Македонија
Груби не побегна, рече Ахмети за поранешниот вицепремиер кој се бара со меѓународна потерница

Претседателот на Демократската унија за интеграција (ДУИ), Али Ахмети, ја коментираше ситуацијата со бегството на поранешниот вицепремиер во Владата , Артан Груби, кој се наоѓа на црната листа на САД за корупција, а против кого е распишана и меѓународна потерница.
Тој изјави дека Груби се наоѓа на албански простор, но без да даде конкретни информации за неговата локација. Ахмети додаде дека, сепак, правдата не треба да биде селективна и одмаздничка, нагласувајќи дека ДУИ е против употреба на навреди и клевети за политички цели, пренесоа повеќе медиуми од Косово и Албанија.
„Не сум го сретнал Груби. Тој е добро. Секако дека е на албански простор, тоа е процес кој мора да има епилог. Тој не избега од Северна Македонија, подготвен е да се појави пред органите на правдата, да ги почитува законите, но не и кога има одмаздничката и селективна правда. Ние сме против селективна правда и употреба на навреди и клевети во дневно-политички цели, подготвени сме да одговориме во секој момент и побаравме да се направи ветинг во државата и да се отворат сите политички партии, да биде спроведена истрага за сите функционери“, рече Ахмети.
Груби е обвинет за проневера во Државна лотарија. Меѓу осомничените во овој коруптивен случај е и поранешниот директор на Државната лотарија, Перпарим Бајрами, а штетата се проценува на речиси 8,2 милиони евра. МВР за случајот поднесе кривична и за поранешниот премиер, Димитар Ковачевски, но засега тој не е опфатен со истрагата.
Првиот вицепремиер, Изет Меџити, минатата недела истакна дека Груби не е во Косово, туку во Албанија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Работиме на овозможување покачување на капитацијата за матичните лекари, рече Мицкоски

Владата работи на овозможување покачување на капитацијата за матичните лекари, што би се движела помеѓу 20 и 30 проценти, соопшти премиерот Христијан Мицкоски при денешната посета на тетовскиот регион.
Тој рече дека ги слуша реакциите од страна на матичните лекари и во моментот се работи на пријатно изненадување за нив.
„Очекувам дека веќе во следната недела ќе има добра вест за матичните лекари. Работиме на овозможување покачување на капитацијата за матичните лекари, што би се движела помеѓу 20 и 30 проценти. Оставете да ги направиме конечните пресметки, ќе излеземе многу скоро со информација што мислам дека ќе биде позитивна вест за матичните лекари“, одговори Мицкоски на новинарско прашање.
Македонија
Членовите на Постојаниот комитет на Парламентарното собрание на НАТО во посета на касарната “Илинден”

Членовите на Постојаниот комитет на Парламентарното собрание на НАТО кои се во неколкудневна посета на нашата земја, денеска заедно со министерот за одбрана Владо Мисајловски ја посетија касарната „Илинден“ во Скопје.
Делегацијата беше пречекана од началникот на Генералштабот на Армијата, генерал-мајор Сашко Лафчиски, генерали во Армијата, како и високи претставници на Министерството за одбрана и Армијата.
За време на посетата, членовите на ПК на НАТО, имаа можност да проследат неколку показни вежби на Армијата со кои се прикажа обученоста на припадниците на Армијата при изведување на комплексни сценарија. Во Домот на Армијата беа брифирани за развојот на македонската Армија и одбраната „Оваа годишнина служи како потсетување дека нашето место во Алијансата е резултат на повеќе децениски труд, а нашата иднина е изградена на принципите на колективна одбрана, солидарност и соработка“ истакна генералот Лафчиски.
Македонија
Мицкоски на увид во Тетово: Изграден е нов дел од булеварот Видое Смилевски- Бато

Премиерот Христијан Мицкоски и членови на Владата денес беа во увид во градежните активности на проектот „Изградба на булевар Видое Смилески Бато – I фаза“, на потегот од Фуштанска до село Порој, во Општина Тетово.
Мицкоски по тој повод изјави дека овој значаен инфраструктурен проект опфаќа изградба на коловоз, разделен појас, тротоари, како и комплетна подземна инсталација, фекална и атмосферска канализација, водовод и електрика.
Булеварот ќе биде долг 1.783 метри, а со првата фаза успешно се реализираат 650 метри.
Заклучи дека ова е уште еден чекор кон модерна, безбедна и урбано уредено Тетово, а Владата се грижи за граѓаните преку реализација на капитални проекти кои значат подобар живот, побезбедна инфраструктура и подобри услови за сите.