка Работна група која подетално ќе ги дефинира натамошните чекори за заедничка соработка.
Вицепремиерката Грковска се заблагодари на силната поддршка што Италија ѝ ја дава на Северна Македонија, но и на безрезервниот интерес што министерот Брунета го покажа за унапредување на состојбите во јавниот сектор, кои за нашата држава ќе значат многу.
„За нас е исклучително важно да ја продлабочиме соработката во делот на отчетноста на јавниот сектор, антикорупциските политики, како и дигиталната трансформација на општеството. Во овие сектори Италија има постигнато значајни успеси и токму затоа експертската поддршка од Италија за нас е многу важна“, оцени Грковска.
Министерот Брунета нагласи дека многу е важно, во што е можно покус рок заедничките тимови да подготват конкретен план, со однапред утврдена динамика за резултатите да стигнат што е можно побрзо.
Тој информираше дека италијанскиот Тренинг-центар за јавна администрација во Касерта, кој досега беше наменет само за Италија и за земјите од Медитеранот, наскоро ќе биде отворен за земјите од Западен Балкан и предложи Република Северна Македонија да биде меѓу првите земји кои ќе испратат на обука професионалци од јавната администрација.
Двајцата соговорници се договорија да ја разгледаат и можноста двете држави да ја продлабочат соработката и преку OSCE-MENA, во која се вклучени државите од Медитеранот, особено за програмите за јавната администрација.
На крајот на состанокот вицепремиерката Грковска и министерот Брунета, разговарајќи за макетата од автомобил од Формула 1 од марката „ферари“, која зазема значајно место во неговиот кабинет, симболично покажувајќи ја заложбата на министерот секоја држава да има брза и ефикасна администрација, како „ферари“.
Претходно вицепремиерката Грковска го посети Универзитетот „Луис Гуидо Карли“, каде се сретна со професорот Бернардо Матарела и Лоренцо Валери. На состанокот вицепремиерката Грковска разговараше за можноста за соработка во делот на унапредување на капацитетите во јавната администрација.
Вицепремиерката Грковска истакна дека експертизата и искуството што го има овој универзитет во делот на јавната администрација, но и во делот на сајбер безбедноста може да бидат од големо значење за Република Северна Македонија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Посебен режим на сообраќај во Скопје
Денеска со почеток од 12 часот од страна на Сојузот на синдикати на Македонија ќе биде одржан протест пред Стопанска Комора на Р.С. Македонија на улицата „Димитрие Чуповски“ и улицата „Даме Груев“ и сообраќајот ќе биде пренасочен по околните сообраќајници.
Од тие причини Единицата за безбедност на патниот сообраќај ќе преземе мерки за посебен режим на сообраќајот во централното градско подрачје на Град Скопје.
„Апелираме до сите граѓани учесници во сообраќајот да се почитуваат наредбите кои ќе ги даваат полициските службеници“, велат од МВР.
Македонија
ВМРО-ДПМНЕ: Адвокатите на Заев вршеле притисок, предметот „Пуч“ останал неотворен во СЈО
Специјалното јавно обвинителство (СЈО) наместо како независнa институција, функционирало како партиски штаб на СДСМ, тврдат од ВМРО-ДПМНЕ во соопштение до јавноста, повикувајќи се на изјави од поранешната обвинителка Лејла Кадриу.
Според Кадриу, четворица адвокати на Зоран Заев во времето на СЈО вршеле притисок врз обвинители за предметот „Пуч“.
„Во СЈО дошле 4 адвокати на Зоран Заев, да ги убедуваат обвинителите да се пуштат лица од притвор за предметот „Пуч“. Биле убедувани да дадат позитивно мислење за да може предметот да се преземе од ОЈО ГОКК, за да може предметот да биде работен од СЈО“, велат од ВМРО-ДПМНЕ.
Како што се наведува, предметот потоа бил донесен во СЈО, спакуван во кутии и фолија, и доделен на обвинителките Ленче Ристоска и Лиле Стефановска, но не бил процесуиран.
„Предметот бил оставен да фаќа прашина, а обвинителките не оделе на рочиште, што според обвинителката Кадриу, тој предмет и денес ако се најде, се уште би бил со заштитна фолија, ниту отворен, ниту разгледан. Кадриу тврди дека предметот бил префрлан и чуван без суштинска постапка, што отвора сомнежи за неговото реално процесирање“, велат од ВМРО-ДПМНЕ.
Кадриу посочува и дека најмалку уште два предмети, меѓу кои случаите поврзани со Гордана Јанкуловска и Нешковски, биле политички мотивирани и користени за постигнување одредени политички цели, велат од партијата.
Од ВМРО-ДПМНЕ бараат Јавното обвинителство да ги истражи наводите темелно и непристрасно, со цел, како што наведуваат, да се утврди вистината и евентуалната одговорност.
Македонија
СДСМ: Владата сака авион за Мицкоски, но не и 600 евра минимална плата
СДСМ обвини дека Владата ги игнорира барањата за покачување на минималната плата на 600 евра, додека истовремено најавува набавка на нов владин авион.
„Додека над 200.000 работници едвај врзуваат крај со крај, а вредноста на синдикалната кошница одамна надмина 66 илјади денари, Владата одбива да ја покачи минималната плата на 600 евра“, се наведува во партиското соопштение.
Според СДСМ, пратениците од коалицијата ВМРО-ЗНАМ го блокираат предлог-законот за зголемување на минималната плата и поддршка на компаниите, поднесен од оваа партија. Партијата оценува дека со тоа директно се ускратува финансиска помош за работниците и стопанството.
„Владата сака да купи нов авион за Мицкоски, за нови туристички патувања, како она во Давос“, стои во соопштението, во кое се наведуваат и споредби со луксузите од времето на Никола Груевски, како и со, како што велат, личниот луксуз на актуелниот премиер.
СДСМ истакнува дека ќе продолжи да се бори за „економска правда и враќање на достоинството на граѓаните“.

