Македонија
Грковска: Преку Стратешкиот дијалог ги подигнуваме односите со САД на повисоко ниво
Заменичката на претседателот на Владата задолжена за политики за добро владеење Славица Грковска синоќа, преку конференциска врска, учествуваше на првиот Стратешки дијалог помеѓу Северна Македонија и САД, на панелот посветен на „Владеење на правото и добро владеење“, што се одржа во просториите на Стејт департментот во Вашингтон.
Во своето обраќање вицепремиерката Грковска истакна дека Стратешкиот дијалог претставува подигнување на односите со САД на повисоко ниво, што е особено значајно на полето на доброто владеење. Нагласи дека соработката меѓу двете земји е суштинска и опфаќа широк спектар на прашања кои се од национален интерес и имаат за цел да го подобрат животот на граѓаните на Северна Македонија.
Пред присутните на конференција Грковска информираше дека во фокусот на нејзиниот кабинет се трите столба: дигитална трансформација на општеството, транспарентни и ефикасни институции и развивање на антикорупциски политики.
„Владата на Северна Македонија е посветена да изгради општество со професионални, ефикасни, транспарентни и одговорни институции, насочени кон обезбедување подобри услуги за граѓаните“, истакна Грковска.
Вицепремиерката наведе дека со поддршка на САД и во партнерство со експерти од Естонија интензивно се работи на дигиталната трансформација на општеството со цел услугите што државата им ги дава на граѓаните да бидат достапни дигитално, да бидат брзи, ефикасни и точни. Во таа насока веќе е почнат и процесот на воведување електронска лична карта, што е клучен чекор за дигитална трансформација на општеството.
„Сакам особено да им се заблагодарам на Амбасадата на САД во Северна Македонија и на тимот на УСАИД во Скопје за нивната досегашна поддршка. Претстојат многу работа и многу предизвици, но уверена сум дека со силно партнерство меѓу нашите две влади ќе постигнеме резултати и одржливи решенија, на кои ќе бидеме горди“, порача Грковска пред присутните на конференцијата.
Вицепремиерката Грковска се осврна и на Самитот за демократија, што и оваа година ќе се одржи под покровителство на претседателот Бајден, и нагласи дека Република Северна Македонија останува посветена на заложбите за заедничко спротивставување на авторитарните режими, како и на удвојување на напорите против корупцијата и заштита на човековите права и слободи, преку градење отпорни и ефикасни институции.
„На претстојниот Самит Северна Македонија ќе претстави конкретни цели, фокусирани на позитивни институционални реформи, дигитална трансформација на општеството, како и континуирана заложба за спротивставување на авторитаризмот во Европа“, нагласи Грковска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Таравари: ВЛЕН единствена албанска опција на 8ми мај, промената доаѓа
Првиот човек на Алијансата за Албанците Арбен Таравари во презентацијата на изборната програма на ВЛЕН рече дека оваа програма вреди и за луѓето и за програмата.
Таравари истакна дека сегашниот Устав има недостатоци и не ја претставува реалноста во државата. „Убедени сме дека сегашниот Устав има недостатоци, ограничен е и во многу делови не ја претставува денешната политичка, социјална и етничка реалност во државата“, рече Таравари.
Таравари потенцира дека промената е неопходна, додека заедно со промената мора да се смени и Уставот за да почнат преговорите со ЕУ.
“Ќе започнеме голема дебата и ќе изградиме консензус за нов, подемократски и модерен Устав, кој ќе ја редефинира државата како рамноправна држава на две мнозински заедници“, рече Таравари.
На крајот Таравари нагласи дека на 8ми мај на изборите има само една албанска опција а тоа е коалицијата ВЛЕН.
Македонија
Битиќи: Резултатот е нула-нула, a на 8-ми мај заеднички одлучуваме за победникот
„Резултатот е нула-нула, сè уште немаме победник или поразен. Нашата битка за европска Македонија не е завршена. Нашата држава е мала земја, но влогот на 8-ми мај е голем“, порача на денешните средби со жителите на скопската општина Бутел, Фатмир Битиќи, потпретседател на СДСМ и ко-носител на листата на кандидати за пратеници на Коалицијата за европска иднина во Изборна единица 2.
Тој порача дека е опасен патот по кој ВМРО-ДПМНЕ сака да ја води државата, а тоа е кон изолација, кон унгарско сценарио, кон национализми кои разделуваат.
„СДСМ одбива да се движи кон овој правец. Ние имаме програма и визија за европска држава во која владеат дијалогот, инклузивноста, меѓусебното другарство и социјалната правда“, рече Битиќи.
Тој ги потсети граѓаните на 27 април пред седум години, кога се случи упадот во Собранието и обидот за рушење на уставниот поредок по покровителство на ВМРО-ДПМНЕ.
„Слободата која ја добивме по крвавиот 27 април пред седум години, не е луксуз, тоа е можност која ни даде сила да се движиме напред, да стане полноправни членки на НАТО, да ги отвориме портите на Европската Унија. Сега не смееме да дозволиме на 8-ми мај таа да биде украдена, однесена од виорот на национализмот и поделбите. Мораме да продолжиме да го чуваме овој скапоцен подарок кој го добивме во борбата против режимот на ВМРО-ДПМНЕ, бидејќи тој е темелот врз кој се гради праведно и правично општество, “ порача Битиќи.
Македонија
Карапејовски: Сите граѓани треба да имаат слободен пристап до здраствените услуги
Движењето ЗНАМ – за наша Македонија организираше трибина во просториите на Европскиот Универзитет насловена “Борба со остеопорозата со помош на витаминот Д – неговото височество” предводена од проф. Д-р. Јасмин Циривири – кандидат на пратеничката листа а ЗНАМ во изборната единица 1 и прим. Д-р. Маја Панајотовиќ Радевска.
Трибината беше посетена во голем број, каде што граѓаните покажаа голем интерес за активности од овој вид и исто така ја дадоа својата целосна поддршка за ЗНАМ.
На граѓаните им се обрати и носителот на изборната единица 1 од ЗНАМ – Д-р. Бобан Карапејовски, кој посочи “Сите граѓани треба да имаат слободен пристап до здраствените услуги. Пациентите не треба да бидат клиенти и потребно е пациентите да добијат услуги кои што се квалитетни и достоинствени”.
Д-р Циривири во своето излагање презентираше за борбата против остеопоразата, но и напомена дека “На Македонија и се потребни здраствени реформи. Здравството во Македонија е сведено на многу ниско ниво, здраствен систем веќе воопшто и да не постои каде што докторите и пациентите се деградирани.” Тој посочи и дека “Подобро е болеста да се превенира на време, отколку пациентите подоцна да плаќаат огромни суми и да чекаат долго време за нивно лекување.”
На крајот Д-р Циривири и Д-р Панајотовиќ Радевска остварија средба лице во лице со граѓаните, каде што им понудија совети и препораки, но и ги слушнаа нивните проблеми поврзани со македонскиот здраствен систем и услуги.