Македонија
Грковска: СР Германија е докажан партнер на Северна Македонија

Заменик-претседателката на Владата на Република Северна Македонија задолжена за политики за добро владеење, Славица Грковска, денеска имаше средба со Сузана Шуц од директоратот за Западен Балкан, и со Сабине Штол од директоратот за проширување на ЕУ на Министерството за надворешни работи на Сојузна Република Германија, кои престојуваат во работна посета на нашата земја.
Вицепремиерката Грковска ги запозна претставничките на Министерството за надворешни работи на СР Германија, кои на средбата ги придружуваше амбасадорката Анке Холштајн, со преземените активности на нејзиниот кабинет во сферата на доброто владеење, реформите на јавната администрација, дигитализацијата и борбата против корупцијата и се задржа на соработката во овие сфери со Република Бугарија.
Претставничките на Министерството за надворешни работи на СР Германија покажаа посебен интерес за дијалогот Скопје – Софија и изразија надеж дека процесот поставен на нови основи за соработка и комуникација меѓу двете земји набргу ќе има видливи резултати со почеток на преговорите за нашата земја за членство во ЕУ, што, како што истакнаа, е од важен интерес за Берлин.
Заменик-претседателката во Владата на Република Северна Македонија задолжена за политики за добро владеење, Славица Грковска, на средбата истакна дека дијалогот со бугарската страна се развива во позитивна насока и дека војната во Украина покажа дека проширувањето на ЕУ со земјите од Западен Балкан е од геостратешки интерес на Брисел и на Европа.
Грковска нагласи дека Северна Македонија целосно ги исполни условите за почеток на преговорите со ЕУ и дека граѓаните на земјата очекуваат и Брисел да го исполни својот дел од обврската и дека секое натамошно одлагање ќе го поттикне евроскептицизмот.
Вицепремиерката Грковска потенцира дека СР Германија е докажан партнер на Северна Македонија и на Западен Балкан и дека со оптимизам се очекува континуитетот на Берлинскиот процес, кој донесе големи придобивки во европеизацијата на регионот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Муцунски по повод Денот на македонската дипломатија: „Таа е мост помеѓу народите и чувар на мирот“

По повод 29 април – Денот на македонската дипломатија, министерот за надворешни работи и надворешна трговија, Тимчо Муцунски, упати честитка преку социјалните мрежи.
Во објавата, министерот потсети дека македонската дипломатија своите почетоци ги има во Бирото за односи со странство, формирано во 1969 година, како прв институционален облик за водење на надворешната политика.
„Овој ден е посветен на дипломатите и сите вработени во Министерството за надворешни работи, чиишто посветеност, професионализам и дипломатска умешност се клучни за градење на меѓународниот углед на нашата земја, за унапредување на билатералните и мултилатералните односи и за одржување на врските со македонската дијаспора“, напиша министерот Муцунски.
Тој додаде дека Денот на македонската дипломатија нè потсетува на важноста на дипломатската мисија како мост меѓу народите, чувар на мирот и промотор на соработката, упатувајќи честитка до сите актуелни и поранешни дипломати и вработени во Министерството за нивниот придонес.
Македонија
Стојаноски: Интерпелацијата за Тошковски e доказ за глодарство и злоба

Интерпелацијата e доказ за глодарство, злоба и бескруполозност на политички актери кои што немаат никаков друг интерес, освен политичко профитерство, изјави пратеникот од редовите на владејачката ВМРО-ДПМНЕ, Бојан Стојаноски на денешната собраниска седница каде што се расправаше за интерпелацијата за министерот Панче Тошковски.
„Имаме можност денес да дебатираме по поднесената интерпелација за министерот Панче Тошковски. И мислам дека неколку работи денес треба да бидат кажани, директно кажани, јасно со цел да растуриме некои премиси кои што се создаваат во јавноста, како и која е целта на ова интерпелација, затоа што сметам дека многу неискреност има и многу зборови се споменаа во досегашните дискусии како морал, како одговорност, а за несреќа на оваа држава барем во претходните десет години можеме да направиме еден пример како се поставува по ваква трагедија, а како се постапувало, или не се постапувало во претходниот период, но и да видиме една одвратна малодушност и политички рефлектирано глодарство кое се граничи со мизерни и нечовечки особини“, рече Стојаноски на денешната собраниска седница каде што се расправаше за интерпелацијата за министерот Панче Тошковски.
Стојаноски е категоричен дека за поднесената интерпелација ќе биде потппишан писмен доказ за глодарство и злоба на политички актери кои што немаат никаков друг интерес освен политички да профитираат.
Македонија
Таравари на локалните оди со посебни советнички листи: Нема враќање назад

Министерот за здравство и лидер на едното крило од Алијансата за Албанците, Арбен Таравари, не отстапува од одлуката на локалните избори да одат со сопствени советнички листи иако на власт дојдоа како дел од коалицијата „Вреди“, која се подготвува да прерасне во една политичка партија.
„Засега имаме сигурна одлука дека одиме со посебни советнички листи и тоа е одлука на партијата и од тоа нема враќање назад. За сè друго сме подготвени и отворени да разговараме со сите во однос на локалните избори“, рече Таравари денес при посетата на вакциналниот пункт во Поликлиниката „Букурешт“.
И денес тој уверуваше дека владината коалиција е стабилна и има редовна комуникација со премиерот со кого очекува средба откога ќе се врати од службено патување.
Неговите досегашни коалициски партнери од „Вреди“, пак, сметаат дека Таравари сам се исклучил од коалицијата и треба да си замине и од Владата оти не може и да биде дел од Владата и да преговара со ДУИ.