На 7 ноември во кривичниот суд ќе продолжи рочиштето за предметот „Титаник“ на специјалното јавно обвинителство, на кое ќе продолжи слушањето и на преостанатите бомби.

На претходните рочишта за „Титаник“ од телефонските разговори можеше да се слушне како поранешниот министер за транспорт и врски Миле Јанакиески со директорот на охридскиот аеродром разговара за евентуално спречување на албанските гласачи брзо да поминат низ терминалите за да не стигнат на гласање во Кичево и Гостивар.

Во бомбите се слушаше како Јанакиески договара авиони од Швајцарија и Италија за луѓе кои биле договорени да гласаат за нив на локалните избори во 2013 година.  Во еден од разговорите се слушa и поранешната министерка за внатрешни работи Гордана Јанкулоска, која се консултира со некое лице и му кажува дека се дадени 2 000 евра на некој со прекар „снајпер“, а дадените пари, според Јанкуловска, требало да бидат дадени кај, како што рече ексминистерката за внатрешни работи, Шиптарите и кај Србите.

Во предметот на СЈО „Титаник“ обвинети се поранешниот премиер Никола Груевски, Кирил Божиновски, Миле Јанакиески, Гордана Јанкулоска, Билјана Бришкоска Бошковски, како и Илија Димовски, Мунир Пепиќ, Едмонд Темелко, Леко Ристовски, Кирил Тодоровски, Катерина Веловска, Станко Коруновски, Коста Марковски, Драгче Драгчески, Марјан Накевски, Гоце Јаневски, Џезми Ахмет, Роберт Давитков, Далибор Алешковиќ и Ленка Рашајковска.

Тие се осомничени за злосторничко здружување, повреда на избирачкото право, повреда на слободата на определување на избирачите, поткуп при избори и гласање, уништување изборен материјал и злоупотреба на средства за финансирање изборна кампања.