На денешната седница на советот на Град Скопје имаше обраќање советникот Филип Јаневски од коалицијата предводена од ВМРО-ДПМНЕ, кој напомена неколку работи во однос на предложената одлука да се промени интервалот на линиите кои сообраќаат во руралните средини и приградските населени места, и напомена дека со тоа граѓаните ќе се соочат со многу поретки линии на располагање.

„Се работи за одлука со којашто дел од линиите кои се менуваат, односно распоредот на линиите за кои се менуваат, се намалува интервалот, меѓутоа генерално за најголем број од линиите се намалува односно автобусите ќе бидат поретки. Ова е случајот со линиите кои се приградски кои сообраќаат во руралните средини околу градот Скопје и во приградските населени места околу градот Скопје коишто и онака веќе се ретки“, вели Јаневски.

Советникот потенцираше дека оваа одлука нема да биде прифатена, исто така истакна дека проблемите кои настануваат во ЈСП се поради лошото менаџирање со тоа што има автобуси оставени без да се вметнат во употреба и кои не се сервисирани.

„Така што јас би сакал да кажам дека ние како советничка група оваа одлука нема да ја подржиме токму поради овие причини, имено би сакал да напоменам дека до пред две години отприлика возниот ред како ваков како што е, беше целосно испочитуван од ЈСП се додека не почнаа проблемите во ЈСП и со овој обем на автобуси којшто го има ЈСП, така што не се работи овде за недостаток на автобуси туку се работи овде за лошо менаџирање со ЈСП и со флотата на автобуси којашто ја има, бидејќи имаме огромен број на автобуси коишто не се сервисирани, коишто се вон употреба“, рече Јаневски.

Јаневски истакна дека е недозволиво ЈСП по само еден месец од кога се изгласани 800 милиони денари да бара по втор пат намалување на автобуските линии што би придонело граѓаните да се соочат со потешкотии со јавниот превоз.

„Во овој момент да се гласа да се намалуваат бројот на автобусите и редовноста на автобуските линии посебно во руралните и приградските населби за нас, за мене лично е недозволиво особено што граѓаните двојно плаќаат за услугата која што ја добиваат. Пред еден месец изгласавме 800 милиони денари за ЈСП за тие еден месец подоцна да дојдат по втор пат да бараат намалување на одредени автобуски линии, тоа е недозволиво, така што ние оваа одлука нема да ја подржиме се надевам дека во иднина ќе не консултирате нас советниците“, вели Јаневски.

Со доделување на признанија од Светската царинска организација до царински службеници за особени заслуги во зголемувањето на ефективноста на управата во наплатата на приходи, олеснување на легалната трговија и сузбивање на криминалот денеска во Царинската управа беше одбележан Меѓународниот ден на Царината.

„Со гордост да кажам дека во изминатиот период постигнавме многу при што преземавме конкретни дејствија за олеснување на трговијата, подигнување на безбедноста и поттикнување одржлив економски раст. Во втората половина од 2024 година наплативме приходи од 65,2 милијарди денари или 4 милијарди денари повеќе од 2023 година, откриени се прекршочни и кривични дела при што евидентирани се 305 случаи на заплени што е за над 100 проценти раст во однос на истиот период 2023 година“, истакна директорот Бобан Николовски на настанот.

Царинската управа, како членка на Светската царинска организација Меѓународниот ден на Царината го одбележа под темата „Царините испорачуваат ефикасност, безбедност и просперитет“.

Пратеничката на СДСМ, Даниела Николова, на денешната собраниска седница посветена на пратенички прашања упати три прашања до министерката за образование Весна Јаневска поради лавината реакции на стручната фела за предложената концепција, со која предметите, како филозофија и социологија, стануваат изборни предмети, а етика, логика и педагогија целосно ќе се укинат.

Во тој контекст Николова се осврна на реакциите на професорите, повика на лична, морална, но и на политичка одговорност на Јаневска, за уништувањето на критичката мисла кај младите, како и дека со укинувањето на овие предмети многу професори ќе останат без работа.

„Во оваа предложена концепција, предметите, како филозофија и социологија, стануваат изборни предмети, а етика, логика и педагогија целосно ги укинувате. Ве прашувам, за која јавна дискусија зборувате? Зарем јавна дебата сметате дека е само поставување на концепцијата на веб-страницата на БРО? Како помисливте дека ќе правите сериозни реформи без јавна дебата? Токму поради тоа, имате сега безброј реакции. Професорите по филозофија од гимназиите, Институтот по филозофија при Филозофскиот факултет, а ним им се приклучија со реакција и Институтот за социологија и родови студии, професорите по ликовна уметност и музичко воспитание, понатаму Филозофското друштво на Македонија, Здружението на социолозите на Македонија, Средношколскиот сојуз – тоа се само некои од оние што ја критикуваат вашата концепција. Тие истакнуваат дека вакви реформи треба да бидат резултат на широка јавна дебата и консултации со сите засегнати страни. Како ќе одговорите на овие критики и дали ќе се разгледаат нивните предлози?“, праша Николова.

Доплнително, ја праша Јаневска и дали ќе понесе одговорност за сите наставници што ќе останат без работа.

„Недостигот на критичка мисла кај младите луѓе може да има далекосежни последици не само за нивниот личен развој туку и за општеството во целина, за мене – образованието без критичка мисла е како тело без душа“.

Оттука, ве прашувам, како министерка за образование и наука можете ли да предвидите што ќе се случи со напредокот во науката и општествениот развој ако се укине критичкото размислување во образованието? Дали сакате да ја укинете главната цел на образованието, а тоа е дека образованието треба да ги поттикне младите да мислат, да создаваат, да истражуваат, а не само да прифаќаат готови и наметнати идеи“.

Побара од Јаневска да ги именува поединците што биле креатори на оваа, како што ја нарече, поразителна концепција.

„Затоа ве прашувам и ве молам да ми дадете одговор кои конкретно поединци сте ги ангажирале за да ви наметнат идеја за уништување на критичкото размислување на младите и укинувањето на слободата? Јавноста има право тоа да го знае“, посочи Николова.