По повод објавувањето на извештајот на Европската комисија за напредокот на Република Македонија за 2017 година, претседателот на Комисијата за европски прашања, Артан Груби, ги поздрави, како што вели, очекуваните и заслужените убави вести од Брисел за Македонија.

„Добивањето чиста препорака за отпочнување преговори за членство на Република Македонија со Европската Унија претставува потврда за храбро сработеното, потврда дека реформската влада и новото парламентарно мнозинство ја вратија земјата на евро-атлантскиот пат, потврда дека Република Македонија е успешна приказна“, истакна Груби.

Заслугата, рече тој, им припаѓа на граѓаните коишто ги инвестираа сите свои очекувања и напори во реализација на евро-атлантскиот стремеж.

„Како политичко лидерство со визија се вложивме да ги исполниме домашните задачи. Посветено, храбро, патриотиски и со исклучителна динамика се посветивме на остранување на сите пречки на нашиот пат кон Брисел, преку градење добрососедски односи и мерки за доверба и надминување на споровите и недоразбирањата, но не заборавајќи го и финализирањето на нормативниот дел од Охридскиот рамковен договор“, рече Груби.

Тој посочува дека во услови на создадена позитивна клима околу процесот за европска интеграција, во земјата, во ЕУ и кај земјите членки очекува во најкус можен рок и датум за старт на преговорите, истакнувајќи дека ова политичко лидерство е спремно да го понесе товарот на таквиот генерациски предизвик.

Груби го поздравува напредокот и за другите земји од регионот, добивањето на препораката за Албанија, охрабрувачките оценки за Косово и БиХ, како и признавањето на напредокот за Србија и Црна Гора.